Mơng tơlơi sit nik, bruă dưm dăp ƀut plơi pla ba glăi tơlơi yôm sit nik. Lơm pơƀut glăi plơi pla, amra ngă anih anom mă bruă ƀơi ƀon lan hơbot ƀiă, bruă git gai mơng gưl Ping gah, gong gai gưl să amra jê̆ giăm hăng tañ ƀiă. Laih dong, ngăn drăp apah brơi ƀing apăn bruă ngă bruă phara ăt hrŏ trun kiăng kơ đing nao hơdră djru brơi ƀing apăn bruă tơdơi kơ dưm dăp. Kơ-iăng nai tha prin, nai prin tha Ngô Thành Can, nai pơtô sang hră pơtô bruă ngă hră pơ-ar hăng wai lăng bruă mă, brơi thâo: “Pơmut hrŏm hơdôm boh plơi pla, blung hlâo lăp djơ̆ hăng tơlơi rơkâo hrŏm amăng jơlan gah ngă bruă mơng gong gai ƀon lan dua gưl. Dua dong lĕ bruă pơmut hrŏm kiăng tŏ tui ngă hơbot anih anom mă bruă. Sa tơlơi dong ƀing ta kiăng hluh rơđah, anun lĕ bruă mơnuih apăn bruă, djru brơi ƀing ta pơhlôm aset ƀiă mơnuih mă bruă lăp djơ̆ hăng tơlơi rơkâo pơđĭ kyar hrŏm”.

Tui yă Nguyễn Thị Tú Thanh, kơ-iăng Khua anom bruă gong gai ƀon lan, Ding jum wai lăng bruă mă, anai lĕ boh tơhnal yôm phăn, amra bơdjơ̆ nao khul grup, bruă mă ƀơi ƀon lan. Yua anun, bruă pơjing tơlơi pơtrun kơ pơphun bruă mă ƀơi ƀut plơi pla hơmâo kơsem min tong ten hăng hơmâo dưm hrŏm amăng hơdôm tơlơi rơkâo dưm dăp hơbot anih anom, mă yua klă ngăn rơnoh, lăp djơ̆ bruă mă yua bơkơnar ngăn drăp amăng ƀon lan. “Ngă tui tơlơi črâo trun mơng Ping gah kơ bruă dưm dăp ƀut plơi pla, Ding jum wai lăng bruă mă hơmâo Kơnuk kơna jao git gai pơjing tơlơi pơtrun kơ bruă pơphun hăng bruă mă amăng ƀut plơi pla hăng hơdră djru brơi ƀing mơnuih ngă bruă phara hluai tui hơdôm boh ƀon lan pok pơhai ngă tui pơ anăp anai. Tơlơi yak nao hrŏm amăng dưm dăp ƀut plơi pla tui jơlan gah hơbot, hrŏ aset ƀiă plơi pla hăng pơhlôm lăp djơ̆ tơlơi rơkâo sit nik, hăng anŏ phara amăng rĭm kual hăng mơng anun hrưn đĭ boh tŭ yua amăng bruă mă ƀơi ƀon lan, ngă gêh gal brơi kơ bruă pơphun ngă tui hơdôm bruă jao hăng plai ƀiă glêh tơnap amăng wai lăng mơng gong gai gưl să”.

Bruă khŏm ngă mơng dưm dăp glăi ƀut plơi pla pơdah tong ten amăng tlâo mơta bruă phun: Tal blung a lĕ hơbot mơnuih mă bruă tui bruă jao phara; dua dong lĕ đing nao ngă rơnoh tuh pơ alin bruă gru grua; hăng tal tlâo hrưn đĭ bruă wai lăng mă amăng mơnuih mơnam. Samơ̆ djop tơlơi pơplih kơ bruă mă, tuč rơnuč lĕ anăp nao sa tơlơi anun lĕ djru brơi mơnuih ƀôn sang brơi klă ƀiă. Lơm pơmut hrŏm, mrô mơnuih amăng sa boh plơi pla lu ƀiă, bruă ruah mơnuih ngă khua plơi pla amra ĕp lăng tong ten ƀiă. Anai lĕ ƀing mơnuih arăng đăo gơnang, rơgơi bruă, jê̆ giăm mơnuih ƀôn sang. Ơi Nguyễn Tiến Dĩnh, kơ-iăng Khua ding wai lăng bruă mă brơi thâo: “Kiăng hruă kjăp bruă mă brơi tong ten hăng hơmâo tơlơi glăm ba, ngă bruă brơi khut khăt, ƀing ta kiăng pơjing akŏ bruă brơi ñu tong ten. Hăng lơm pơmut hrŏm plơi pla, hơdôm boh plơi pla amra prong ƀiă, bruă mă ăt amra lu ƀiă mơn. Yua anun tơlơi rơkâo hăng ƀing khua plơi ăt kiăng mă bruă lu ƀiă dong. Tal dua lĕ bruă mă kơ ƀing khua plơi ăt kiăng ngă djơ̆ hăng tơlơi črâo trun mơng gơnong glông”.

Bruă pơgiong dưm dăp plơi pla amăng rơwang tal 2 thun anai lĕ bruă jao kơđi čar yôm phăn, rơkâo hơmâo tơlơi mut hrŏm mơng tơlơi črâo trun mơng Ping gah hăng djơ̆ pran mơnuih ƀôn sang. Tơdah hơmâo tơlơi pơplih hơget thơ ăt amra ba glăi tơlơi tơnap tap, samơ̆ hăng tơlơi git gai khut khăt mơng gơnong glông, bruă prap lui tong ten, bruă mă ƀơi gong gai ƀon lan hrŏm hăng tơlơi thâo hluh mơng mơnuih ƀôn sang, tơdơ kơ dưm dăp plơi pla, bruă mă amra hruaih tui, mut hrŏm hăng bruă mă mơng gong gai dua gưl, mơng anun ngă gêh gal brơi pơđĭ kyar anih anom, jơlan glông, wai lăng mơnuih mơnam ƀơi ƀon lan./.