VOV4.Jarai - Tơdơi kơ ƀuh 7 čô mơnuih ƀă kman F0 amăng plơi prong Kon Tum, lơ 24/10, Jơnum min mơnuih ƀon sang tơring čar Kon Tum tŭ ư hăng tơlơi rơkâo mơng Gơnong bruă Pơtô hăng Pơjuăt brơi čơđai ƀơi plơi prong Kon Tum pơdơi nao hrăm pơ sang hră laih anun Pơsit akŏ pơdong anih pơčlah mơnuih mơnam hơmâo ơi ia jrao wai lăng ƀơi kual hơmâo klin Covid-19 amăng plơi pla. Tui anun pơphun mơng hrơi anai, lơ 25/10 abih bang sang hră ƀơi plơi prong Kon Tum pơdơi hĭ hrăm ƀơi anăp. Ƀing čơđai glăi hrăm pơ sang amăng internet hăng hơdră hrăm pơkŏn dong lăp djơ̆.

Khua mua Jơnum min mơnuih ƀon sang plơi prong Kon Tum pel ĕp bruă akŏ pơdong anih pơčlah hơmâo ia jrao wai lăng.

Bruă pơwơ̆t glăi hrăm pơ sang hră tui hluai kơ klin Covid-19 amăng plơi prong Kon Tum hiư̆m pă mơn. Bơdjơ̆ nao 7 čô mơnuih ƀă klin F0 amăng plơi pla ƀơi plơi prong Kon Tum, Jơnum min mơnuih ƀon sang tơring čar Kon Tum pơsit akŏ pơdong anih pơčlah mơnuih mơnam ƀơi phường 6, phường Quang Trung, plơi prong Kon Tum či pơhlôm pơgang klin Covid-19. Anom bruă ia jrao plơi prong Kon Tum blung a pơsit 113 čô mơnuih lĕ F1, 168 čô mơnuih F2.

Siu H’Mai: Pơblang