Ơi A Hring, djuai ania Hơdang ƀơi plơi Đăk Manh, să Đăk Rơnga, tơring glông Đăk Tô, tơring čar Kon Tum lăi lĕ: Sang anô̆ ñu ăt kah hăng 120 bôh sang anô̆ amăng plơi hmâo tơlơi hơdip mơda hơđong, pơdrŏng đĭ kah hăng ră anai lĕ gơnang kơ tơlơi gum djru klă mơ̆ng mơnuih mă bruă pơtô ba bruă đang hmua mơ̆ng tơring glông gah bruă pơtô ba, ruah mă djop djuai phun pla lăp djơ̆ hăng ayuh hyiăng, lŏn drŏn hăng ba glăi tŭ yua prong. Tơlơi hơdip mơda đĭ gŏ amŏ, ƀơƀiă kơnang kơ tơlơi gum djru klă mơ̆ng ngăn rơnoh gum djru mơ̆ng sang prăk. Khă hnun hai kiăng ba glăi bôh tơhnal bơwih ƀong, tơdơi kơ dưi čan prăk, khom mă yua lăp djơ̆ kơ rim mơta bruă; mơ̆ng pơkra lŏn, ruah pơjeh pla, kơmok pruai, pran bơwih brơi khom tŏng ten rơđah. Sa dua bôh sang anô̆ amăng plơi hmâo lŏn, dưi čan prăk pioh yua kơ bruă đang hmua, samơ̆ ngă ƀong ƀu ba glăi bôh tơhnal, yua kơ mă yua prăk čan akă djơ̆ phun than. Sang anô̆ ñu lĕ pha ra, thâo pơmin pioh mă yua prăk djơ̆ hơdră, mơ̆ng ba glăi klă bôh tơhnal. Hơdôm hrơi anai lơm phrâo pơphun pĕ kơphê, samơ̆ ơi A Hring hmâo pioh laih rơbêh kơ 100 klăk prăk, tum pơƀut 50 tơn kơmok eh hlô, kơmok vi sinh kiăng hmao pruai brơi kơ phun pla tơdơi kơ pĕ pơhrui giong.

 “Kâo čan sang prăk Agribank tơring glông Đăk Tô rơbêh kơ 1 klai prăk, blơi anah kơ su, kơmok pruai, blơi anah phun mắc ca (lơm anun nua 55 rơbâo prăk sa ƀĕ anah phun pla). Ră anai kâo hmâo laih rơbêh kơ 7 ektar đang phun kơ su, 4 ektar phun mắc ca... Amăng thun anai kâo amra tla abih prăk čan mơ̆ng sang prăk, ngă đang hmua pơđĭ kyar bơwih ƀong dong”.

Ăt ƀơi plơi Đăk Manh mơn, sang anô̆ ơi A Chắc hmâo truh kơ 10 ektar đang kơ su, 6 ektar đang kơphê, mắc ca. Kơnong kơ bơyan blung a hmâo bôh phrâo rơgao, amăng 4 ektar đang mắc ca pla plah amăng đang kơ phê hmâo pơhrui glăi laih 5 tơn bôh. Hăng nua sĭ bôh mắc ca akă krô rim tơn ƀơi đang lĕ 32 klăk prăk, sang anô̆ pơhrui hlâo rơbêh kơ 150 klăk prăk. Ơi A Chắc hmâo pơdŏng laih sang klă hiam, blơi rơdêh ô tô pơmă prăk hăng pioh prăk kơ ană nao hrăm hră tum djop.

 “Kơnang kơ dưi čan prăk Sang prăk gah đang hmua tơring glông Đăk Tô kâo pla phun mắc ca, kơphê, sầu riêng hăng djop djuai phun pla pơkon, blơi kơmok, jrao pơgang phun pla... Yua kơ mă yua prăk djơ̆ hơdră anun neh wa ƀơi anai pơhrui glăi hmâo hmăi hơđong, biă ñu, yua kơ thâo mă yua prăk kơ phun kơphê anun neh wa dưi tla djop prăk čan mơ̆ng sang prăk. Lăng hrŏm, bơhmu hăng 10 thun hlâo adih lĕ tơlơi hơdip mơda neh wa hmâo pơđĭ kyar hloh lu biă”.

Ơi A Như, khua plơi Plei Lay, să Ia Čim, plơi prong Kon Tum brơi thâo; Plei Lay hmâo 296 bôh sang anô̆, hăng 960 čô mơnuih, biă ñu lĕ djuai ania Jarai. Abih bang neh wa amăng plơi leng kơ  čan prăk Sang prăk gah hơdră bruă mơnuih mơnam hăng Sang prăk Agribank pioh yua pơđĭ kyar bruă đang hmua. Ơi A Dit, sa bôh sang anô̆ dô̆ rah ƀơi Plei Lay, pơdŏng rah sang dô̆ hmâo nua giăm truh 150 klăk prăk, lăi:

 “Kâo lĕ djuai ania Jarai, bơni kơ Sang prăk hmâo brơi čan prăk djru kơmlai hăng mrô prăk 50 klăk prăk. Kâo yua klơi dơnao rông akan, bơwih brơi kơ phun kơphê, tiu, sang anô̆ ƀing gơmơi ăt plai ƀiă mơn bơhmu hăng hlâo. Pơhrui glăi hăng sĭ tiu ăt hmâo hmăi mơn prăk anun mơ-ak biă. Kâo bơni kơ Sang prăk hmâo djru laih neh wa hmâo prăk yua ngă đang hmua”.

Amai Y Cô Viên, ƀơi plơi Kep Ram, să Hoà Bình, plơi prong Kon Tum hmâo đang kơ phê prong 2,5 ektar, pŭ be 13 drơi, 1 ektar đang hơbơi plum, 8 ar hmua pơdai ngă dua bơyan. Mơ̆ng đang kơ phê, đang hơbơi plum, pŭ bĕ, thun 2022 ñu pơkrem hmâo rơbêh kơ 80 klăk prăk. Amai Y Cô Viên brơi thâo: Ră anai glăk ngă hră pơ-ar čan prăk sang prăk 150 klăk prăk pioh pơdŏng sang dưm gơnam hăng sang sĭ mlia.

 “Kâo yua prăk pla phun kơ su, rông rơmô hăng be. Mă prăk blơi rok kơ rơmô ƀong, bơwih brơi pŭ rơmô, be mơ̆ng sang anô̆. Dua dong lĕ kâo yua prăk čan pơkra sang sĭ mlia kơmok. Čơkă mă kơmok mơ̆ng sang bruă ba glăi, sĭ mơdrô hăng ngă gal brơi neh wa nao blơi pơgiăng giăm gêh gal hloh hăng hmâo nua rơgêh hloh pioh neh wa hmâo kơmok pruai kơ phun pla. 3 lĕ yua pơdŏng anih pioh sĭ gơnam tam kiăng hmâo prăk mă yua”.

Ơi Nguyễn Công Thành Phương, Kơ-iăng Khua Sang prăk Agribank pơdŏng ƀơi Kon Tum brơi thâo; mrô brơi neh wa djuai ania ƀiă čan ƀơi sang prăk Agribank Kon Tum lĕ giăm truh 650 klai prăk hăng rơbêh kơ 4 rơbâo čô mơnuih čan. Abih bang kah hăng neh wa leng kơ yua djơ̆ bôh than anun ngă tui klă ba glăi bôh tơhnal hrŏ trun rin rơpa:

 “Lu ñu mơnuih čan prăk anai yua kơ bruă rông hlô, tơjŭ pla. Hrŏm hăng anun bruă ngă tui jơlan hơdră djru brơi čan prăk mă kơmlai ƀiă, Agribank Kon Tum gơgrong hlâo pơkĕ hrŏm lăi pơhing hơdră pơtrun jơlan gah, hơdră bruă mơ̆ng Ping gah kơnuk kơna, lăi pơthâo hơdôm hơdră klă, hơdră ngă phrâo djru pơđĭ tui bôh thâo hră mơ̆ng neh wa djuai ania ƀiă”./.