VOV4.Jarai - Plơi prong Buôn Ma Thuột, tơring čar Daklak lĕ sa amăng hơdôm plơi prong hơmâo phun kyâo pơging hơ-ui prong hloh amăng đơ đam dêh čar, rơbêh 8m2/čô mơnuih. Mrô kyâo pơtâo amăng plơi prong Buôn Ma Thuột ngă anai lĕ anih arăng hor dŏ hơdip biă biă hăng ngă lu tuai hor lơ̆m rai čuă ngui ƀơi anai. Phun kyâo amăng Buôn Ma Thuột hơmâo lu tui ră anai lĕ tơlơi ba glăi amăng hơdôm pluh thun đing nao pla kyâo pơtâo amăng plơi prong hăng tơlơi anai glăk tŏ tui djă pioh amăng hơdôm jơlan hơdră, tơlơi pơsit kiăng pơđĭ kyar plơi prong truh thun 2030, anăp nao thun 2045.

Hơdôm hrơi akŏ thun phrâo amai Nguyễn Thị Loan hrŏm hăng 5 čô kông nhơn mơng Grup 2, kông ti TNHH sa ding kơna wai lăng anih hơdip jum dar Osaka pơkiăo kông nhơn nao rơmet agaih đang bơnga, phun kyâo ƀơi Gong kut Wa Hô hăng čơđai anet, jơlan Lê Duẩn, plơi prong Buôn Ma Thuột. Hăng lu mơnuih, ƀing kông nhơn kar hăng amai Loan lĕ ƀing mơnuih thâo bruă wai lăng đang bơnga, lĕ ƀing mơnuih abih pran jua, djru kiăng ngă hiam, pla bơnga, phun kyâo hăng wai lăng, rơmet agaih jum dar plơi prong. Gah ñu pô, amai Loan ăt hok mơ-ak biă mă lơ̆m bruă mă mơng adơi amai amăng grup hơmâo lu mơnuih tŭ yap:

“Sit biă ñu ngă hiam brơi kơ mơnuih ƀon sang nao lăng, hăng hơmâo lu mơnuih hor lơ̆m rai čuă ngui kâo hok mơ-ak biă mă. Kâo ƀuh bruă ƀing gơmơi ƀơi anai kiăng pơhlôm brơi agaih rơnăk, lu mơnuih rai ngui pran jua ăt mơ-ak mơn. Thun phrâo kâo čang rơmang klin kheng tañ pơgang hĭ, kiăng kơ abih bang mơnuih dưi ngui jơngum tum pơƀut”.

Hăng tơlơi anăp nao amăng man pơdong klă hloh hăng tơlơi đing nao tuh pơ alin lăp djơ̆, Buôn Ma Thuột glăk ƀơƀrư̆ jing plơi prong phun amăng kual Dap kơdư

Yak nao thun phrâo 2022, klin Covid-19 ƀơi Buôn Ma Thuột glăk tơdu ƀiă, tơlơi hơdip glăk ƀơƀrư̆ pơwŏt glăi tui hơđăp. Rơbat hyu bơrơguăt drơi jăn hơdôm hrơi akŏ thun phrâo ƀơi đang bơnga Sơn La ƀơi anăp sang ñu, ơi Trần Đức Hòa, sang ƀơi jơlan Y Ơn, phường Tân Thành, plơi prong Buôn Ma Thuột hok mơ-ak lơ̆m kơnuk kơna hơmâo đing nao tuh pơ alin man pơkra anih bơrơguăt drơi jăn. Ñu brơi thâo, mơng anih heng hong kret kruai ƀuh lu tơlơi ngă sat răm, ră anai jing đang bơnga hiam hăng anai lĕ anih ngui brơi kơ mơnuih ƀon sang tơdơi kơ abih klin:

“Mơnuih ƀon sang hur har pran jua biă mă, hơmâo anih bơrơguăt drơi jăn, hơmâo anih brơi neh met wa, ƀing čơđai anet ngui pơdơi pran tơdơi kơ sa hrơi mă bruă glêh glar. Anai arăng lăng kar hăng hơtai boh kơ plơi prong lăi hrŏm hăng brơi kơ mơnuih dŏ hơdip jum dar. Kâo ăt hyu djop anih samơ̆ Buôn Ma Thuột lĕ plơi prong hơmâo lu phun kyâo hloh amăng đơ đam dêh čar. Kơnuk kơna hơmâo đing nao, tuh pơ alin lu. Plơi prong man pơdong lăp djơ̆ dong”.

Rĭm ară jơlan, đang bơnga, tơdron lăk lêng kơ mơtah mơda, yua tơlơi dưi hrŏm kơ mơnuih mơnam

Hrưn đĭ man pơdong mơng anŏ răm rai yua blah wang hăng amruih kơthul mơng lŏn mriah, amăng sui thun ayun blan, Buôn Ma Thuột hơmâo lu tơlơi yôm amăng pơđĭ kyar. Djop ară jơlan, rĭm đang bơnga, tơdron lăk lêng kơ mơtah mơda, djơ̆ hăng tơlơi kiăng mơng mơnuih mơnam. Ba ană đah kơmơi hyu ngui jum dar plơi prong amăng hơdôm hrơi akŏ thun, amai Trần Thị Yến, dŏ ƀơi phường Tự An, plơi prong Buôn Ma Thuột hok mơ-ak hăng hơdôm tơlơi yôm mơng bruă pla kyâo pơtâo hăng pla đang bơnga lăng kar hăng kual glai rưng amăng plơi prong.

“Ƀơi Buôn Ma Thuột anai kâo ƀuh hơmâo lu đang bơnga, phun kyâo mơtah mơda. Sit biă ñu lĕ lu jơlan hơmâo phun kyâo pơprong, tơlơi anai ngă kơ anih dŏ hơdip jum dar agai rơnăk, huăi amruih amrăm, kâo lăng dŏ hơdip ƀơi anai pơhlôm agaih hơdjă, dŏ hơdip ƀơi anai kâo hor biă mă”.

Pơjing “Plơi prong mơtah” ƀu djơ̆ kơnong kơtuai jơlan glông, đang bơnga đôč ôh mơ̆ tơlơi anai ăt pơdah ƀơi anăp hơdôm anom bruă, gơnong bruă hăng rĭm boh sang anŏ, plơi pla. Hơdôm anom bruă kơnuk kơna lơ̆m man pơdong phrâo, pơkra ming lêng kơ đing nao bruă djă pioh kyâo pơtâo sô hơđăp hăng pla phrâo dong. Bơ hơdôm plơi pla amăng plơi prong, ia mơtah mơda mơng phun kyâo lĕ tơlơi pơđŏm glăi tui gru grua yôm mơng kual Dap kơdư hing ang.

Ơi Võ Kỳ, Kơ-iăng khua anom bruă wai lăng anih hơdip jum dar plơi prong Buôn Ma Thuột brơi thâo, tui tơlơi pơsit mơng Khua pơ ala mơnuih ƀon sang dêh čar  kơ bruă man pơdong plơi prong, hăng plơi prong mrô I gưl tơring čar, mrô phun kyâo amăng plơi prong, mơng 5-6m2/cô mơnuih. Lơ̆m anun, mrô phun kyâo amăng plơi prong Buôn Ma Thuột truh abih thun 2021 dưm dưm 8,11m2/čô hăng đơ đam plơi prong lĕ 17,4m2/čô. Hăng mrô anai, Buôn Ma Thuột ră anai lĕ sa amăng hơdôm plơi prong hơmâo mrô kyâo pơtâo lu hloh amăng đơ đam dêh čar. Ngă tui jơlan hơdră 1 klăk phun kyâo mơtah mơda mơng Kơnuk kơna, amăng thun laih rơgao, plơi prong ăt hơmâo gir run pok pơhai hăng dưi pla rơbêh 6.000 phun kyâo. Hơnong pơkă truh thun 2022 amra đĭ tui dong hăng pla hơdôm phun kyâo juăt ƀuh čăt ƀơi kual Dap kơdư:

“Ră anai bruă pla kyâo pơtâo, đang bơnga amăng plơi prong Buôn Ma Thuột kơnong hơdôm phun kyâo juăt čăt ƀơi kual lŏn anai, ba glăi tơlơi yôm phara mơng plơi prong Buôn Ma Thuột kah hăng kual Dap kơdư. Juăt pla hơdôm phun kyâo anun lĕ phun Sao, Kate, Giáng Hương, Cẩm Lai hăng phun tơnia, anai lĕ sa amăng hơdôm phun kyâo ƀing gơmơi rơkâo đĭ Ping gah plơi prong, Jơnum min mơnuih ƀon sang tơring čar pla amăng plơi prong”.

Kông nhơn rơmet agaih đang bơnga ƀơi Gong kut Wa Hô hăng čơđai anet ƀơi jơlan Lê Duẩn

Ơi Vũ Văn Hưng, Khua Jơnum min mơnuih ƀon sang tơring čar plơi prong Buôn Ma Thuột brơi thâo, kiăng kơ pơjing plơi prong mơtah kar hăng ră anai, amăng hơdôm pluh thun laih rơgao, djop rơnuk khua mua tơring čar, plơi prong lêng kơ đing nao hăng hơmâo hơdră sui thun pla pơjing kyâo pơtâo mơtah mơda. Truh ră anai, hơdôm hơdră bruă anun glăk tŏ tui djă pioh kiăng kơ pơjing plơi prong Buôn Ma Thuột jing plơi prong mơtah mơda, yôm phara hăng pơplih phrâo tui tơlơi pơtrun mrô 67 mơng Ding jum kơđi čar amăng bruă man pơdong, pơđĭ kyar Buôn Ma Thuột truh thun 2030, anăp nao thun 2045. Tui hăng jơlan hơdră bruă ngă tui tơlơi pơsit mơng Jơnum Ping gah plơi prong tal XV, rơwang thun 2020-2025, mrô lŏn pla kyâo pơtâo amăng plơi prong truh rơwang rơnuč amra đĭ 9m2/čô. Anai lĕ bruă tơnap lơ̆m akŏ mơnuih jai hrơi lu tui mơ̆ kual lŏn pla kyâo, đang bơnga anet tui, smaơ̆ plơi prong ƀuăn amra dưi ngă hăng hơdôm jơlan hơdră, tơlơi pơtrun tong ten:

“Tui tơlơi pơsit mơng plơi prong kiăng tŏ tui hrưn đĭ, rơbêh 9m2/čô mơnuih amăng lăm plơi prong hăng 18m2/čô mơnuih đơ đam plơi prong. Tơlơi anai him lăng amra tơnap biă mă yua akŏ mơnuih jai lu tui hăng lŏn pla kyâo pơtâo jai anet tui. Yua anun ăt khŏ pơtrut pơsur ƀing apăn bruă, mơnuih mă bruă rĭm thun hơmâo hrơi pơsur pla kyâo ƀiă biă mă ñu rĭm čô mơnuih sa phun kyâo. Hăng hơdôm plơi prong, tơring kual phrâo khŏm tuh pơ alin man pơkra đang bơnga, djop đang bơnga lêng kơ tuh pơ alin ha amăng plĕ”.

Hăng tơlơi anăp nao sui thun, hơdră bruă klă hloh hăng tơlơi đing nao tuh pơ alin lăp djơ̆, Buôn Ma Thuột glăk ƀơƀrư̆ man pơkra kiăng kơ jing plơi prong phun amăng kual Dap kơdư. Amăng hơdôm tơlơi dưi ngă amăng plơi prong, tơlơi yôm hloh lĕ kyâo pơtâo mơtah mơda arăng lăng kar hăng “glai amăng plơi prong”, pơjing rai anih dŏ hơdip hơ-ui rơ-ơ̆ kơ mơnuih ƀon sang hăng pơhưč tuai čuă ngui dong./.

Siu Đoan: Pơblang