VOV4.Jarai - Ding jum wai lăng mơnuih mă bruă, tơhan rơka ruă hăng mơnuih mơnam dêh čar ta glăk mă tơlơi gum pơhiăp hơdôm ding jum, gơnong bruă kiăng lăi pơthâo hăng Khua dêh čar ba tơbiă pơdơi Tết tui phiăn juăt hăng pơdơi Hrơi pơdŏng lŏn ia thun 2023. Rơđah biă ñu Ding jum wai lăng mơnuih mă bruă, tơhan rơka ruă hăng mơnuih mơnam dêh čar ta ba tơbiă dua jơlan gah pơdơi Tết tui phiăn juăt djuai ania thun 2023. Jơlan gah 1: Pơdơi 5 hrơi tui tơlơi pơkă, amăng anun hmâo 2 hrơi pơdơi hlâo kơ Tết hăng 3 hrơi tơdơi kơ Tết, hrom hăng 2 hrơi pơdơi pơ ala glăi hrơi pơdơi rim rơwang hrơi tơjuh, abih bang lĕ 7 hrơi. Jơlan gah 2: Pơdơi 5 hrơi tui tơlơi pơkă, amăng anun sa hrơi hlâo kơ Tết hăng 4 hrơi tơdơi kơ Tết, hrom hăng 2 hrơi pơdơi pơ ala nao hăng 2 hrơi pơdơi rơnuč rơwang hrơi tơjuh jing 9 hrơi pơdơi. Amăng 2 jơlan gah anai, Ding jum wai lăng mơnuih mă bruă, tơhan rơka ruă hăng mơnuih mơnam dêh čar ta ba tơbiă ruah tal pơdơi Tết Quý Mão thun 2023 tui jơlan gah sa kiăng mrô hrơi pơdơi ƀu sui đơi (7 hrơi), hrom hăng anun pơhlôm djơ̆ nao hrom hrơi pơdơi hlâo hăng tơdơi kơ Tết./.

Siu H’ Prăk: Pơblang