Rơbêh 70 thun laih, tha plơi Ayun Y Hmoan ăt gir ngă bruă amăng Jơnum min djŏp djuai ania mơnuih mơnam ƀơi ƀuôn Tri Gha, să Ea Drăng, tơring čar Dak Lăk. Rim hrơi, ñu ăt nao re se mơn pơ hơdôm boh sang anŏ kiăng thâo rơđah tơlơi hơdip mơda amăng plơi, mơ̆ng bruă ngă hmua truh bruă bơwih ƀong ĕp prăk kăk mơ̆ng hlăk ai.

Krăp lăng mông Jơnum ruah khua jơnum min djŏp djuai ania mơnuih mơnam Việt Nam tal XI amăng brô̆, amăng tivi, ơi Y Hmoan čang rơmang, Jơnum min djŏp djuai ania mơnuih mơnam djŏp gưl rơwang bruă phrâo amra pơƀut pơplih hơdră ngă bruă, wai lăng klă tui, pơgôp hiăp hơmâo amăng mơnuih tơpuôl. Hăng plơi pla kual čư̆ siăng, kual ataih, plơi pla mơnuih djuai ania ƀiă, kiăng hơmâo thim tơlơi pơgôp hiăp mơ̆ng Jơnum min djŏp djuai ania kiăng hơdôm jơlan hơdră hơmâo pok pơhai tŭ yua, sit nik hloh. Tui hăng tha plơi Y Hmoan, bruă kiăng pơđing hmư̆ mông anai lĕ djru bơwih ƀong, ĕp brơi bruă mă kơ hlăk ai amăng plơi pla:“Kâo mơak biă yua dah mơnuih ƀôn sang leng kơ hla tui klă djŏp tơlơi pơtrun, hơdră ngă bruă mơ̆ng Ping gah hăng Kơnuk kơna, yua anun mơn amăng plơi hơđong, yâo mơak biă. Neh met wa ră anai čang rơmang hloh lĕ plơi pla hơđong, thâo bơwih ƀong, ană bă hơmâo bruă mă, bơwih ƀong đĭ kyar”.

Jing kual bơwih ƀong kơnang kơ bruă ngă hmua đôč yơh lu, mơnuih ƀôn sang tơring čar Dak Lăk ăt čang rơmang Jơnum min djŏp djuai ania mơnuih mơnam djŏp gưl hăng tơlơi gơgrong pơ ala brơi tơlơi pơhiăp mơ̆ng mơnuih ƀôn sang, amra hơmâo tơlơi rơkâo đĭ lăp djơ̆ hăng Khua mua pơ ala mơnuih ƀôn sang, Kơnuk kơna đah mơ̆ng dưi ngă hơdôm tơlơi djru gah bruă ngă hmua, mơnuih ngă hmua hăng plơi pla.

Hăng kual lŏn Dak Lăk, bruă ngă hmua ăt bưp lu tơlơi rung răng, tơnap mơn yua pơplih anih mơdrô, ayuh hyiăng adai ƀu lăp, samơ̆ bruă ba sĭ gơnam mơ̆ng hmua, bruă pơhlom brơi bruă ngă hmua ăt aka ƀu hơmâo lăng ba lăp ôh. Yă H Wơn Kmăn, khua ƀuôn Knach, să Đăk Liêng, tơring čar Dak Lăk pơgôp hiăp:“Pơ anai tơlơi hơdip neh met wa ăt dŏ hơmâo lu tơlơi tơnap mơn, ƀing gơmơi ăt dŏ čang Jơnum min djŏp djuai ania mơnuih mơnam pơhmư̆ hơdôm tơlơi pơgôp hiăp mơ̆ng ană plơi gơmơi đah mơ̆ng pơthâo brơi, hơmâo tơlơi djru lăp djơ̆ hăng sang anŏ kơnuk kơna djru, mơnuih tơnap tap, djơ̆ djuam duam ruă, djru ruh hĭ sang dŏ tơ̆i, man brơi sang phrâo, djru brơi anah phun pla, đĭ kyar bơwih ƀong, hơđong tơlơi hơdip”.

Hrŏm hăng hơdôm bruă gah bơwih ƀong, ngă hmua pla pơjing, tơlơi hơdip mơda, krăp lăng Jơnum ruah khua Jơnum min djŏp djuai ania mơnuih mơnam Việt Nam tal XI, djŏp khul mơnuih ƀôn sang Dak Lăk ăt čang rơmang, hơdôm tơlơi kiăng khăp mơ̆ng plơi pla amra hơmâo pơhmư̆ djŏp, lăi pơthâo djơ̆ lăp, ngă jing hơdră djru djơ̆ hăng tơlơi kiăng.

Tui hăng ơi Lương Triều Dương, phường Tuy Hoà, tơring čar Dak Lăk, tơlơi yom hloh lĕ khul ngă khua amăng jơnum min, khua mua khŏm jê̆ giăm, thâo hluh hăng thâo pơhmư̆ tơlơi pơhiăp mơ̆ng mơnuih ƀôn sang:“Kâo čang rơmang sa tơlơi đôč, gơñu hiăp lĕ khŏm ngă dưi, khŏm jê̆ giăm ană plơi, nao hrŏm hăng ană plơi, thâo hluh, pơhmư̆ tơlơi pơgôp hiăp mơ̆ng ană plơi, kiăng pơkơdong glăi tơlơi hưp ham kông ngăn, ngă bruă ƀu djơ̆ hăng tơlơi ană plơi kiăng”.

Amăng hrơi mông ia rơgơi mrô glăk hơmâo mă yua kơtang, ƀơi lu plơi pla kual ataih mơ̆ng tơring čar Dak Lăk, hơdôm grup Zalo plơi pla glăk jing anih pơtruh brơi mơnuih ƀôn sang hăng gong gai laih anun Jơnum min djŏp djuai ania. Rơngiao kơ mông bưp ƀơi anăp, lu tơlơi pơgôp hiăp mơ̆ng mơnuih ƀôn sang hơmâo hmư̆ amăng telephôn, khul grup ƀudah ƀut boh thâo mrô. Mơ̆ng bruă jơlan răm rai, kơƀah ia yua truh kơ bruă ngă hră pơ-ar, lu tơlơi pơgôp hiăp rơkâo đĭ hơmâo mơit nao tañ hloh pơ gong gai.

Tui hăng ơi Phạm Văn Bảy, Kơ-iăng khua jơnum min djŏp djuai ania mơnuih mơnam Việt Nam tơring čar Dak Lăk, tơlơi kiăng pơplih hơdră pơtum, iâu pơthưr mơnuih ƀon sang glăk kiăng hloh hăng anom bruă jơnum min djŏp gưl, biă ñu pơ kual ataih, asuek, djuai ania ƀiă. Amăng anun bruă pơhmư̆ tơlơi pơgôp hiăp mơ̆ng plơi pla hăng mă yua ia rơgơi mrô jing tơlơi kiăng biă đah mơ̆ng mă bruă tŭ yua:“Kiăng dưi ngă tui anun ƀing ta khŏm mă yua ia rơgơi mrô, mă yua boh thâo či tum pơƀut djŏp tơlơi pơhing, pok pơhai bruă mă tañ, hmao kru, pơhmư̆ tơlơi pơgôp hiăp mơ̆ng mơnuih ƀôn sang, laih dong lăi pơthâo glăi hơdôm bruă mă akŏ phun kơ mơnuih ƀôn sang thâo, kiăng mơnuih ƀôn sang dưi čơkă mă bruă mă anun tŭ yua”.

Pơplih phrâo boh tơhnal, hơdră ngă bruă jê̆ giăm mơnuih ƀon sang, lăp đing nao kơtang pơ plơi pla, hăng mă yua ia rơgơi mrô glăk jing tơlơi kiăng ngă hăng Jơnum min djŏp djuai ania mơnuih mơnam Việt Nam rơwang bruă phrâo.Mơ̆ng tơlơi truh kih mơ̆ng mông Jơnum ruah khua jơnum min djŏp djuai ania mơnuih mơnam Việt Nam tal XI, mơnuih ƀôn sang Dak Lăk čang rơmang tơlơi pơhiăp mơ̆ng plơi pla amra hơmâo pơhmư̆ djŏp hloh, hơdôm tơlơi tơnap hơmâo lăi pơthâo tañ hloh laih anun hơdôm hơdră djru kiăo tui djơ̆ hăng tơlơi kiăng hloh./.