VOV4.Jarai -  Lơ 27/9, hơdôm bôh sang hră ƀơi tơring čar Daknông hmâo čơkă čơđai sang hră pơwot glăi sang hră tơdơi hơdôm hrơi dô̆ čơlah mơnuih mơnam pơgang, pơgăn klin Covid-19. Kiăo tui anun, gơnong bruă pơtô pơhrăm tơring čar Daknông tŭ ư brơi hơdôm bôh să ƀơi 4 bôh tơring glông: Dak Glong, Dak Song, Tuy Đức, Krông Nô hăng plơi prong Gia Nghĩa čơkă čơđai sang hră pơwot glăi sang hră. Lom nao pơ̆ sang hră, ƀing čơđai khom pơkă lăng pơ-iă drơi jăn, rao tơngan pơdjai kơman.

Ƀing čơđai sang hră dưi hmâo nai pơkă lăng pơ-iă drơi jăn hlâo kơ mut sang hră

Hơdôm bôh sang hră ƀu pơphun dô̆ kơkuh khăn gru akô̆ rơwang hrơi tơjuh mơ̆ pơ ala nao kơ anun lĕ ƀing nai wai lăng anih hrăm pơtô brơi čơđai sang hră hơdră pơgang, pơgăn klin, tơlơi pơkă ngă tui pơgang klin mơng sang hră. Amăng hơdôm mông dô̆ ƀơi sang hră, wot čơđai sang hră hăng nai pơtô leng kơ gôm adung mơbah. Kơnong kơ tơring glông Čư̆ Jut, tơdơi kơ thâo hmâo mơnuih ƀă kơman klin Sars-CoV-2 ƀơi să Nam Dong amăng lơ 26/9, gơnong bruă pơtô pơhrăm hmâo pơdơi jăng jai bruă brơi čơđai nao sang hră./.

Siu H’ Prăk: Pô pơblang