VOV4.Jarai-Amăng dua thun 2020-2021, tơring čar Dak Lak găn rơgao dua mơta klin hăng dua wơ̆t hơmâo klin Covid 19 laih anun lu plơi pla hơmâo mơnuih ƀă klin ngă bơbrah rơkông đok. Nao hrom ƀing ơi ia jrao, mơnuih mă bruă amăng anom bruă ia jrao, ƀing čih tơlơi pơhing phrâo dŏ amăng tơring čar ƀu kơdun ôh hăng tơlơi tơnap tap hŭi rơhyưt, kơsung nao pơ anăp, anih hơmâo klin, čih tơlơi pơhing pôr pơthâo hmao kru kơ tơlơi truh klin kheng hăng ră ruai kơ tơlơi gir run pơgang klin.

Bruă mă lăp gleng nao anun, lu mơnuih čih tơlơi pơhing lĕ ƀing đah kơmơi hyu mă tơlơi pơhing. Hăng pran jua khin hơtai, hur har, beč bal mơ̆ng gơñu, lăng kah hăng hơdôm čơnuh bơnga hiam amăng khul čih tơlơi pơhing phrâo djru ngă tơdu hĭ ƀiă tơlơi bơngơ̆t bơngañ amăng kual hơmâo klin.

Thun 2020-2021, khul mă tơlơi pơhing ƀing bơn Nam Trang VOV Dap Kơdư, Kim Oanh, Hoàng Tuyết, Hră pơhing Dak Lak, Hải Yến Gong phun jua pơhiăp hăng pơdah rup Dak Lak (DRT) pơƀuh rơđah hăng ƀing mă tơlơi pơhing, yua gơñu khin hyu mă bruă čih tơlơi pơhing amăng anih hơmâo klin hŭi rơhyưt biă mă kah hăng klin ngă ruă rơkông đok laih anun Covid 19. Ƀing đah kơmơi mơ̆, gơñu ăt ngă hrom lu tơhan djop sang bruă kơnuk kơna wơ̆t hrơi ƀudah mlam, čut sum ao kơsu gôm hrôm amăng drơi jăn sir krep, nao pơ sang čơ sĭ mơdrô phun, graih rơdêh, ƀudah anih pơčlah mơnuih mơnam, kiăng thâo tơlơi pơhing tañ pôr kơ mơnuih ƀôn sang thâo klin ƀă hyu hiư̆m pă.

Ƀing đah kơmơi čih tơlơi pơhing phrâo kơsung nao pơ anih pơgang klin

Gơñu ƀơi anŏ arăng ƀuh, ƀơi anŏ hơgŏm, tăp năng pơ anih ĕp lăng klin Covid 19 ƀliah pơ guai dêh čar, ƀơi anŏ amăng să kual ataih hlăk ƀă klin ruă rơkông đok gơñu ƀuh ƀô̆ soh. Tui hăng ƀing čih tơlơi pơhing phrâo pơdah thâo amăng facebook, plăng mơnuih mơnam ngă hrom pơdah thâo mông mă bruă, gơñu tơbiă ia hŏu hang hăng amăng mông gơñu mă bruă ăt lăng hiam bơnai mơ̆n, pĕ tlao hơđong pran jua mă bruă ƀu hŭi kơ tơlơi hơgĕt ôh, ƀing gŏp pơdah thâo mơ̆ng anih arăng dŏ guar dar, pô čih tơlơi pơhing Nguyễn Thảo VOV dŏ ƀơi Gia Lai lăi:

“Pơ anai, kâo hăng lu gŏp čih tơlơi pơhing hur har biă mă hăng bruă mă, samơ̆ ăt pơpŭ biă khul ƀing bơn Trang pơ Dak Lak. Krah mlam mơtam ñu ăt nao mă bruă pơ anih dŏ pơčlah, anih mơ̆ djop pô hŭi soh ƀă Covid 19 laih anun khom brơi dŏ pơčlah abih mơtam”.

Boh tơhnal hrơi hăng mlam nao mă bruă mơ̆ng 4 čô đah kơmơi čih tơlơi pơhing, ƀu kơnong hơdôm rơtuh tơlơi pơhing phrâo pôr kơ klin kheng, wơ̆t hăng hơdôm tơlơi gir run mơ̆ng anom bruă ia jrao, djop sang bruă kơnuk kơna, dŏ hơmâo tơlơi čih ră ruai glăi ngă dlưh pran jua kơ tơlơi djru tơdruă, bruă djru hiam mơ̆ng ƀing ngă bruă sĭ mơdrô, djop gưl mơnuih ƀôn sang, hrom hơbit găn rơgao hĭ hơdôm hrơi tơnap tap. Kơ hơdôm tơlơi hŭi či truh, tơnap tap tơdơi kơ tơlơi pơhing čih ră ruai kơ klin kheng, pô čih tơlơi pơhing Kim Oanh-hră pơhing phrâo Dak Lak ăt tlao mơak lăi:

“Gah anom bruă hră pơhing Dak Lak lĕ hơmâo kâo hăng Hoàng Tuyết ngă gah bruă ia jrao. Hơdôm tơlơi pơhing, tơlơi čih ră ruai klin ruă rơkông đok gơmơi soh ngă, samơ̆ khom mă anăn čih lu anăn phara, yua dah mă anăn ta lu đơi, sang anŏ ƀuh bơngơ̆t kơ ta, hŭi nao mă bruă pơ anih hơmâo klin lu đơi. Ƀuh rơđah hŭi rơhyưt, tơnap tap biă mă, samơ̆ anŏ či ƀă klin ăt hŭi mơ̆n samơ̆ gir bĕ hĭ abih pran jua yua ngă djơ̆ tơlơi pơtrun pơhlôm, pơgang klin tong ten hloh, dưi pơgang hăng sum ao, hrôm drơi jăn, gôm ƀô̆ mơta kah hăng ƀing ơi ia jrao laih anun ƀing ngă bruă amăng anih hơmâo klin”.

Ƀing đah kơmơi čih tơlơi pơhing ăt nao tơl anih hơmâo klin pôr hmao kru tơlơi pơhing klin kheng

Ơi ia jrao Nay Phila, Khua Gơnong bruă ia jrao, Kơ-iăng khua git gai bruă pơhlôm pơgang klin Covid 19 tơring čar Dak Lak brơi thâo, amăng bruă mă pơhlôm pơgang klin tơnap tap biă mă, ñu hăng ƀing ngă bruă hrom ƀuh sa tơlơi juh alum, djru hrom lĕ hơmâo ƀing bơn čih tơlơi pơhing phrâo laih anun mơnuih ƀôn sang, boh nik ñu ƀing đah kơmơi čih tơlơi pơhing phrâo kah hăng Kim Oanh, Hoàng Tuyết, Hải Yến, Nam Trang. Nay Phi La lăi:

“Bruă ƀing ơi ia jrao nao pơ kual hơmâo klin ăt hơmâo ƀing čih tơlơi pơhing, ƀing mă tơlơi pơhing phrâo nao hrom, anun yơh gơmơi ƀuh huăi hyiăl amăl ôh. Ƀing mă tơlơi pơhing sơ̆n pran jua, dŏ tơguan pơsit tơlơi kiăng tong ten, ngă kơ ƀing ngă bruă amăng gơnong bruă ia jrao hăng ƀing ơi ia jrao ăt hơmâo tơlơi juh alum mơ̆n”.

Pă čô đah kơmơi čih tơlơi pơhing Nam Trang, Kim Oanh, Hoàng Tuyết, Hải Yến jing ƀing amĭ arăng laih hlăk rông ană dŏ anet. Gir nao mă bruă amăng anih hơmâo klin ăt ngă kơ lu tơlơi bơngơ̆t mơ̆n. Samơ̆, ăt kah hăng lu mơnuih čih tơlơi pơhing phrâo, ƀing ngă bruă tơlơi pơhing phrâo, gơñu thâo hluh tong ten bruă gơñu ngă kah hăng hrĕ tô nao rai tơlơi pơhing, tơlơi glăm ba hăng mơnuih mơnam. Klin kheng jai hŭi rơhyưt jai, ƀing čih tơlơi pơhing phrâo gah ia jrao ăt khom nao pơ anih hơmâo klin pioh pôr tơlơi pơhing sit nik, tơpă. Pô čih tơlơi pơhing Nam Trang, Gong phun jua pơhiăp Việt Nam dŏ ƀơi kual Dap Kơdư lăi:

“Kâo lăi hăng Oanh, Tuyết hăng hơdôm ƀing gŏp pơkŏn: Ta rơkâo tơring čar brơi sa boh anih mă bruă phara dŏ pơ anun hlao, huăi glăi pơ sang anŏ ôh, ƀu nao pơ anih mơnuih lu ôh, ăt akŏn nao pơ sang bruă lơi: Tơña lĕ hnun, samơ̆ gơmơi lêng kơ thâo soh, djop anom bruă, anih mă bruă amăng tơring čar pioh kơ anih brơi dŏ pơčlah, pơgang klin covid 19. Bruă pơhlôm pơgang klin dŏ sui đôč.

Abih amăng grup čih tơlơi pơhing pô hlơi lêng kơ hơmâo ană bă dŏ anet, ƀu lui hơjăn ôh. Yua kơ anun ƀing gơmơi ăt nao mă bruă pơ anih hơmâo klin kah hăng ƀing ơi ia jrao mơ̆n, ngă bruă hăng tơlơi rơnuk rơnua djơ̆ rơ-ua pơhlôm pơgang. Gah anom bruă ia jrao hơmâo djru brơi bơnal gôm ƀô̆, sum ao hrôm drơi jăn sir mă yua sa wơ̆t glŏm lui, ngă gêh gal abih hnong kơ ƀing čih tơlơi pơhing phrâo mă bruă amuñ, anun atw hơđong pran jua mă bruă. Čang rơmang tañ abih klin kheng"”

Mah lăi hơdôm tơlơi bơngơ̆t lu, samơ̆ grup mă bruă čih tơlơi pơhing ăt mơak mơ̆n laih mă bruă toh lui hĭ bơnal gôm ƀô̆. Abih 3 blan rơgao, gơñu lăi pơthâo tơlơi bơngơ̆t hăng tơlơi hŭi tui anun. Klin Covid 19 ƀơi Dak Lak rơgao 21 hrơi laih ƀu hơmâo pô hlơi ƀă phrâo ôh, klin ruă rơkông đok ăt dưi pơgăn laih, Nam Trang-Kim Oanh čih lu tơlơi ră ruai, tơlơi pơhing phrâo kơ bruă čơkă tuai hyu ngui plơi prong Ƀuôn Ma Thuôt; Hải Yến pioh lu mông čih kơ ling tơhan blah ngă, ră ruai bruă mă mơ̆ng tơhan kông an.

Grup đah kơmơi čih tơlơi pơhing pơčlah tơdruă amăng tơlơi tlao mơak. Gơñu tơguan abih klin pioh pok lui bơnal gôm ƀô̆, mă rup pơdah ƀô̆ mơta hiam r–̆ đah kơmơi, kiăng pơ-ư ang drơi jăn pô dra hiam. Gơñu lăi, hloh kơ pô pơkŏn yơh ƀuh rơđah, gơñu  hơmâo hrơi blan mă bruă tơnap hŭi rơhyưt hloh amăng tơlơi hơdip mơda pô, găn rơgao hĭ tơlơi lông lăng kơtang, pran jua mơak, gum pơgôp hăng đăo kơnang.

Nay Jek: Pơblang