Anih pơtô hrăm phara Pandur, ƀơi plơi Xuân An 2, să Bắc Bình, tơring čar Lâm Đồng (gah tơring glông Bắc Bình, tơring čar Bình Thuận hơđăp) - anih glăk mă yua hơdră djru ba lu čơđai akŏ dlô ƀu hơđong, ngui ƀu thâo phô, ngui hơjăn, ƀu hiăp hơbit tom arăng laih anun tơnap biă amăng bruă hrăm, ngă añrăng drơi jăn laih anun mut ngui tom hăng ƀing čơđai pơkŏn. Nai Thanh Thị Hằng, pô mă bruă pơ anai mơ̆ng blung a mơtăm ră ruai, pơ anai ƀu kơnong jing anih mă bruă đôč ôh, jing sang ñu hlao yơh: “Hăng ƀing čơđai dŏ dŏng ƀu hơđong, ngui hơjăn, ƀu thâo hiăp hơbit tom arăng, akŏ dlô ƀu hơđong, jing bruă pơtô ƀing gơñu tơnap hloh hăng čơđai pơkŏn. Anun jing tơlơi ngă kâo gir hloh djru ba ƀing čơđai dŏ hrŏm hăng Sang hră či hrăm thâo tui, kiăng pơtô brơi ƀing ñu djơ̆ lăp, djru ƀing čơđai dưi dŏ hrŏm hăng gơyut gơyâo pơkŏn. Anun jing tơlơi mơak prong mơ̆ng kâo mơn”.

Bơ hăng nai neh Lư Thị Mỹ Viên, tơlơi ngă ñu mơak hloh lĕ lơ̆m lăng ƀing čơđai pơplih tui rim hrơi: “Tơlơi djru kâo dưi găn rơgao tơnap tap lĕ lơ̆m pơtô glăi hơdôm tơlơi mơ̆ čơđai ñu hmư̆ hăng hla tui. Pơhmutu, kao lăi ih mă brơi ia mơñum kơ nai, čơđai ñu thâo laih anun nao mă hlao. Giong anun, hơmâo mơn čơđai thâo krăn ƀơi jĕp ñu, ƀudah đĭ rơdêh lĕ dŏ gah tlôn. Yom hloh lĕ djru ƀing čơđai huăi ngă bruă hŭi rơhyưt, laih anun jai hrơi thâo pơmin tui”.

Nai pơtô ƀơi anom bruă khŏm bưp tơlơi glêh tơnap ƀơ̆i yơh, laih anun khŏm kiăng gir hloh, yua dah bruă pơtô hrăm phara hơjăn kơ ƀing čơđai drơi jăn ƀu klă, akŏ dlô ƀu hơđong, čơđai tơngil tơngôk, kơmlô kơbao, ƀu thâo rơbat hyu. Rim čô nai mah hnưr thun phara, tơlơi hơdip sang anŏ phara mơn, samơ̆ lơ̆m kiăo tui bruă pơtô hrăm phara anai, gơñu hơmâo anŏ djơ̆ hrŏm lĕ khăp kơ čơđai prong, lui tơlơi hơdip jơnap mơ̆ng pô, tŭ ư tơnap tap, tơlơi lông lăng, laih anun hơmâo sa tơlơi pơmin khut gir hăng bruă anai sui thun.

Nai neh Nguyễn Thị Bích Thuỷ, pô akŏ pơdong Anih pơtô hrăm anai brơi thâo, lơ̆m dŏ hrăm hră, ñu ƀuh lu mơnuih hơmâo tơlơi ruă kah hăng: ƀu hiăp hơbit jing ƀu hor hrăm hră, dŏ dŏng ƀu hơđong, tơkai tơngan ngor na nao, hiăp ƀu thâo...Hăng tơlơi pơmin gir djru ba čơđai tañ ƀiă kiăng gơñu dưi mut hrŏm hăng abih bang čơđai pơkŏn, jing ñu akŏ pơdong Anom bruă anai: “Kâo ƀuh laih mơn tơlơi kiăng ƀơi plơi pla kơ čơđai ƀu hiăp hơbit, tơkai tơngan ƀu hơđong, akŏ dlô kaih prong, samơ̆ ƀu hơmâo anŏ gêh găl či pơjrao brơi tañ, djơ̆ tui hăng ƀôn prong Hồ Chí Minh adih. Hrŏm hăng anun, lu amĭ ama ƀing čơđai ƀu thâo hluh đơi ôh kơ tơlơi ruă mơ̆ng ană bă ƀing ñu. Pô kâo lĕ nai pơtô, kâo kiăng djă ba hơdôm tơlơi kâo thâo, tơlơi kâo hơmâo hrăm ƀơi ƀôn prong Hồ Chí Minh glăi pơ anai djru ba ƀing čơđai”.

Lơ̆m phrâo akŏ pơdong, Anom bruă kơnong hơmâo hơdôm čô đôč ba ană bă nao hrăm. Tơdơi kơ anun, hăng anŏ tŭ yua bruă pơtô hrăm mơ̆ng Anom bruă, lu sang anŏ ană ƀu thâo pơhiăp, ƀu hiăp hơbit tom arăng, ngui ƀu hơđong...jing ba ană bă nao pơ Anom bruă kiăng hơmâo djru ba lăp djơ̆. Amai Đào Thị Thanh Xuân brơi thâo, yua hơmâo ƀing nai pơ anai pơtô brơi, djru ba tañ, ră anai ană ñu huăi dong tah, dưi ngui tom čơđai pơkŏn laih: “Bruă djru ba, mơ̆ng tơlơi pơtô ba mơ̆ng sang hră mơguah truh tlam, truh kơ nai pơtô hơjăn ñu, jing ană kâo ră anai hrăm anih sa laih. Ră anai ñu kar hăng ƀing gŏp ñu mơn. Pơhmutu, lơ̆m arăng bưp ñu, arăng ƀu pơmin ôh ñu hơmâo tơlơi ruă djơh anun tơdah kâo ƀu ră ruai, jing arăng pơmin ñu tui hăng čơđai pơkŏn mơn. Ƀing nai juăt pơtô brơi, alum na nao, laih anun hăng tơlơi gir run mơ̆ng ƀing nai, anun yơh ană kâo ñu prong, hiam, kjăp drơi jăn laih”.

Truh ră anai Anom bruă pơtô phara Pandur glăk hơmâo 43 čô čơđai hăng 2 anih hrăm. Hơmâo čơđai đa kraih 2 thun đôč, ăt hơmâo mơn đa rơbêh 5 thun, rim čô čơđai ñu hơmâo anŏ ruă phara, tơdu kơtang phara mơn. Laih anun tơdơi kơ 6 blan truh 1 thun, đa 2-3 thun, jing ƀing čơđai plai laih.

Nao čuă hăng brơi gơnam pơpŭ kơ Anom bruă, ơi Trương Mai Mạnh, Khua hlăk ai Jơnum min djŏp djuai ania mơnuih mơnam Việt Nam tơring čar Lâm Đồng pơpŭ biă kơ mơnuih ngă bruă pơtô hrăm phara tui anai - ƀing “nai pơtô phara hơjăn” wai lăng ƀing čơđai sit hăng pran jua hơtai boh khăp ƀu-eng, lui sang anŏ, lui drơi pô ñu mơtăm: “Bruă pơtô čơđai anih muai jing bruă yom yơh, samơ̆ hăng ƀing nai pơ anai lĕ gơñu gir hloh hơdôm wơ̆t dong pơhmu hăng ngă nai pơtô anih muai pơkŏn. Yua dah čơđai pơ anai akŏ dlô ñu ƀu hơđong, ƀu thâo hiăp hơbit, nge ngo ƀu thâo phô, ƀing gơñu ƀu thâo hơdư̆ ôh bruă gơñu ngă, jing ƀing nai khŏm gir kơtang biă đah mơ̆ng dưi pơtô”.

Ră anai, hơdră djru tơlơi phiăn kơ bruă pơtô čơđai ƀu thâo phe phô, ƀu thâo hiăp hơbit dŏ lu tơlơi tơnap. Prăk djru ba nai pơtô čơđai hơmâo tơlơi ruă anai dŏ aset mơn. Samơ̆, ƀing nai pơ anai ăt gir mơn, rim hrơi tŭi rơđah bơngač, ba nao tơlơi khăp ƀu-eng, brơi nao tơlơi čang rơmang phrâo, hăng tơlơi hơdip hiam hloh pơ anăp./.