VOV4.Jarai - Mơguah lơ 20/4, Ding jum bruă mă, tơhan rơka hăng mơnuih mơnam gum hrŏm hăng Grup bruă mă jar kmar pơphun Jơnum “Lăng glăi 10 thun ngă tui hơdră djru mơnuih mơnam ƀơi Việt Nam rơwang thun 2012-2022 - Tơlơi pơplih phrâo hăng anŏ aka ƀu klă”. Hră pơthâo amăng jơnum lăi rơđah: Tơdơi kơ 10 thun ngă tui tơlơi pơtrun mrô 15 mơng Khul apăn bruă Ping gah dêh čar, bruă pơhlôm tơlơi hơdip kơ mơnuih ƀon sang ba glăi lu tơlơi dưi prong prin. Hơdôm hơdră djru mơnuih mơnam glăk ƀơƀrư̆ jê̆ giăm hluai tui tơlơi dưi mơng bruă djru brơi mơnuih ƀon sang. Tơlơi dưi mơng ƀing đah kơmơi, ƀing čơđai, ƀing tha rơma, mơnuih drơi jăn ƀu klă hăng ƀing mơnuih ƀu hơmâo anih gơnang nao dưi pơhlôm klă hloh. Amăng 10 thun laih rơgao, rĭm thun đơ đam dêh čar hơmâo pơsir bruă djru brơi ha wŏt brơi kơ 6 truh pơ 8 rơbâo čô mơnuih djru hơkrŭ hăng ră anai đơ đam dêh čar hơmâo rơbêh 1 klăk 300 rơbâo čô mơnuih tŭ mă prăk djru rĭm blan. Rĭm thun ĕp brơi bruă mă mơng 1 klăk 500 rơbâo truh pơ 1 klăk 600 bâo čô mơnuih.

Siu Đoan: Pơblang