Ƀơi anih man pơdong Sang hră kơnuk kơna čem rông ană bă djuai ania ƀiă pơƀut gưl sa - gưl dua să Mô Rai, tơring čar Quảng Ngãi (hlâo adih lĕ să Sa Thầy, tơring čar Kon Tum), hơdôm rơtuh čô kĭ sư rơguăt bruă man pơdong, kông ñơn ăt mă bruă na nao đôč amăng hrơi pơdơi lơ 30/4 hăng 1/5. Hơdôm bruă ngă mơ̆ng klơi, man atur, gong tơmeh, tơtŏm atur sang, truh kơ man pơnăng hơmâo ngă hrŏm mơtăm yơh. Mah adai pơplih phara, hơmit pơ-iă hơmit hơjan, samơ̆ ƀing kông ñơn ăt ngă bruă na nao mơn. Ƀu ƀiă ôh mơnuih amăng plơi nao mă bruă, hơmâo thim prăk, laih anun djru man pơdong sang hră brơi ană bă ƀing gơñu mơn.

Ơi Nguyễn Văn Hồng (66 thun), dŏ pơ plơi Sộp, să Mô Rai, tơring čar Quảng Ngãi ngă bruă man sang hră giăm 2 blan anai laih. Bruă ñu ngă rim hrơi lĕ pơkra, dăp pơsơi či tuh pơtâo bê tông. Hăng ñu, bruă man pơdong ƀu kơnong bruă mă đôč ôh, ăt jing tơlơi ñu čang rơmang pơplih phrâo anih hrăm kơ ană amon pơ guai dêh čar: “Mơnuih mă bruă tui hăng gơmơi anai gir nao mă bruă yơh đah mơ̆ng tañ giong. Kâo rai ngă bruă pơ anai giăm 2 blan laih, mă mơ̆ng 6 mông 30 truh 5 mông tlam. Kâo ngă bruă hăng tơkai tơngan đôč, ngă rim hrơi mơtăm yơh. Mơnuih ƀôn sang pơ guai anai čang rơmang sang hră tañ giong, kiăng ană bă hơmâo anih hrăm klă hloh”.

Hrŏm hăng mơnuih man pơkra, ƀing apăn bruă pơtô man, krăp lăng hơmâo 8 čô mơnuih, ƀing ñu ăt ngă bruă truh abih hrơi pơdơi mơtăm, kiăo tui rim črăn bruă, mơ̆ng bruă man blung a, truh kơ ngă giong mơtăm.

Bruă man pơdong Sang hră Kơnuk kơna čem rông gưl sa - gưl dua pơlir hrŏm să Mô Rai hơmâo prăk tuh pơ alin rơbêh 255 klai prăk, hrơi man pơdong 215 hrơi. Truh ră anai, bruă ngă giong hơmâo 28%, dŏ kaih mơn hăng anŏ kiăng. Tơdơi kơ man giong atur, hơdôm anom bruă man pơdong glăk gir man tañ hăng ngŏ dong.

Tui hăng akŏ bruă, truh lơ 30/7, amra man giong hơdôm anih akŏ phun, tơdơi kơ lĕ ngă giong abih tih amăng rơnuč blan 8. Khă hnun, atur lŏn tơdu, ƀu kĕ khŏp đơi ôh, anun khŏm pơkra glăi dong, anun yơh jing kaih mơn mơ̆ng giong. Tơdơi kơ hrơi pơdơi lơphet, anom bruă man pơdong či pơhrua tui 90 čô mơnuih mă bruă dong, jing abih bang lĕ 300 čô mơnuih mă bruă.

Čuah khŏm nao pơdŭ mơ̆ng ataih, nua ñu pơmă dua wơ̆t; pơtâo čuah, ƀrik ăt pơmă mơn, anun yơh bơdjơ̆ nao prăk man pơdong hăng man kaih hĭ. Ơi Nguyễn Ngọc Bách, Khua črâo bruă man pơdong Sang hră kơnuk kơna čem rông gưl sa - gưl dua să Mô Rai brơi thâo, nua pơtâo čuah či man pơdong pơmă, anun jing ngă tơnap kơ ƀing ñu mơn: “Ră anai, abih bang glông sang pơ anai leng kơ tuh atur soh yơh, hơmâo khul sang arăng man atur truh gưl 3 laih. Gah anom bruă tuh pơ alin glăk iâu lu mơnuih mă bruă đah mơ̆ng man tañ ƀiă. Amăng hrơi pơdơi kơnuk kơna ta, abih bang kông ñơn ƀơi anai ăt dŏ ngă bruă đôč. Amăng hrơi pơdơi, kông ñơn mă bruă hơmâo apah thim prăk dong. Anom bruă man pơdong gir man pơdong sang hră giong tui hrơi kĭ pơkôl mơtăm”.

Phrâo anai, khua mua Jơnum min mơnuih ƀôn sang tơring čar Quảng Ngãi nao lăng bruă man sang hră kơnuk kơna čem rông ƀơi 4 boh să guai dêh čar Rờ Kơi, Mô Rai, Sa Loong hăng Dục Nông. Hơdôm boh sang hră anai hơmâo man mơ̆ng blan 11/2025, him lăng man giong, ba mă yua amăng akŏ thun hrăm 2026-2027.

Yă Y Ngọc, Kơ-iăng khua jơnum min mơnuih ƀôn sang tơring čar Quảng Ngãi lăi pơtŏng, hơdôm anom bruă kiăng ngă hrŏm kjăp, man pơdong tañ, man klă; laih dong hơdeč hmar pơklaih hĭ hơdôm tơlơi tơnap kơ prăk hăng gơnam man pơdong: “Pơhmu hăng anih man pơdong pơkŏn, sang hră kơnuk kơna čem rông ană bă djuai ania ƀiă pơƀut 2 gưl hrăm ƀơi să Mô Rai hơmâo anŏ tơnap hloh, yua lŏn tơnah, anih anom pơ anai. Pô gơgrong man pơdong hăng pô tuh pơ alin khŏm kĭ pơkôl dưi ba yua sang hră amăng thun hrăm 2026-2027 pơ anăp. Kâo kiăng anom bruă man pơdong apah thim lu mơnuih mă bruă dong, man pơdong tañ, bơkơnar djŏp anih anom amăng sang hră”.

Tơring čar Quảng Ngãi glăk man pơdong 9 boh sang hră kơnuk kơna čem rông pơƀut dua gưl, ƀơi hơdôm boh să či guai dêh čar, kah jing 2 tal, rim boh sang hră hơmâo 700 truh 1.600 čô čơđai, tuh pơ alin kơnar soh.  Ƀu kơnong djru hơmâo anih hrăm hră klă hloh đôč ôh, hơdôm boh sang hră anai ngă hơđong tơlơi hơdip mơda, bong glăi ană plơi pơ anai, gir dŏ glăi, pơhlom rơnuk rơnua, pơgang guai lŏn ia ta.

Amăng kual čư̆ siăng giăm guai, bruă man pơdong ƀu pơdơi pơdă jing ƀu kơnong lăi nao bruă man pơkra tañ hă kaih ôh, ăt mơit tơlơi čang rơmang kơ hơdôm boh sang hră phrâo, tơlơi hơdip phrâo kơ ƀing čơđai ƀơi guai dêh čar dŏ tơnap tap./.