Tui hăng ơi Trần Thanh Mẫn lăi, djop mơnuih ƀôn sang lêng mă bruă hơdip mơda ngă tui djơ̆ Phiah phiăn hăng tơlơi phiăn soh, yua kơ anun bruă pơtô hăng pơlar tui bruă hrăm tơlơi phiăn kiăng pơblih kơtang hlohh, akŏ pơjing gru grua hiam thâo pơpŭ kơ tơlơi phiăn amăng abih bang mơnuih mơnam.

Khua git gai pơ ala mơnuih ƀôn sang dêh čar brơi thâo, thun blan rơgao, ƀing pơ ala mơnuih ƀôn sang dêh čar hơmâo pơblih laih mơ̆n tơlơi pơmin hơdră mă bruă čih pơkra tơlơi phiăn, pơtrut kơtang bruă ngă tui pơblih ba yua mrô hăng ia rơgơi ană mơnuih pơjing rai amăng bruă čih pơkra tơlơi phiăn dêh čar. Khă hnun, bruă pơtô hrăm tơlơi phiăn dêh čar ăt dŏ kơtrâ̆o đơi, kơnong sa bơnah đôč, aka ƀu hơmâo tơlơi drơ̆ng glăi mơ̆ng mơnuih ƀôn sang ôh, amăng bruă pơblih yua mrô, pơtô hrăm tơlơi phiăn.

“Ƀing ta khom pơblih yua mrô kơtang hloh amăng bruă mă pơtô lăi tơlơi phiăn, anăm ngă ôh mă pơdưm amăng plăng ia rơgơi mrô lui hnun, khom lăng nao kơ lu bơnah. Ƀuh sit nik gah rơngiao, pơdưm amăng plăng tơlơi pơhing mrô pioh pơtô lăi, pôr pơthâo tơlơi phiăn kơnong dŏ glăi bruă čih pơthâo hră tơlơi phiăn hăng bơnah PDF đôč, tơnap mơ̆n mơnuih ƀôn sang ĕp lăng. Kơcăo bruă tơlơi phiăn kiăng pơblang rơđah čih pơthâo amăng plăng ia rơgơi mrô gưl dêh čar pioh pơtô hrăm tơlơi phiăn. Khom ba yua pơtô hrăm ngă tui tơlơi phiăn ƀơi djop sang bruă lăi pơthâo tơlơi phiăn pok lăng (Open data) kiăng pơmut hrŏm AI; Chatbot ngă mă hơjăn, djru pơblang brơi tơlơi phiăn kơ mơnuih ƀôn sang 24/7”.

 Kơ anŏ pơtruh nao rai, ƀu kơnong hơjăn ƀing pôr tơlơi pơhing sa bơnah mơ̆ng kơnuk kơna đôč ôh; tơlơi phiăn anai pơhrua nao hơdôm tơlơi pơkă mơnuih ƀôn sang drơ̆ng glăi, pơtong rơđah tơlơi thâo hăng hnơ̆ng pơkă tơlơi thâo mơ̆ng mơnuih ƀôn sang ĕp lăng plang mrô, kiăng hmao kru čih pơkra glăi boh yom phun tơlơi pơtô ba.

Kiăng bruă pơkă rơđah hloh kơ ƀing kiăng ĕp lăng hăng rim čô lăi pơthâo tơlơi phiăn, khua pơ ala mơnuih ƀôn sang dêh čar brơi thâo, tơlơi phiăn ră anai hlăk ngă tui tơlơi phiăn mơ̆ng thun 2012 pơkă kơ khul phara kah hăng mơnuih ƀôn sang djuai ƀiă, mơnuih ƀu klă drơi jăn, mơnuih hlăk ngă tui tơlơi bơtơhmal mơ̆ng sang phat kơđi samơ̆ hơdră ba pơtô dŏ ngă tui hrŏm hrŏm đôč. Yua kơ anun, kiăng pơhrua nao hơdôm tơhnal pơkă djơ̆ găl kơ rim kual, hnơr thun, bruă bơwih ƀong huă.

Khua pơ ala mơnuih ƀôn sang dêh čar lăi rơđah, anŏ phun ngă tui tơlơi phiăn pioh pơtô pơblang tơlơi phiăn kơ mơnuih ƀôn sang djuai ƀiă. Phun ñu lŏn mơnai anih dŏ tơnap, jơlan nao rai aka ƀu gêh găl, gơnam yua mă bruă pơtô lăi aka ƀu djop anun boh tŭ yua aka ƀu tum hăng jing anŏ ngă gun amăng boh pơhiăp.

Tơlơi phiăn anai, kiăng ngă pơrơđah hloh tơlơi gơgrong mơ̆ng hơdră čih pơkra hơdrôm hră tơlơi phiăn mơ̆ng plơi pla; ƀing tha plơi, khua ƀôn, mơnuih arăng đăo kơnang, amăng kơnung djuai, bruă pơtô pơblang amăng sang jơnum plơi. Laih dơ̆ng hơdră pơtô hrăm pơblih mơ̆ng pôr pơthâo abih bang, jing hơdră ruah mă rim črăn pioh pơtô brơi, ta kiăng lăi, lăng nao kơ bruă mơnuih ƀôn sang ngă anŏ hơgĕt, hơdip mơda pơ anih, plơi pla hiư̆m bơbeč djơ̆ khom pơtô gah anun hlâo kiăng gơñu thâo pơgang ba tơlơi dưi, bruă mă mơ̆ng ƀing gơñu. Hrŏm hăng anun, kiăng pơsir anŏ aka ƀu klă mơ̆ng khul pơtô ba tơlơi phiăn, pơsir tơlơi kơƀah prăk pioh mă bruă, boh nik ñu ƀơi gưl plơi pla mơnuih mă bruă dŏ kơƀah, lêng kơ ƀing ngă bruă dua, klâo bruă jao sa čô.

Hrŏm hăng bruă pơblih phrâo hơdră či ngă bruă pơtô pơblang, khua pơ ala mơnuih ƀôn sang dêh čar ơi Trần Thanh Mẫn ăt rơkâo kơtưn amăng mơnuih ƀôn sang djru hrŏm pơtô pơblang tơlơi phiăn; hơmâo jơlan hơdră pơtrut sang bruă mơdrô, anom bruă khul nai thâo kơđi, ƀing ngă bruă pơtô ba tơlơi phiăn dưi pơtô ba kơ mơnuih ƀôn sang:

“Kâo pơmin bruă čih pơhrua glăi tơlơi phiăn, pơtô ba tơlơi phiăn tal anai ƀu kơnong dŏ glăi amăng bruă čih pơkra pơhrua boh hră, glông pơhiăp, bruă mă kơ lu sang bruă kơnuk kơna đôč ôh, dŏ jing bruă ngă hơkrŭ kơ hơdră tŭ mă tơlơi pơtô; pơblih mơ̆ng bruă git gai wai lăng, jing bruă pơphâ brơi tơlơi pơhing tơlơi pơmin bơwih brơi kơ mơnuih ƀôn sang hăng tơlơi phiăn. Bruă čih pơkra tơlơi phiăn tal anai yom biă mă amăng bruă pơtô pơblang tơlơi phiăn tŭ yua sit nik, truh pơ djop mơnuih dưi ngă tui. Anai lĕ, bruă mă ƀu kơnong anom bruă tơlơi phiăn ôh, jing bruă mơ̆ng abih bang amăng glông bruă kơđi čar, mơ̆ng Ping gah, gong gai kơnuk kơna, Khul wai lăng djop djuai ania mơnuih mơnam truh pơ djop mơnuih”.

Bruă čih pơhrua tơlơi phiăn pơkă kơ bruă pơtô ba tơlơi phiăn dêh čar ƀu kơnong kiang ngă pơgiong glông bruă čih tơlơi phiăn dêh čar đôč ôh, dŏ pơdah rai tơlơi kiăng ngă khut khăt mơ̆ng anom bruă pơ ala mơnuih ƀôn sang dêh čar akŏ pơjing sa atur tơlơi phiăn jĕ giăm mơnuih ƀôn sang, amuñ tŭ mă hăng bơwih brơi kơ mơnuih ƀôn sang klă hloh. Hơdôm tơlơi pơgôp hiăp ƀơi mông jơnum bơkơtuai nao rai ăt brơi ƀuh ƀing khua mua pơ ala mơnuih ƀôn sang dêh čar ăt pơđing hmư̆ djop tơlơi hơmâo mơ̆ng bruă mă sit nik, tơlơi kiăng, anŏ čang rơmang mơ̆ng mơnuih ruah khua kiăng ngă pơgiong tơlơi phiăn, ba tơlơi phiăn dưi ngă tui sit nik amăng tơlơi hơdip mơda.