VOV4.Jarai - Amăng hrơi mông plơi prong Buôn Ma Thuột hruă kơjăp bruă nao rai amăng 5 hrơi kiăng pơčrang tañ kman SARS-CoV-2, gong gai plơi pla, lu anom bơwih ƀong, anih sĭ mơdrô hơmâo prăp lui laih gơnam, sĭ gơnam hăng  ba nao pơ mơnuih ƀon sang.

Hok mơ-ak yua hơmâo mă kơdung gơnam hơmâo añăm hla rok, mơnong, boh bip yua mơnuih mơng Grup pơgang Covid-19 mơng ƀut plơi 7, phường Tân An, plơi prong Buôn Ma Thuột djru nao pơ sang čơ, amai Trần Thị Hằng dŏ ƀơi jơlan Nguyễn Xuân Nguyên brơi thâo, sang anŏ ñu hơmâo hră arăng djru nao pơ sang čơ amăng mơmot lơ 26/8. Mơguah lơ 27/8, ñu mơ-it hră anai amăng grup zalo phường, laih anun truh yang hrơi tlam hơmâo mă gơnam laih.

“Kâo lăng bruă djru nao brơi pơ sang čơ amăng mông glăk ngă tui tơlơi pơtrun mrô 16 či pơgang klin jing klă biă yơh. Ƀing gơmơi kiăng blơi hơget lĕ iâu telephôn rơkâo gah phường blơi brơi giong anun arăng ba nao tơl sang. Kâo lăng grup hlăk ai ngă bruă gir biă mă yơh djru ba mơnuih ƀon sang”

Plơi prong Buôn Ma Thuột hơmâo brơi pơčlah mơnuih mơnam tui tơlơi pơtrun mrô 16 mơng 6 mông tlam lơ 26/8. Tui anun, amăng 5 hrơi blung a, plơi prong kiăng mơnuih ƀon sang ƀu dưi tơbiă gah rơngiao ôh, kiăng pơƀut pơčrang kman brơi giăm 375 rơbâo čô mơnuih, kiăng tañ kah đuăi F0 tơbiă mơng plơi pla. Amăng hrơi mông anai, Jơnum min mơnuih ƀon sang plơi prong Buôn Ma Thuột jao kơ hơdôm boh să, phường, akŏ pơdong “siêu thị 0 prăk” djru brơi hơdôm sang anŏ tơnap tap. Ngă tui hơbô̆ bruă anai ƀơi phường Thống Nhất, ơi Nguyễn Khắc Sơn, Khua git gai ping gah ngă rah khua ƀut plơi mrô 1, brơi thâo:

“Hơdôm boh sang anŏ amra hơmâo brơi hră nao pơ sang čơ, gah tlôn hră lĕ pioh čih hơdôm mơta gơnam kiăng blơi. Mơnuih ƀon sang phin rup mơ-it amăng plang zalo mơng ƀut plơi ƀing gơmơi. Ƀut plơi gơmơi hơmâo tum pơƀut glăi hăng mơit glăi kơ jơnum min mơnuih ƀon sang phường kiăng Jơnum min mơnuih ƀon sang phường ngă bruă blơi gơnam kơ mơnuih ƀon sang”.

Tơlơi phara amăng bruă brơi gơnam kơ mơnuih ƀon sang ƀơi mông anai lĕ tal blung a, hơdôm boh sang siêu thị, anom bruă sĭ mơdrô ƀơi plơi prong Buôn Ma Thuột ngă tui bruă sĭ mơdrô tui “combo gơnam kiăng yua” hơmâo nua mơng 100.000 truh 500.000 prăk djơ̆ hăng tơlơi kiăng blơi yua mơng mơnuih ƀon sang. Rim anung gơnam juăt hơmâo hơdôm mơta gơnam kah hăng: mơnong, akan, añăm pơtăm, boh troh, ia luil, ngôt hra, ia măm, boh bip, braih, hơdôm gơnam kiăng yua amăng sang anŏ...Ră anai, hơmâo 5 anom bruă ƀơi plơi prong Buôn Ma Thuột hơmâo siêu thị Go Buôn Ma Thuột, siêu thị Co.opmart Buôm Ma Thuột, siêu thị MM Mega Buôn Ma Thuột, hơdôm boh sang sĭ gơnam Vinmart, Bách hoá xanh amra sĭ online, sĭ tui combo hăng sĭ nua hơđong djŏp mơta gơnam juăt blơi yua.

Yă Trần Thị Thành Nhân, Kơ-iăng khua siêu thị Co.opmart Buôn Ma Thuột brơi thâo, siêu thị hơmâo prăp lui laih gơnam tam, brơi mơnuih hyu jao gơnam tui hăng ƀing tuai kiăng blơi.

“Anom bruă hơmâo anung lui hlâo combo gơnam juăt yua, amăng anung hơmâo añăm hla rok, mơnong akan kiăng mơnuih ƀon sang blơi tañ ƀiă. Bơ gơnam sĭ amăng online, lĕ gah facebook, zalo, mrô telephôn gah anom bruă hơmâo prăp lui laih mơnuih čih hră, prăp lui gơnam ăt kah hăng ba nao kơ ƀing tuai blơi tañ hloh”.

Mơnuih amăng grup Covid-19 nao brơi pơ sang čơ djru kơ mơnuih bon sang ƀơi plơi prong Buôn Ma Thuột.

Ơi Lưu Văn Khôi, Khua gơnong bruă sĭ mơdrô gơnam tơring čar Dak lăk brơi thâo, tui hăng tơlơi jŭ yap mơng Gơnong bruă, gơnam mơng tơring čar prăp lui hơmâo 830.000 drơi un, rơmô kơbao hơmâo 305.000 drơi, mơnŭ, bip hơmâo giăm 13.000.000 drơi; añăm hla rok, boh troh hơmâo 10.500 ektar...yua anun dưi ba hyu gơnam săt. Hrŏm hăng anun, braih, gơnam yua pơkŏn hơmâo pơđom lui lu 3 wơ̆t pơhmu hăng hrơi mơng hlâo adih. Gơnam kiăng yua hơmâo pơhlôm kiăng mơnuih ƀon sang hơđong pran jua pơgang klin hrŏm hăng kơnuk kơna ta.

“Gơnam yua lu biă hăng hơdôm boh sang siêu thị, anih sĭ mơdrô prong arăng prăp lui laih djŏp gơnam, hơđong pran jua mơn. Hrơi tom brơi lơ̆m hlâo či ngă tui tơlơi pơtrun mrô 16 lĕ tal anai ăt huăi hơmâo lu mơnuih luh nao blơi gơnam lơi, tui anun jing hơđong pran jua laih”.

Phrâo rơgao, Jơnum min mơnuih ƀon sang plơi prong Buôn Ma Thuột, tơring čar Dak Lăk hơmâo hră kơ bruă sĭ mơdrô gơnam amăng hrơi pơčlah mơnuih mơnam tui tơlơi pơčrâo trun mrô 16/CT-TTg mơng Khua dêh čar. Tui anun, hăng bruă báĭ gơnam mơng taih tui online amra hơmâo ngă tui dua hơdră. Tal sa, mơnuih blơi gơnam rơkâo blơi hăng ƀing sĭ gơnam hlao, mơnuih ba hyu gơnam amra ba nao tơl sang, prăk gơnam hơmâo tla mơng taih ƀudah tla lơ̆m mă gơnam. Tal dua, ană plơi rơkâo blơi gơnam hăng mơit prăk blơi gơnam kơ pô nao blơi kiăo tui Grup djru nao pơ sang čơ mơng plơi pla ƀơi hơdôm boh să, phường. Hăng hơdră ngă bruă anai, rơdêh ba hyu gơnam mơng sang sĭ mơdrô ba nao truh pơ hơdôm Grup djru ană plơi ƀơi să, phường, ƀudah Jơnum min mơnuih ƀon sang să phường, prăp lui mơnuih djru, rơdêh nao mă gơnam pơ sang sĭ mơdrô (tơdah sang sĭ mơdrô ƀu hmao nao, ƀu hơmâo rơdêh nao), tơdơi kơ anun jao glăi gơnam kơ mơnuih ƀon sang.

Rơdêh jao gơnam lĕ rơdêh mơng sang sĭ gơnam ƀudah rơdêh yua gong gai plơi pla anun brơi pơgiăng gơnam. Mơnuih ba hyu gơnam mơng sang sĭ mơdrô khŏm buh sum ao tui gru anom bruă hăng hơmâo hră pơčrang huăi hơmâo kman.

VOV Tây Nguyên: Čih - Siu H’Mai: Pơblang