Ƀơi mông bưp ƀơi Đơn Dương, mơnuih ƀôn sang ruah khua tơring glông Đơn Dương hok mơ-ak hơmâo pran biă hăng hơdôm tơlơi mơ̆ kơnuk kơna, plơi pla hơmâo ngă amăng hrơi blan rơgao. Biă ñu amăng bruă pơgăn hưp ham ƀong kông ngăn hơmâo lu boh than klă, brơi ƀuh pran jua mă bruă rơđah rơđông, khut khăt mơ̆ng Ping gah, tơlơi phiăn mơ̆ng kơnuk kơna. Tui hăng tơlơi lăi pơthâo glăi ƀơi hơdôm anih bưp, amăng 9 blan akŏ thun 2023, bruă pơgang, pơgăn hưp ham ƀong kông ngăn kơnuk kơna ƀơi tơring čar Lâm Đồng hơmâo pơplih lu, tŭ yua biă. Tơring čar hơmâo ngă 129 wơ̆t hyu hơduah tơña sem lăng hră pơ-ar hăng giăm 1500 wơ̆t hyu hơduah ĕp sem lăng kiăo tui rim bruă mă. Mơ̆ng bruă hơduah ĕp sem lăng hră pơ-ar, hơmâo ƀuh ngă soh hăng mrô prăk 7,8 klai prăk; ngă hră pơhrui glăi, bơtơhmal pô ngă soh hăng mrô prăk 10 klai prăk; rơkâo kiăng pơplih glăi klă, pơsir hĭ hơdôm tơlơi aka ƀu djơ̆ amăng bruă hyu hơduah ĕp, pơsir hĭ lăp djơ̆ hơdôm bruă ngă soh tui hăng tơlơi phiăn. Mơ̆ng bruă hơduah ĕp, sem lăng hơmâo 11 bruă ƀong ngăn kơnuk kơna hơmâo ƀuh hăng glăk pơsir tui tơlơi phiăn; hơmâo 18 tơlơi soh bơdjơ̆ nao bruă hưp ham mơ̆ng thun hlâo. Mơnuih ƀôn sang rơkâo čih pơkra glăi Tơlơi phiăn lŏn tơnah rơđah hloh, lăp djơ̆ hăng rim kual, klă hloh kơ mơnuih ƀôn sang; Kơ anih anom, jơlan nao rai, kiăng wai lăng kơjăp hloh, lăng ba bruă pơgang ia dăo biă ñu amăng bơyan hơjan kơthel truh.

Ƀơi mông bưp, ƀing nai, čơđai sang hră mơ̆ng Sang hră Đại học Đà Lạt hơmâo rơkâo lu tơlơi bơdjơ̆ nao bruă pơtô hrăm, prăk blan, prăk brơi thim kơ ƀing nai, djru brơi ƀing čơđai hơmâo bruă mă tơdơi kơ hrăm giong, ngă hră pơ-ar brơi prăk kơ hơdôm ring bruă kơsem min boh thâo ia rơgơi...ăt hơmâo lu tơlơi aka ƀu rơhuaih. Amăng anun, yôm biă ñu lĕ bruă čơđai sang hră gưl prong, čơđai kơsem min boh thâo hor kơ bruă kơsem min boh thâo ia rơgơi jai hrơi aset tui.

Tui hăng ơi Lê Minh Chiến, Khua sang hră Đại học Đà Lạt, tal ruah čơđai hrăm thun anai sang hră Đại học Đà Lạt pơhưč hơmâo 2.800 čô čơđai tui hrăm amăng djŏp bruă, amăng anun mrô čơđai sang hră, čơđai kơsem min boh thâo hơmâo hrăm gưl prong hăng gưl prong hloh hăng tơlơi hrăm boh thâo ia rơgơi kah hăng Toán, Lý, Hoá...aset biă, tap năng hơmâo thun hrăm kơnong kơ 2 - 3 čô đôč čih anăn rơkâo hrăm. Phun ñu lĕ hơdră djru mơ̆ng Kơnuk kơna hăng bruă hrăm anai aka ƀu prong či pơtrut pran jua, pơsur ƀing rơgơi.

“Ping gah, Kơnuk kơna hăng khua mua pơ ala mơnuih ƀôn sang dêh čar kiăng lăng ba hloh dơ̆ng hăng hơdôm hơdră djru kơ ƀing nai pơtô, ƀing kơsem min boh thâo ia rơgơi hăng čơđai sang hră dưi hơmâo hơdră djru tui hăng bruă pơtô ngă nai. Bruă pơtô ngă nai ră anai rơngiao kơ huăi mă prăk hrăm lĕ ăt hơmâo djru prăk ƀong huă lu hloh kơ mơnuih phrâo tơbiă mă bruă”.

Hơmâo đa pơgôp hiăp kiăng pok prong keh prăk pơđĭ kyar boh thâo ia rơgơi dêh čar, đah mơ̆ng huăi pơgao lui tơlơi pơmin pơčeh phrâo tơlơi rơgơi, ƀu pơhưč hăng ƀu pok brơi jơlan pơčeh phrâo ia rơgơi mơ̆ng mơnuih rơgơi hră; sem lăng pơkă sui ƀiă dong thun pơdơi lơtret kơ ƀing nai pơtô gưl prong; amăng anun hơmâo Sang hră Đại học Đà Lạt. Yua sit biă ñu, kiăng pơhrư̆i sui thun mă bruă khŏm hơmâo ƀang nai pơtô yôm, lơ̆m anun kiăng hơmâo ƀang nai pơtô yôm lĕ hrơi mă bruă abih laih, anai jing tơlơi hơmâo sit ƀơi kual Dap Kơdư, kual Yŭ Dơnung lêng kơ tơnap soh. Lu mơnuih dưi ruah khua lĕ ƀing čơđai sang hră rơkâo brơi prăk kơ bruă pơtô ngă nai kaih pơhmu hăng tơlơi kiăng sit nik; rơkâo djru bruă mă brơi kơ čơđai sang hră, biă ñu hăng čơđai sang hră djuai ƀiă, yua dah ră anai tơdơi kơ hrăm giong, lu mơnuih ƀu hơmâo bruă mă, tơlơi hơdip tơnap biă. Pơ ala kơ khua mua pơ ala mơnuih ƀôn sang dêh čar tơring čar Lâm Đồng, ơi Phan Đình Trạc tŭ yap, djă pioh hơdôm tơlơi rơkâo mơ̆ng mơnuih ƀôn sang, laih dong brơi thâo amra lăi pơthâo glăi hăng khua mua pơ ala mơnuih ƀôn sang amăng hrơi jơnum lok 6 pơ anăp.

“Ngă hiư̆m pă kiăng ƀing čơđai hor kơsem min boh thâo ia rơgơi, laih anun ƀing nai pơtô hai hor mơn. Ngă hiư̆m pă kiăng tơlơi ta hor dưi ngă, pơhlôm brơi tơlơi hơdip mơ-ak ƀiă, dơnap ƀiă, tơdah ƀu pơhlôm klă tơlơi hơdip ƀing ta ngă bruă ƀu jing ôh. Anai jing tơlơi kiăng kơnuk kơna jŭ yap khŏm ngă”.

Khua anom bruă pơgăn hưp ham ƀong kông ngăn Kơnuk kơna ăt pơtă kơ tơring čar Lâm Đồng hăng plơi prong Đà Lạt kiăng pơƀut pơhmư̆ hơdôm tơlơi pơgôp hiăp abih bang, djơ̆ lăp, kiăng hơmâo hră sem lăng boh thâo ia rơgơi rơđah rơđông bơdjơ̆ nao bruă tơhlŏm lŏn, tơhroh, pơčah jơlan čun čoe, sang dŏ, bơdjơ̆ nao bruă čuk pơkra mơ̆ng plơi prong Đà Lạt hrơi blan rơgao. Bruă lui abih sang mơnil amăng tơjŭ pla; hơdră djă pioh răk rem gru grua pơkra anih dŏ mơ̆ng hlâo; bruă pơgang glai kyâo hơngo, pơđĭ kyar bơwih ƀong gah yŭ phun kyâo glai....jing hơdôm tơlơi kiăng abih bang mơnuih gum ngă, ƀu djơ̆ jao kơ hơjăn păn pô hlơi drơi pơpă ôh. Ƀrô tal anai, ơi Phan Đình Trạc hrŏm hăng grup khua pơ ala mơnuih ƀôn sang dêh čar tơring čar Lâm Đồng hơmâo brơi 20 anung gơnam, rim anun hơmâo 10 klăk prăk kơ čơđai sang hră hrăm ƀơi sang hră Đại học Đà Lạt sang anŏ tơnap tap samơ̆ gir hrăm rơgơi./.