Tơkeng ra hăng hơdip truh prong amăng plơi pla hơmâo gru grua ngă hơkrŭ ƀơi Nghệ An, ayong Hoàng Ngọc Linh tơkeng thun 1982, tơdơi kơ hrăm giong gưl tlâo, ñu čih anăn nao ngă tơhan. Giong 2 thun ngă tơhan, ñu kiăo tui hrăm ƀơi sang hră cao đẳng Quân y 2 ƀôn prong Hồ Chí Minh. Hrăm giong mă ƀăng, ñu glăi mă bruă ƀơi anom bruă git gai tơhan wai pơgang guai tơring čar Gia Lai. Thun 2018, ayong Hoàng Ngọc Linh hơmâo jao bruă ƀơi puih tơhan wai pơgang guai Ia R’vê, tơring glông Ea Súp, tơring čar Dak Lak, ñu djru gah bruă khăm pơjrao ling tơhan mơnuih ƀon sang, ngă tui bruă khăm pơjrao brơi ƀing apăn bruă, ling tơhan hăng mơnuih ƀon sang amăng să. Thượng úy Hoàng Ngọc Linh brơi thâo.

“Ƀơi kual giăm guai anai amăng bơyan hơjan hlim juăt ƀuh duam đung drah; mơ̆ bơyan không phang juăt čroh kian, ruă tui jơlan suă jua…hăng rĭm hrơi hơmâo mơng 10-15 čô mơnuih nao khăm hăng lêng pơjrao suaih soh. Rĭm thun jŭ yap glăi hơmâo rơbêh 4.000 čô mơnuih nao pơjrao hmao tlôn. Mah lu mơnuih duam ruă samơ̆ bruă khăm pơjrao hơmâo adơi ayong lêng hok mơ-ak ngă pơgiong. Hrŏm hăng abih pran khăm pơjrao, adơi ayong ăt pơtô pơblang kiăng mơnuih ƀon sang ngă tui bruă rơmet pơagaih jum dar sang, ƀong mơñum brơi tơsă… kiăng pơhlôm brơi tơlơi suaih pral”.

Ơi Vi Văn Ngút 67 thun, dŏ ƀơi ƀut plơi 5, să Ia R’vê, tơring glông Ea Súp brơi thâo, plơi pla ataih mơng tơring glông Ea Súp rơbêh 60 km, jơlan nao rai tơnap tap, biă mă ñu amăng bơyan hơjan hlim. Mơng hrơi hơmâo anom bruă khăm pơjrao gah ling tơhan wai pơgang guai Ia R’vê, mơnuih ƀon sang huăi nao ataih kiăng khăm pơjrao dong tah. Ƀu djơ̆ kơnong tui anun, ling tơhan ăt nao tơl sang kiăng kơ khăm pơjrao brơi ƀing mơnuih tha rơma, ƀing ruă kraih … Ăt yua hơmâo anom bruă khăm pơjrao anai hăng ơi ia jrao Hoàng Ngọc Linh, ƀing mơnuih hơmâo tơlơi ruă kraih kar hăng rơkơi bơnai ñu dưi pơjrao suaih. Ơi Vi Văn Ngút brơi thâo:

“Bơnai kâo ruă tơlang rŏng kơtang biă mă, sang ia jrao lăi ƀu dưi pơjrao suaih ôh, yua anun ñu ƀu dưi rơbat nao rai. Lơ̆m hmư̆ hing ƀơi anom bruă khăm pơjrao gah ling tơhan hơmâo ơi ia jrao Linh dưi tlâ̆o pơjrao brơi tơdơi anun kâo ba ñu nao pơjrao. Pơjrao giăm 18 hrơi, bơnai kâo ăt plai ƀiă yơh, dưi nao rai, Sang anŏ gơmơi hok mơ-ak biă mă”.

Ia R’vê lĕ să giăm guai ataih mơng tơring glông Ea Súp, hăng 6.800 čô mơnuih mơng 28 djuai ania dŏ hơdip hrŏm. Tơlơi bơwih ƀong huă tơnap tap ngă kơ bruă bơwih brơi tơlơi suaih pral ƀu pơhlôm ôh. Tui ơi Lê Văn Hoàng Lâm - Khua Jơnum min mơnuih ƀon sang să Ia R’vê, hơdôm thun giăm anai, anom bruă khăm pơjrao ling tơhan hăng mơnuih ƀon sang mơng Puih tơhan wai pơgang guai Ia R’vê hơmâo ngă klă amăng bruă khăm pơjrao brơi mơnuih ƀon sang kual giăm guai. Kơnong Thượng uý Hoàng Ngọc Linh hơmâo lu mơnuih kiăng khăp.

“Ayong Hoàng Ngọc Linh lĕ ơi ia jrao abih pran jua hăng bruă khăm pơjrao brơi mơnuih ƀon sang. Rĭm wŏt neh met wa rơkâo, mah mơmŏt mlăm tlam mơguah ƀudah ataih ñu lêng kơ nao djru mơnuih ƀon sang. Hrŏm hăng bruă khăm pơjrao, ñu ăt pơtô pơblang bruă pơgang klin Covid-19 ba glăi tơlơi đăo gơnang mơng mơnuih ƀon sang”.

Hăng tơlơi gir run amăng bruă mă, Thượng úy Hoàng Ngọc Linh hơmâo djop gưl, gơnong bruă jao hră pơpŭ. Samơ̆ hăng ñu pô, tơlơi ngă hok mơ-ak hloh lĕ hơmâo mơnuih apăn bruă, mơnuih ƀon sang djop djuai ania đăo gơnang, gum hrŏm man pơdong kual giăm guai jai hrơi hiam klă.