Khua pơ ala mơnuih ƀôn sang tơring čar Gia Lai pơphun Jơnum bưp mơnuih ƀôn sang ruah khua tơdơi kơ jơnum lok blung a, khua pơ ala mơnuih ƀôn sang dêh čar tal XVI jơnum pơphun ƀơi anăp hăng lăng nao rai mơng ataih hăng hơdôm boh să, phương. Amăng mông jơnum, mơnuih ƀôn sang ƀơi 2 anih ruah khua lăi pơthâo lu bruă bơdjơ̆ nao tuh pơ alin man pơkra jơlan glông, hơdră brơi brơi mơnuih ƀôn sang, pơhlôm tơlơi hơdip mơnuih mơnam, pơsir hĭ bruă ngă hră pơ-ar, dưm dăp mơnuih mă bruă mơng pơkŏn, prăk apah pơhrua brơi ƀing apăn bruă khul Ping gah pơplih nao mă bruă pơ ƀon lan, hơdră djru brơi ƀing kơhnâo kơhnăk hăng hơdôm khul grup gru grua. Lu mơnuih ƀôn sang ruah khua đing nao tơlơi git gai mơng gong gai ƀon lan lơm gưl să ƀiă pơhrua dong lu bruă jao. Mơnuih ƀôn sang ruah khua brơi thâo bruă ngă hră pơ-ar ƀơi sa, dua ƀon lan dŏ kaih, aka ƀu gơgrong; yua anun gưl să kiăng pơplih phrâo amăng tơlơi pơmĭn wai lăng, hrưn đĭ pran gơgrong djru brơi mơnuih ƀôn sang, bĕ hĭ bruă mơnuih ƀôn sang nao rai lu wŏt kar ră anai.

Đĭ pơhiăp amăng mông jơnum, kơ-iăng Khua git gai pơ ala mơnuih ƀôn sang Nguyễn Hồng Diên lăng yôm hơdôm tơlơi pơgôp hiăp lăp djơ̆, sit nik mơng mơnuih ƀôn sang hăng brơi thâo ƀing khua pơ ala mơnuih ƀôn sang tơring čar Gia Lai amra pơtum pơƀut glăi djop kiăng  mơ-it nao anom bruă bơdjơ̆ nao sem lăng, pơsir hĭ.

“Mơng pơtum pơƀut tơlơi pơgôp hiăp, ƀing gơmơi pơčlah hơdôm bruă jing dua grup phara: tơlơi bơwih ƀong huă-tuh pơ alin hăng dưm dăp anih anom-hơdră djru mơnuih mơnam. Ha mơkrah tơlơi pơgôp hiăp amra pơsir tui tơlơi glăm ba mơng gưl tơring čar hăng gưl să. Čang rơmang ƀing khua mua să, phương kiăng đing nao hloh kiăng pơsir brơi klă, yua tui tơlơi sit nik ră anai, tơlơi glăm ba mơng să, phương prong biă mă. Sit biă ñu, kơnuk kơna glăk pơčrông sai kơ bruă tŏ tui pơhrŏ trun ngă pơ-ar ngă gưl gơnong glông kiăng jao glăi hơdôm boh ƀon lan. Yua anun tơlơi glăm ba, bruă jao mơng gưl să pơ anăp anai amra hrưn đĭ prong ƀiă. Să, phương lĕ anih bưp ƀơi anăp hăng mă bruă hrŏm mơnuih ƀôn sang, yua anun kiăng gir run, gơgrong kiăng pơsir hĭ khut khăt hơdôm bruă sit nik bơdjơ̆ nao tơlơi hơdip mơnuih ƀôn sang”.

Ƀơi să Phúc Thọ Lâm Hà, ơi Lâm Văn Đoan-kơ-iăng Khua jơnum min gru grua hăng mơnuih mơnam mơng Ƀirô khua pơ ala mơnuih ƀôn sang, dong amăng grup khua pơ ala mơnuih ƀôn sang tơring čar Lâm Đồng, hơmâo bưp mơnuih ƀôn sang ruah khua tơdơi kơ jơnum lok blung a, khua pơ ala mơnuih ƀôn sang tal XVI. Amăng mông mă bruă tơpă, mơnuih ƀôn sang lăng yôm boh than ba glăi mơng lok jơnum anai, laih dong lăi pơthâo lu tơlơi tơnap tap, gun găn ƀơi ƀon lan.

Hơdôm tơlơi pơgôp hiăp, rơkâo đĭ kơ sa, dua akŏ bruă pok pơhai ngă kaih lơm anun bruă pơhrui glăi lŏn mơnai ngă ječ ameč, ngă bơngô̆t amăng mơnuih ƀôn sang. Mơnuih ƀôn sang ruah khua ăt lăi pơthâo bruă ngă hră pơ-ar ăt aka ƀu klă, ngă mơnuih ƀôn sang khŏm nao rai lu wŏt; laih dong rơkâo đing nao tuh pơ alin, pơkra ming jơlan glông amăng ƀon lan, ngă gêh gal brơi kơ bruă nao rai, pơdŭ pơgiăng gơnam tam hăng dưi tŭ mă djop tơlơi bơwih brơi gah ia jrao, pơtô pơjuăt ƀơi kual ataih, asuek.

Đĭ pơhiăp amăng mông jơnum, ơi Lâm Văn Đoan lăng yôm tơlơi glăm ba, hơdôm tơlơi pơgôp hiăp lăp djơ̆ mơng mơnuih ƀôn sang ruah khua; pơsit tong ƀing khua pơ ala mơnuih ƀôn sang tơring čar amra tŭ mă djop kiăng mơ-it nao khua pơ ala mơnuih ƀôn sang, kơnuk kơna hăng djop ding jum, gơnong bruă. Laih dong rơkâo djop gơnong bruă, sang bruă, ƀon lan kơtưn gum hrŏm, đing nao pơsir hĭ khut khăt hơdôm bruă tui tơlơi glăm ba, anăm brơi pioh sui hrơi bơdjơ̆ nao tơlơi dưi sit nik mơng mơnuih ƀôn sang.

Ƀơi Dak Lak, ơi Ngô Trung Thành-Kơ-iăng Khua jơnum min tơlơi phiăn hăng phiah phiăn mơng Ƀirô khua pơ ala mơnuih ƀôn sang dêh čar hrŏm hăng ƀing khua pơ ala mơnuih ƀôn sang tơring čar Dak Lak bưp mơnuih ƀôn sang ƀơi să Krông Bông, Cư Pui hăng Hòa Sơn. Mơnuih ƀôn sang ruah khua rơkâo kơnuk kơna đing nao tuh pơ alin man pơkra jơlan nao pơ hmua, dơnao pơkŏng ia, măi ƀô̆p, king ia ƀơi hơdôm boh ƀon lan juăt ia ling dăo; pơkra ming hơdôm ară jơlan tơkuh nao rai hơdôm să, plơi pla glăk răm rai; pơtrut tañ bruă man pơkra hơdôm ară jơlan, tơdrông tua glăk ngă sui hrơi. Hrŏm hăng anun, mơnuih ƀôn sang ruah khua čang rơmang hơmâo hơdră djru ĕp pơmut ƀing nai pơtô kual ataih, asuek; tañ hơmâo hơnong pơkă brơi mă bruă, prăk djru brơi ƀing apăn bruă amăng plơi pla; tañ kah pơpha prăk kak tuh pơ alin man pơdong hăng prăn yua amăng hơdôm jơlan hơdră tui hơnong pơkă dêh čar kiăng ngă tui tŭ yua hơnong pơkă pơđĭ kyar dua mrô; tŏ tui đing nao bruă plai kyâo pơtâo, wai pơgang glai hăng pơsir hĭ djah djâo ƀơi kual plơi pla.