Hơdôm tơhnal pơkă anŏ hiam klă kah hăng pran jua khăp kơ lŏn ia, khăp kơ plơi pla, khăp pap, kah pơpha djru nao rai, tong ten, thâo hluh, hur har hrăm, triăng mă bruă pơčeh phrâo amăng djop bruă mơnuă, khin hơtai, kjăp hơđong găn rơgao djop mơta tơlơi tơnap tap lông lăng...dưi akŏ pơjing, pơđĭ kyar hăng djă pioh pơbŭ tui na nao amăng sang anŏ. Kiăng kơ sa khul mơnuih mơnam pơđĭ kyar tơpă, hiam klă, blung hlâo rim sang anŏ khom pơđĭ kyar hơđong kjăp. Khă tui anun, sa tơlơi hơmâo lăp či lăi nao lĕ tơlơi rung răng taih amăng lơ̆m sang anŏ ăt dŏ hơmâo đôč laih anun lu sang anŏ, amăng anun hơmâo lu sang anŏ mơnuih ƀôn sang djuai ƀiă.

Tơlơi rung răng taih čom măng sang anŏ lơ̆m dêh čar lăi hrom, amăng kual mơnuih ƀôn sang djuai ƀiă lăi pha, sa tơlơi ră ruai phrâo na nao đôč. Tơlơi răm ƀăm anai, hlăk pơtrut lu ƀing đah kơmơi djuai ƀiă pơčlah phara hơjăn păn, kơdŭn hĭ pơ klôn lơ̆m khul mơnuih mơnam dêh čar hơmâo lu tơlơi pơblih laih anun pơđĭ kyar kah hăng ră anai. Anai lĕ sa amăng hơdôm tơhnal mơ̆ lu tơring čar, kual plơi pla akŏ pơdong anih lăp đăo kơnang kiăng ngă bruă hmar, tañ pơgăn hĭ tơlơi răm ƀăm mơ̆ng tơlơi taih amang lơ̆m sang anŏ, tui hăng hơdră pơsir anŏ bơkơnar đah rơkơi hăng đah kơmơi, kơnang tơki kơ ană plơi pla, khua mua apăn bruă djop gưl pơtô lăi, djru ba hmar pơgang ƀing mơnuih arăng ngă sat, taih čom biă mă ñu ƀing đah kơmơi hrơi, kiăng hơmâo anih gơñu đuăi nao dŏ kơđap jăng jai, hơmâo anih arăng ĕp lăng pơjrao tơlơi ruă nuă, pơtô lăi, pơčrâo brơi hơdră bĕ hlâo kiăng hơđong pran jua huăi rung răng, brăl hơngal hŭi rơhyưt, đah mơ̆ng ngă hơđong pran jua mơnuih arăng sat, tơdah ruă kơtang pơgiăng ba nao pơ sang ia jrao prong hloh. Pơhưč lu mơnuih ngă hrŏm, gum tơngan amăng plơi pla laih anun pơđĭ tui tơlơi thâo hluh kơ mơnuih ƀôn sang pơhlôm hlâo, pơgang hĭ tơlơi sat taih amang lơ̆m sang anŏ; khom hơmâo tơlơi djru ba mơ̆ng hơdôm bơnah pơdjơ̆ nao, ƀing mơnuih apăn bruă kơnuk kơna pơtô ba tơlơi lăng ba bơkơnar đah rơkơi hăng đah kơmơi.

Ƀơi Lào Cai, mơ̆ng akŏ thun 2023 truh ră anai, khul đah kơmơi djop gưl tơring čar Lao Cai akŏ pơjing phrâo 2 anih lăp đăo kơnang amăng plơi pla, či tơring kual Nông trường Phong Hải, tơring glông Bảo Thắng hăng să Thẳm Dương, tơring glông Văn Bàn hơmâo rơbêh 40 čô ding kơna ngă hrŏm. Anai lĕ 2 hơbô̆ bruă yua Khul đah kơmơi mut phung tơring čar pô ngă mơ̆ng thun 2021-2025. Tui hăng akŏ bruă mơ̆ng Jơnum min mơnuih ƀôn sang tơring čar Lao Cai kơ bruă pok pơhai ngă tui tơlơi lăng ba bơkơnar đah kơmơi hăng đah rơkơi laih anun pơsir hơdôm tơlơi ječ ameč kơ ƀing đah kơmơi hrơi hăng čơđai muai amăng tơring čar mơ̆ng thun 2021-2025, đơ đam tơring čar kiăng ngă kjăp tui, pơđĭ boh tŭ yua ƀudah akŏ pơdong phrâo 48 boh anih ngă anŏ đăo kơnang amăng plơi pla.

Ƀơi tơring čar Bình Định, hơbô̆ bruă anăn anih lăp đăo kơnang amăng plơi pla hơmâo djru kơ lu adơi amai đah kơmơi hăng čơđai muai ană rơkơi ƀudah mơnuih amăng sang anŏ ngă sat taih ama ng hơmâo anih tơki laih anun hơmâo ba glăi boh tŭ yua blung a. Hơbô̆ bruă anai, djru kơ ƀing đah kơmơi pok pơhai ƀơi 5 boh tơring glông: An Lão, Vân Canh, Vĩnh Thạnh, Hoài Ân, Tây Sơn. Hơbô̆ bruă anai jai hrơi hơmâo pơgôp hrŏm prong amăng tơlơi thâo hluh mơ̆ng mơnuih ƀôn sang plơi pla, pơhlôm, pơgang kơ tơlơi taih čom amăng sang anŏ, biă mă ñu kiăng pơgang ba ƀing  đah kơmơi hăng čơđai muai đah kơmơi, ƀing mơnuih tơdu rơ-un amăng khul mơnuih mơnam. Yă Hoàng Thị Thanh Nhã, Kơ-iăng khua khul đah kơmơi mut phung tơring čar Bình Định brơi thâo:

“Boh tơhnal kiăng ngă mơ̆ng hơdră anai kiăng djru ba ƀing đah kơmơi mut phung hăng čơđai muai sit hơmâo tơlơi arăng taih amang amăng sang anŏ, kiăng hơmâo anih đuăi nao tơki, kơnang. Hơmâo sa boh anih gơñu dưi kah pơpha, pơdah thâo bruă ngă, tơlơi gơñu kiăng djru ba”.

Ƀơi Lai Châu, yă Nguyễn Thị Thủy, Kơ-iăng Khua Gơnong  wai lăng Bruă mă tơhan rơka hăng mơnuih mơnam tơring čar lăi: hăng akŏ anăn “Pơhlôm klă tơlơi hơdip mơda mơnuih mơnam, pơđĭ tui tơlơi dưi hăng ngă gêh găl kơ đah kơmơi hăng čơđai muai đah kơmơi, kiăng ngă tui djơ̆ tơlơi bơkơnar đah rơkơi hăng đah kơmơi laih anun lŏm lui hĭ tơlơi taih amang amăng sang anŏ, Jơnum min mơnuih ƀôn sang tơring čar Lai Châu hơmâo pơkra hơdră ngă tui bruă pơtrun mơ̆ng dêh čar brơi ngă bơkơnar đah rơkơi hăng bơnai amăng kual mơnuih ƀôn sang djuai ƀiă laih anun kual čư̆ siăng mơ̆ng thun 2022-2030 kiăng ngă anet ƀiă tơlơi pleh ploh bơlăng ba đah rơkơi hăng đah kơmơi, djru kơ ƀing đah kơmơi dưi ngă bruă hrup đah rơkơi amăng sang anŏ, ană plơi hăng mơnuih mơnam, dưi hơmâo tơlơi dưi ngă bruă kơđi čar, tơlơi hơdip mơda, gru grua hiam mơak, pơđĭ kyar bơwih ƀong huă, djru pơtrut bruă ngă pơđĭ kyar hrom amăng tơring čar:

“Amăng thun blan pơ anăp, amra pơphun lu hơdră pơtô pơblang, amăng anun đing nao pơtô hrăm amăng sang hră, sang bruă sĭ mơdrô, khul mơnuih mơnam plơi pla,boh nik ñu anăp nao pơ kual mơnuih ƀôn sang djuai ƀiă, hơdôm anih tơlơi thâo hluh mơnuih ƀôn sang dŏ kơƀah kơ bruă bơlăng ba đah kơmơi hăng đah rơkơi. Ƀing gơmơi amra pok pơhai tŭ yua hơdôm hơbô̆ bruă, anun lĕ plơi pla jĕ giăm mơak hăng rơnuk rơnua hơđong kơ čơđai đah kơmơi, sang hră rơnuk rơnua, mơak klă huăi hŭi taih čom, anih dŏ lăp đăo kơnang, sang dưi đuăi nao kơdop hơđong amăng plơi pla. Biă mă ñu, ƀing gơmơi ăt pơtrut pơđĭ kyar hăng pok pơhư prong hơbô̆ bruă, pơgăn laih anun pơhrŏ ƀiă tơlơi răm ƀăm taih amang yua kah pơpha đah rơkơi hăng đah kơmơi.