VOV4.Jarai - Ƀơi mông jơnum lok 2, Ƀirô khua git gai pơ ala mơnuih ƀon sang dêh čar tal 15 phrâo rơgao hơmâo pơsit lu bruă yôm mơng lŏn ia, amăng anun hơmâo lu bruă bơdjơ̆ nao plơi pla mơnuih ƀon sang djuai ƀiă hăng kual čư̆ siăng. Ƀing khua pơ ala mơnuih ƀon sang hăng kư tri amăng dêh čar wơ̆t hăng kual Dap Kơdư čang rơmang anai lĕ Jơlan hơdră hơmâo tơlơi pơplih klă kơ bruă wai lăng djuai ania hăng tơlơi djru kơ mơnuih djuai ania rơwang thun 2021-2030.

Kơplah wah blan 10 thun 2021 anai, Kơ-iăng khua dêh čar ơi Phạm Minh Chính kĭ Tơlơi pơtrun mrô 1719/QĐ-TTg pơsit brơi Jơlan hơdră dêh čar pơđĭ kyar bơwih ƀong huă - mơnuih mơnam kual mơnuih ƀon sang djuai ƀiă hăng kual čư̆ siăng kriang pơtâo thun 2021-2030, rơwang blung a mơng thun 2021 truh thun 2025. Ƀơi mông jơnum lok 2, Khua git gai pơ ala mơnuih ƀon sang dêh čar tal 15, pơphun amăng blan 11/2021 phrâo rơgao ăt pơƀut bơkơtuai kơ tơlơi yôm anai. Ƀing khua čang rơmang Kơnuk kơna git gai hơdôm ding jum, anom bruă tañ pơtrun hră pơ-ar, đah tơring čar mơng hơmâo hơdră ngă bruă; đah mơng djru ba mơnuih ƀon sang djuai ƀiă kual ataih yaih hrưn đĭ bơwih ƀong. Anai ăt jing tơlơi čang rơmang mơng ƀing kư tri hăng hơdôm boh tơring čar kual čư̆ siăng mơn. Ơi Y Thi Niê - Kơ-iăng khua anom bruă wai lăng Djuai ania tơring glông Krông Pač, tơring čar Dak Lăk lăi:

“Kơnuk kơna, khua mua git gai pơ ala mơnuih ƀon sang hơmâo pơtrun lu laih akŏ bruă pơđĭ kyar kual mơnuih ƀon sang djuai ƀiă - kual čư̆ siăng. Tơring glông Krông pač ăt rơkâo kơ tơring čar, Kơnuk kơna lăng ba, djru ba đah mơng pơkra ming hiam jơlan nao rai amăng tơring glông, pơkra bơnư̆, dơnao kŏn ia, lŏn ngă hmua, man pơdong sang măi pơkra gơnam, djru brơi neh met wa hơmâo bruă mă ƀudah pơtô bruă brơi kơ neh met wa ƀơi anai kiăng mơnuih djuai ania Êđê wơ̆t hăng djuai ania pơkŏn hơmâo bruă mă, hơmâo prăk kăk”.

Jơnum lok 2 Khua git gai pơ ala mơnuih ƀon sang dêh čar tal 15

Rơnuč blan 11/2021, Jơnum min mơnuih ƀon sang tơring čar Dak Lăk hơmâo ngă Akŏ bruă pơđĭ kyar bơwih ƀong huă - mơnuih mơnam kual mơnuih ƀon sang djuai ƀiă hăng kual čư̆ siăng thun 2021-2030. Tui anun, Jơnum min mơnuih ƀon sang tơring čar Dak Lăk kiăng hơdôm gơnong bruă, anom bruă, plơi pla pơƀut ngă dưm kơnar, tŭ yua Jơlan hơdră dêh čar pơđĭ kyar bơwih ƀong huă - mơnuih mơnam kual mơnuih ƀon sang djuai ƀiă hăng kual čư̆ siăng thun 2021-2030; ƀu pơdơi pơdă pơđĭ tui tơlơi hơdip mơda mơnuih ƀon sang djuai ƀiă. Pơđing nao bruă anai, ơi Y Lươm Knul - Kơ-iăng khua jơnum min mơnuih ƀon sang să Krông Na, tơring glông Buôn Đôn lăi tui anai:

“Tơlơi kiăng mơng khua git gai pơ ala mơnuih ƀon sang dêh čar lĕ ngă hơđong tơlơi hơdip kơ mơnuih ƀon sang djuai ƀiă ƀơi anai, laih dong pơđĭ kyar bruă tuai hyu ngui, tui hăng kâo, kâo kiăng ngă hiư̆m pă đah mơng hơmâo tơlơi lăng ba, pơhmutu pơđĭ kyar bruă tuai hyu ngui amăng plơi pla - Home Stay, djă pioh gru grua tơlơi phiăn bơwih brơi kơ ƀing tuai, pơƀuh gơnam yua mơnuih djuai ƀiă pơkra. Kiăng hyu pơƀuh, pơtô bruă brơi mơnuih ƀon sang djuai ƀiă kiăng gơñu thâo hluh bruă bơwih ƀong gah tuai čuă ngui hiư̆m pă đah mơng hơmâo prăk”.

Ƀơi Dak Nông, anih hơmâo rơbêh 40 phung djuai ania ƀiă hơdip hrŏm, mrô sang anŏ rin mơng sang anŏ djuai ƀiă lu hloh dua wơ̆t pơhmu hăng mrô sang anŏ rin amăng tơring čar. Kiăng ngă jơlan hơdră dêh čar pơđĭ kyar bơwih ƀong huă, mơnuih mơnam kual mơnuih ƀon sang djuai ƀiă, kual čư̆ siăng tơring čar Dak Nông rơwang thun 2021-2025, tơring čar rơkâo Kơnuk kơna brơi rơbêh 3.511 klai prăk, amăng anun, prăk djru mơng Kơnuk kơna hơmâo djru rơbêh 2.600 klai prăk, bơ dŏ glăi lĕ prăk mơng tơring čar, prăk čan hăng prăk iâu pơthưr arăng djru. Tơring čar ăt rơkâo kiăng pơđĭ tui prăk kơ Kơčăo bruă dưm dăp ngă hơđong plơi pla hăng Kơčăo bruă pơđĭ kyar ngă hmua, pla kyâo pơlir hăng pơgang glai rưng, laih dong pơđĭ tui prăk pơhrui kơ mơnuih ƀon sang. yă Thị Djrong (djuai ania Mnông), kư tri ƀơi ƀon Srê 1, să Dak Ru, tơring glông Dak R’lấp, tơring čar Dak Nông brơi thâo, ră anai neh met wa hơmâo laih lŏn, samơ̆ ƀu hơmâo prăk ngă hmua, thâo ƀiă đôč boh thâo ngă hmua, yua hnun Kơnuk kơna kiăng lăng ba tuh pơ plai prăk kăk gah bruă anai.

“Blung a lŏn tơnah ta hơmâo hơđăp laih, ta hơmâo pran jua ngă bruă. Samơ̆ khŏm kiăng pruai kmơk, hơmâo prăk ngă hmua. Tơdah hơmâo prăk yơh, ta khŏm ngă hiư̆m pă kiăng klă. Prăk lĕ hơmâo sang prăk djru brơi neh met wa čan mă. Bơ phun pla lĕ kiăng hơmâo khul mơnuih ngă hmua djru. Tơdah tui anun lĕ gơmơi mơ-ak yơh, bơni biă mă”.

Plơi pla kual mơnuih ƀon sang djuai ƀiă ƀơi Dak Nông.

Kơ bruă ngă, Dak Nông amra pơƀut pơsir bruă brơi lŏn ngă hmua, pơƀut lŏm lui sang dŏ yik yuk, sang dŏ hyu kruh mă, dưm dăp brơi ngă hơđong tơlơi hơdip; pơđĭ tui bruă brơi prăk pơkra anih anom kiăng yua bơwih brơi bruă ngă hmua, bơwih brơi tơlơi hơdip neh met wa; pơđĭ kyar hơbô̆ bruă ngă hmua pơmut hrŏm đang glai djơ̆ hăng tơlơi phiăn mơng neh met wa, kiăng pơđĭ tui tơlơi hơdip, hơmâo prăk kăk; pơtŏp bruă, djru ba gah ia jrao ăt kah hăng djru pơtô brơi kơ neh met wa, ană bă mơnuih djuai biă. Mơng tơlơi hơmâo sit anun, ơi Điểu Minh - Khua git gai Ping gah plơi Bu Bir - să Quảng Tín, tơring glông Dak R’Lấp lăi tui anai.

“Gah ƀing khua lĕ kiăng pơtô ba, tal sa lĕ boh thâo kĭ thuâ̆t kơ neh met wa. Neh met wa hơmâo pô ƀu thâo ngă hmua ôh. Hăng mơnuih aka ƀu thâo lĕ ta khŏm pơtô ba na nao. Ană plơi hơmâo đang phun pla mơn samơ̆ lui soh; pla kơphê, pla boh ñông ƀu mơboh lĕ yua ƀu thâo ngă; ƀu pruih ia jrao, ƀu pruai kmơk tui anun phun ñu ƀu hiam ôh”.

Amăng Jơlan hơdră dêh čar pơđĭ kyar bơwih ƀong huă - mơnuih mơnam kual mơnuih ƀon sang djuai ƀiă, kual čư̆ siăng tơring čar Dak Nông rơwang thun 2021-2025, tơring čar Dak Nông kiăng truh thun 2025 kiăng hơmâo prăk pơhrui glăi yap tui akŏ mơnuih hăng mơnuih djuai ƀiă đĭ đoi đŏm ñu 1,5 wơ̆t pơhmu hăng thun 2020; mrô sang anŏ rin hrŏ trun mơng 3% truh kơ lu hloh amăng ha thun; pơsir brơi 90% tơlơi kiăng gah lŏn dŏ, lŏn ngă hmua; rơbêh 95% mơnuh djuai ƀiă hơmâo ia yua hơdjă.

Quốc Học: Čih - Siu H’Mai: Pơblang