Tlam lơ 28/5, ƀơi sang bruă khua pơ ala mơnuih ƀôn sang dêh čar, Khua mua khul djuai ania mơ̆ng Sang bruă pơ ala mơnuih ƀôn sang dêh čar jơnum hơdor glăi 65 thun hrơi akŏ pơdong hăng tŭ mă Miđai mă bruă Hnơ̆ng sa. Khua git gai pơ ala mơnuih ƀôn sang dêh čar, ơi Trần Thanh Mẫn nao jơnum hrŏm hăng pơhiăp git gai.

Găn rơgao 65 thun mă bruă, Khul djuai ania mơ̆ng sang bruă khua pơ ala mơnuih ƀôn sang dêh čar hơmâo pơgôp prong biă mă amăng bruă čih pơkra tơlơi phiăn dêh čar, djru bruă krăp lăng ngă tui tơlơi phiăn hăng pơsit lu tơlơi pơprong amăng lŏn ia; ngă hrŏm pơtong glăi tong ten, pơgôp hiăp brơi hơdôm rơtuh pok hră tơlơi phiăn dêh čar, djru ngă giong jơlan hơdră kơnuk kơna pơtrun djru kơ mơnuih ƀôn sang djuai ƀiă, kual čư̆ siăng, kual ataih, asuek. Khua git gai pơ ala mơnuih ƀôn sang dêh čar ơi Trần Thanh Mẫn čih pioh, bơni tơlơi gir run, pran jua djru hrŏm mơ̆ng djop gưl rơnuk khua mua sang bruă Khul djuai ania. Pơ anăp anai,

Khua git gai pơ ala mơnuih ƀôn sang dêh čar rơkâo Khul djuai ania pơđĭ tui boh tŭ yua amăng bruă mă, kơsem min, lăi pơthâo jơlan hơdră; pơhlom bruă pơđĭ kyar lir hơbit bruă mă bơkơnar,djă piho gru grua hiam hăng ngă kơjăp tui amăng khul gum pơgôp djuai ania abih bang mơnuih ƀôn sang.

Laih dơ̆ng, djop jơlan hơdră mơ̆ng kơnuk kơna, pioh kơ mơnuih ƀôn sang djuai ƀiă khom rơđah rơđong, djơ̆ hăng bruă mă sit nik, dưi ngă tui, pơsir lăp anŏ či kiăng mơ̆ng mơnuih ƀôn sang.