Yua hơmâo akŏ bruă mrô 8 amai Châu Thị Ngọc Điệp dŏ amăng plơi Đại Nghĩa Thắng, să Đại Tâm hơmâo mut hrŏm amăng lu bruă pôr pơhing amăng ƀon lan. Mơng anun, ñu hơmâo pơtô pơblang brơi hơdôm boh sang anŏ jum dar thâo hluh hăng hrưn đĭ tơlơi pơmĭn amăng bruă wai pơgang, bơwih brơi đah kơmơi hăng ƀing čơđai.

“Lơm kâo mut hrŏm akŏ bruă mrô 8, kâo ăt pơtô pơblang brơi neh met wa anăm brơi ƀuh bruă taih amăng sang anŏ kar hăng hlâo adih dong tah, wai pơgang brơi đah kơmơi hăng ƀing čơđai amăng ƀon lan”.

Akŏ bruă mrô 8 hơmâo pok pơhai ƀơi 3 boh plơi pla tơnap tap hloh amăng tơring glông Mỹ Xuyên. Anai lĕ plơi Đại Nghĩa Thắng; plơi Sóc Bưng, să Thạnh Phú hăng plơi Phú Giao, să Thạnh Quới hăng lu bruă mă sit nik hơmâo ngă hăng glăk ngă. Amai Dương Thị Mỹ Nhiên, Khua khul đah kơmơi plơi Phú Giao, să Thạnh Quới, tơring glông Mỹ Xuyên, tơring čar Sóc Trăng brơi thâo:

“Pơ anăp anai, Khul đah kơmơi plơi Phú Giao, să Thạnh Quới amra gum hrŏm klă hloh hăng khul gưl glông hăng djop gưl, gơnong bruă bơdjơ̆ nao, ngă tui klă hơdôm bruă jao mơng akŏ bruă mrô 8. Anai lĕ sa amăng hơdôm hơdră bruă pơprong, yôm phăn bơdjơ̆ nao đah kơmơi hăng čơđai, anăp nao hơnong pơkă bơkơnar đah rơkơi đah kơmơi hăng đing nao pơsir hĭ klă hloh sa, dua bruă kiăng ngă hloh mơng đah kơmơi hăng čơđai kual mơnuih djuai ania ƀiă”.

Amăng thun blan rơgao, Khul pơlir đah kơmơi tơring glông Mỹ Xuyên đing nao 3 boh tơhnal phun. Anai lĕ bruă pơtô pơblang, pơtrut pơsur pơplih tơlơi pơmĭn bruă mă, pơgôp lui hĭ hơdôm tơlơi pơmĭn sat hăng lăng phara kơ bruă bơkơnar đah rơkơi đah kơmơi amăng sang anŏ hăng plơi pla, hơdôm phiăn juăt ƀu klă hiam hăng sa, dua bruă kiăng ngă brơi đah kơmơi hăng čơđai; pơjing hăng pok prong hơdôm hơbô̆ bruă pơplih tơlơi pơmĭn bruă mă, hrưn đĭ tơlơi dưi amăng bơwih ƀong brơi đah kơmơi; pơtrut bơkơnar đah rơkơi đah kơmơi hăng pơsir hĭ hơdôm bruă kiăng hloh brơi đah kơmơi hăng čơđai; pơhlôm brơi boh pơhiăp hăng tơlơi mut hrŏm sit nik mơng đah kơmơi hăng čơđai amăng bruă pơđĭ kyar bơwih ƀong huă mơnuih mơnam amăng plơi pla, krăo lăng hăng lăi glăi, gum djru đah kơmơi mut hrŏm mă bruă amăng anih anom kơđi čar. Yă Trần Hồng Ni, Khua Khul pơlir hơbit đah kơmơi tơring glông Mỹ Xuyên, tơring čar Sóc Trăng brơi thâo:

“Kiăng ngă tui klă akŏ bruă mrô 8, Khul pơlir hơbit đah kơmơi tơring glông Mỹ Xuyên kơtưn amăng bruă pơtô pơblang, pơjing hơdôm hơbô̆ bruă lăp djơ̆ hăng tơlơi sit nik mơng ƀon lan hăng pơsir hĭ khut khăt bruă bơkơnar đah rơkơi đah kơmơi amăng hơdôm bruă hăng đah kơmơi hăng čơđai đah kơmơi kual mơnuih djuai ania ƀiă, lui hĭ tơlơi pơmĭn soh glăi, tơlơi phiăn ƀu klă hiam, pơgôp amăng pơđĭ kyar hrŏm amăng plơi pla”.

Tơdơi kơ pok pơhai akŏ bruă mrô 8, bruă bơkơnar đah rơkơi đah kơmơi kơ tơlơi dưi pơtô hrăm, bruă mă, bơwih brơi tơlơi suaih pral kơ đah kơmơi ƀơi Sóc Trăng hơmâo pơplih; sit biă ñu lĕ đah kơmơi kual ataih, asuek, kual mơnuih djuai ania ƀiă. Tơlơi gơgrong, kơdrưh ang mơng đah kơmơi jai hrơi pơsit tong amăng djop mơta bruă amăng mơnuih mơnam hăng sang anŏ. Bruă pơčlah đah rơkơi đah kơmơi hơmâo pơplih tong ten, đah rơkơi hăng đah kơmơi lêng kơ djru brơi jai hrơi klă tui. Tui mrô jŭ yap truh rơnuč thun hlâo, đơ đam tơring čar hơmâo 109 boh să, phường, tơring kual hơmâo hơbô̆ bruă pơgăn taih amăng sang anŏ hăng giăm 180 grup, giăm 650 grup pơgang, pơgăn taih amăng sang anŏ, rơbêh 800 anih gơnang nao amăng plơi pla, giăm 850 glông telephôn iâu ječ./.