VOV4.Jarai - Hơdôm hrơi anai, lu bruă wai lăng ba Tê̆t kơ mơnuih ƀon sang rin, neh met wa djuai ƀiă tơnap tap glăk hơmâo ngă ƀơi djŏp plơi pla ƀơi tơring čar Thừa Thiên Huế. Hơdôm gơnam tê̆t bă blai tơlơi khăp ƀu-eng djru ba neh met wa čơkă thun phrâo mơ-ak hloh. Tơlơi čih mơng pô hyu mă tơlơi pơhing phrâo mơng GPJPVN ƀơi tơring glông kual čư̆ siăng Nam Đông, tơring čar Thừa Thiên Huế.

Mut dŏ sang phrâo amăng hơdôm hrơi giăm Tê̆t Nhâm Dần, rơkơi bơnai amai Lê Thị Tốt ƀơi thôn 4, să Hương Hữu, tơring glông Nam Đông, tơring čar Thừa Thiên Huế lăng kar hăng rơpơi mơn. amăng hơdôm hrơi anai, rơkơi bơnai ñu khut khut kih rơmet, pơhrup sang dŏ, nao rai nao rai amăng sang phrâo, lăng ƀô̆ mơta klao hok biă mă. Hăng lu sang anŏ pơkŏn, bruă pơkra sang dŏ kâp 4 ƀu tơnap ôh, samơ̆ hăng sang anŏ amai Tốt, kiăng dưi hơmâo sang prong tui anai lĕ tơlơi ñu pơmin, tơlơi ñu hor kơtang kơtit. Amai Tốt ră ruai, rơkơi bơnai ñu pơdô̆ mơng thun 2008, truh thun 1010 lĕ trun dŏ hơjăn. Hơmâo neh met wa amăng plơi djru brơi kyâo, rơnap, đa brơi tôl, 2 rơkơi bơnai ñu pơdong sang kiăng hơmâo anih kơđap ƀơi hơjan hlim adai pơ-iă. Rơbêh hơpluh thun rơgao, prăk gơñu hyu mă bruă arăng, wơ̆t hăng prăk ñu ngă hơdôm sao mua dong, ñu lo brơi 2 čô ană ñu hrăm hră hai ăt ƀu djŏp mơn, ƀu pơmin nao ngă sang ôh. Yua hnun, lơ̆m hơmâo jơnum min djŏp djuai ania mơnuih mơnam tơring glông Nam Đông djru ba 40 klăk, rơkơi bơnai ñu čan mă dong 50 klăk pơkra sang dŏ kâp 4 prong, rơhaih. Amai Tốt ră ruai: “Hlâo adih sang anŏ gơmơi hơmâo sang dŏ anet, ber biă, lơ̆m hơjan kơthel lĕ juăt ƀlĕ, hơjan kơsăi, ƀu thâo dŏ ôh. Hơmâo kơnuk kơna djru ba tui anai gơmơi klao hok biă yơh. Thun anai čơkă tê̆t mơ-ak hloh kơ hơdôm thun hlâo laih”.

Ƀu kơnong sang anŏ amai Tốt đôč ôh hơmâo ƀong tê̆t amăng sang dŏ phrâo, hơdôm hrơi giăm âni, rơbêh 10 boh sang mơng Jơnum min djŏp djuai ania mơnuih mơnam tơring glông Nam Đông hăng hơdôm anom bruă, arăng djru ba ăt glăk ječ ameč pơkra mơn đah mơng tañ jao glăi kơ ană plơi giăm hrơi tê̆t. Rim boh sang hơmâo djru ba mơng 30 truh 60 klăk prăk; gong gai, neh met wa pơ anai djru pơkra brơi. Rơngiao kơ brơi sang dŏ kơ mơnuih hơmâo anăn kơnuk kơna djru,  sang anŏ ƀu hơmâo sang dŏ, gong gai plơi pla ƀơi anai ăt sem lăng, thâo rơđah tơlơi hơdip neh met wa tơnap tap yua klin Covid-19 ngă, sang anŏ rin, mơnuih ƀon sang bưp tơlơi truh lŏn adai ngă, klin kheng amuñ rơmon rơpa lơ̆m pơdai aka ƀu tơsă,..đah mơng hmao djru ba braih, gơnam ƀong huă, pơhlôm brơi rim sang anŏ lêng hơmâo ƀong tê̆t mơak soh. ơi Ta Rương Lương,  Kơ-iăng khua Jơnum min mơnuih ƀon sang să Hương Hữu, tơring glông Nam Đông, tơring čar Thừa Thiên Huế brơi thâo, hơdôm hrơi giăm truh Tê̆t hơmâo lu anom bruă, mơnuih juăt djru ƀing tơnap hơmâo nao čuă, brơi gơnam Tê̆t kơ mơnuih ƀon sang ƀơi anai:

“Bruă lăng ba hơdôm boh sang anŏ hơmâo anăn kơnuk kơna djru, sang anŏ rin, biă ñu lĕ sang anŏ mơnuih djuai ƀiă tơnap tap amăng hrơi tê̆t truh, Jơnum min mơnuih ƀon sang sang să hơmâo čih anăn, brơi gơnam tê̆t kơ ƀing kơnuk kơna juăt djru, sang anŏ rin, tơnap tap amăng plơi pla”.

Mơnuih ƀon sang să Hương Hữu, Nam Đông mă gơnam tê̆t Nhâm Dần.

Tơring glông Nam Đông, tơring čar Thừa Thiên Huế hơmâo rơbêh 27 čô mơnuih, amăng anun hơmâo 45% mơnuih ƀon sang djuai ƀiă. Kiăng pơhlôm brơi kơ neh met wa hơmâo ƀong Tê̆t mơ-ak, hrŏm hăng gơnam djru mơng Khua mir sir hăng mơng tơring čar Thưà Thiên Huế, Jơnum min mơnuih ƀon sang tơring glông Nam Đông ăt prăp lui rơbêh 4,5 tơn braih, 200 anung gơnam, rim anung hơmâo 500 rơbâo prăk brơi kơ sang anŏ tơnap.

Rơngiao kơ anun, lu anom bruă, mơnuih thâo pap kơ mơnuih tơnap tap ăt hơmâo nao čuă, brơi hơdôm rơtuh gơnam kơ mơnuih ƀu hiam drơi, rơwen rơwô, mơnuih rin, sang anŏ tơnap bơbeč yua klin Covid-19 ngă. Ơi Trần Quốc Phụng, Khua Jơnum min mơnuih ƀon sang tơring glông Nam Đông, tơring čar Thừa Thiên Huế brơi thâo:

“Ră anai hơmâo lu anom bruă, mơnuih juăt djru ƀing tơnap nao čuă, brơi gơnam kơ ƀing hơmâo anăn djru. Kiăo tui anun, gơmơi amra lăng glăi abih, kah pơpha gơnam brơi kơ hơdôm boh sang anŏ rin”.

Khul ia jrao kyâo bơrơkal mriah tơring čar Thừa Thiên Huế brơi gơnam tê̆t kơ mơnuih rơwen rơwô ƀu hiam drơi.

Hơdôm hrơi anai, hơmâo lu rơdêh pơgiăng hyu gơnam tê̆t, djă ba tơlơi khăp pap ba nao kơ mơnuih ƀon sang ƀơi tơring glông čư̆ siăng ataih yaih Nam Đông, A Lưới, tơring čar Thừa Thiên Huế. Tơlơi thâo pap, djru ba mơng mơnuih ƀon sang jing ba glăi bơyan bơnga pơđao pran jua laih hăng rim boh sang. Ơi Nguyễn Thanh Bình, Kơ-iăng khua jơnum min mơnuih ƀon sang tơring čar Thừa Thiên Huế brơi thâo: tơring čar lăng ba djru kơ ƀong hơmâo anăn djru, sang anŏ rin hăng mơnuih djuai ƀiă kiăng neh met wa mơ-ak mơ-ai hơmâo ƀong tê̆t trơi pơđai ƀiă.

“Amăng hrơi mông klin kheng ăt dŏ kơtang mơn, hơdôm boh sang anŏ hơmâo kơnuk kơna juăt djru, sang anŏ rin hăng mơnuih ƀon sang djuai ƀiă bưp lu tơlơi tơnap laih, kơƀah gơnam ƀong huă. Gơmơi ăt lăng ba đah mơng djru ba neh met wa amăng bơyan ƀong tê̆t. Rơngiao kơ anun dong, tơring čar ăt lăng glăi abih bang hơdôm boh sang anŏ rin, sang anŏ juăt hơmâo kơnuk kơna djru, sang anŏ djuai ƀiă ƀơi tơring glông A Lưới hăng Nam Đông laih anun jao bruă kơ Jơnum min mơnuih ƀon sang tơring glông A Lưới hăng Nam Đông djru brơi tañ kiăng neh met wa ƀong tê̆t trơi pơđao yâo mơ-ak”

Siu H’Mai: Pơblang