VOV4.Jarai-Mơguah lơ 19/7, ƀrô hơdor glăi tal 75 thun hrơi Tơhan rơka rơkač mơnuih djai pơsăn drơi jăn kơ lŏn ia, Anom bruă ping gah ling tơhan dêh čar, Ding jum ling tơhan jơnum bưp ƀô̆ mơta ƀing ngă hơkrŭ hăng sang anŏ mơnuih djai pơsăn drơi jăn kơ lŏn ia hlăk dŏ mă bruă amăng ling tơhan. Ƀơi mông bưp, Khua tơhan krên dên ơi Phan Văn Giang Khua ding jum ling tơhan mơ-it hiăp pơpŭ hiam hloh truh kơ ƀing neh wa amĭ Việt Nam khin hơtai, ƀing tơhan rơka rơkač, sang anŏ mơnuih pơsăn drơi jăn kơ lŏn ia hăng ƀing hlăk dŏ hrăm, mă bruă amăng đơ đam anom bruă gah ling tơhan.

Khua tơhan krên dên lăi, bruă hơdor tơngia tla pran laih anun jơlan hơdră djru ba mơ̆ng ling tơhan lăng kah hăng sa bruă mă yôm akŏ pơjing ping gah, bruă mă kơđi čar kơ ling tơhan. Truh ră anai, hơmâo rơbêh 130 rơbâo čô neh wa amĭ Việt Nam khin hơtai dưi pơpŭ hơmâo anăn djru ba. Abih bang ƀing neh wa amĭ Việt Nam khin hơtai dưi hơmâo djop tơring čar hăng puih kơđông ling tơhan rông ba. 5 thun rơgao, djop puih kơđông ling tơhan jak iâu khua mua, ling tơhan pơčruh hrom Keh prăk hơdor tơngia hơmâo rơbêh 400 klai prăk, man pơdong 4000 boh sang hơdor tơngia, rông ba 2.879 čô neh wa amĭ Việt Nam khin hơtai.

Nay Jek: Pơblang