VOV4.Jarai-Tlam lơ 7/9, Jơnum min mơnuih ƀôn sang plơi prong Ƀuôn Ma Thuôt, Dak Lak ngă hră pơtrun mrô 4016 kiăng phru ƀiă tơlơi pơkă kom tơbiă hyu yua pơgang klin Covid 19 amăng plơi prong, hơmâo pơgăn ƀiă laih tơdơi kơ 10 hrơi kom khut khăt tơbiă hyu pioh ĕp pơgăn kman klin tui hră pơčrâo mrô 16 mơ̆ng Khua dêh čar kơnuk kơna. Tui hăng anun, mơ̆ng 5 mông tlam lơ 7/9, plơi prong Ƀuôn Ma Thuôt brơi bruă man pơdong amăng plơi prong pơwơ̆t glăi mă bruă.

Ăt tŭ ư brơi djop sang sĭ mơdrô mơnong ƀong huă, sang sĭ mơdrô gơnam sĭ man pơdong pưk sang, mơnong ƀong čem hlô mơnong dưi glăi mă bruă samơ̆ kơnong ngă tui ha mơkrah đôč mrô mơnuih mă bruă. Bruă sĭ mơdrô ƀơi hơdôm anih anai khom ngă tui djơ̆ tơlơi pơkă pơgang klin 5 mơta tơlơi pơtô ba mơ̆ng Ding jum ia jrao hăng hơdôm hơdră pơkă pơgang klin Covid 19.

Nay Jek: Pơblang