Mơ̆ng mơguah sing bring, adai ayuh hyiăng ƀơi Pơsat gong kut dor tơhan djai pơsăn drơi jăn yua kơ lŏn ia či Đưk Kơ, ƀuh mơnuih rô nao rai, mut tơbiă lu laih. Hơdôm grup hyu mă bruă gah ling tơhan, ƀing nai ia jrao hăng khua mua gong gai plơi pla ngă hrŏm djơ̆ rơ-ua, pok pơhai bruă mă, kuai pơsat, duñ meh tơlang, čih pioh, pơdưm amăng plang ia rơgơi mrô djop mơta tơlơi pơhing truh pơ bruă ngă giong dor glăi man pơkra pơsat ha wơ̆t dơ̆ng. Djop tơhnal, črăn bruă dưi ngă tong ten rơnang blang, kơđiăng biă mă kiăng ngă djơ̆ tơlơi pơtrun bơwih brơi kơ bruă ba pơčrang AND. Hăng rơbêh 1.500 boh akŏ pơsat aka ƀu thân anăn krăn pô, Pơsat gong kut či Đưk Kơ lĕ jing anih ngă bruă lu hloh mơ̆ng tơring čar Gia Lai. Ơi ia jrao Nguyễn Thị Thu Hà, sang ia jrao să Đưk Kơ kah pơpha, hăng lu khua mua, ơi ia jrao lĕ, anai jing bruă ngă blung a tŭ mă bruă jao yom pơphăn phara biă mă.

“Tal blung a duñ mă meh tơlang tơngan tơtư̆ biă mă samơ̆ tơdơi kơ anun mưn amăng pran jua ăt abih mơ̆n, laih anun hlong juăt hĭ. Pơ anai, dŏ mă bruă djơ̆ mông adai pwo-iă, djơ̆ hrơi adai hơjan hlim, ƀing adơi ayong gir run pơsir mă tơlơi gleh tơnap bưp ƀơi anăp. Khul khua mua git gai bruă mă, ling tơhan să ăt ngă gêh găl brơi kơ ƀing ơi ia jrao mă bruă hơmâo rơnưh, păng ap kiăng dŏ hrŏm pơgang anih mă bruă”.

Ƀu kơnong ƀing nai ia jrao, lu ling tơhan mơnuih ƀôn sang amăng să ăt tal blung a soh ngă bruă yom phara djơh hăng anai. Mơ̆ng Pơsat gong kut dor tơhan djai pơsăn drơi jăn yua kơ lŏn ia či Đưk Kơ gah kual yŭ tơring čar, truh pơ lu pơsat gong kut gah Ngŏ tơring čar Gia Lai, ƀing tơhan thun hlăk ai lêng kơ sa tơlơi ngă bruă khut khăt: ngă abih pran jua ta pô djru hrŏm kiăng ba tơlang ƀing tơhan djai pơsăn drơi yua kơ lŏn ia dưi thâo anăn krăn pô laih anun glăi hăng sang anŏ plơi pla hơđăp, tơdơi kơ hơdôm hơpluh thun pơčlah. Ayong Đặng Hoàng Bửu, Khua Khul tơhan Tiểu đội Trưởng Dân quân ƀơi să Bình Hịêp, ol kơdol amăng pran jua ƀu truh lăi, kah pơpha tui anai:

“Bruă anai kâo aka ƀu ngă djơ̆ hlâo tơdơi ôh, mah adai ayuh hyiăng pơ-iă kơtang, hơjan mơsah hai ƀing adơi ayong amăng khul ăt gir run mă bruă kiăng tañ ba nao ƀing anong wa glăi pơ sang anŏ plơi pla hơđăp. Lơ̆m ba nao tơlang tơleh ƀing anong wa tuh drah pơčah asar yua kơ lŏn ia, kiăo tui thun blan bơyan đuăi nao, tơlang phŏ, drơi jăn ƀu dŏ dơ̆ng tah, samơ̆ abih bang lăng dlưh pran jua biă mă, rơngôt hning hrŏm. Mah hnun, abih bang gơmơi ăt gir run đôč, kiăng hyu hơduah ĕp, duñ mă tơlang hăng gơnam amăng drơi jăn pô djai đah mơ̆ng tañ thâo, bơwih brơi kơ bruă pơčrang AND”.

Hăng ayong Ngô Đại Phát, ƀing tơhan plơi să Bình Hiệp, bruă ngă anai jing mông piho kơ ñu tơdăm rơnuk tơdơi, amĭ ƀă yă pơjing amăng rơnuk lŏn ia laih rơngai, ñu kiăng pơdah rai pran jua hơdor bơni, hơdor tơngia hăng bruă mă tum teč rơđah rơđong hloh. Hơdôm hrơi dŏ mă bruă gah yŭ adai pơ-iă kơtang hang rŏng ƀudah hơjan hlim mơsah hai, abih bang juh alum pơtrut pran jua mă bruă, pơgang mă tơlơi suaih pral, kiăng hơmâo pran mă bruă, khom ngă giong bruă jao yom pơphăn anai.

“Ƀing gơmơi lĕ hlăk ai rơnuk tơdơi đôč, tơkeng rai amăng rơnuk dêh čar laih rơngai, kâo ƀuh lăp pơ-ư biă mă hăng bruă anai, dưi djru hrŏm hơduah ĕp tơlang mơnuih djai drơi yua kơ lŏn ia dưi glăi hăng sang anŏ tañ hloh. Ƀing gơmơi prăp laih pran jua ngă bruă khut khăt hloh pioh ngă giong bruă jao, hiam klă tum teč”.

Tơdơi kơ nao pơhrăm ƀiă hrơi kơ bruă mă, lu nai ia jrao kơnong juăt hăng bruă dŏ amăng sang anih tơ-ui pơkă lăng tơlơi duăm ruă ană plơi, ră anai jing tơhan nai jrao hyu mă, duñ tơlang ba pơčrang AND ƀơi pơsat gong kut dor tơhan pơsăn drơi yua kơ lŏn ia. Ayong Nguyễn Trái Đắng, sang ia jrao prong phường Quy Nhơn, mut hrŏm grup mă meh tơlang ƀơi pơsat gong kut dor tơhan djai pơsăn drơi ƀơi Mỹ Thắng, să Phù Mỹ Đông, brơi thâo, rơgao hơdôm hơpluh thun dor amăng lŏn, lu tơlang mơnuih djai phŏ abih, aru hai ăt ƀu ƀuh lơi, jing amruih lŏn abih laih. Yua kơ anun, bruă duñ mă, kah pơpha čih pioh khom ngă tong ten tum teč biă mă djơ̆ tơlơi pơkă amăng bruă mă kah hăng tơlơi hrăm laih hlâo hăng dưi kah pơpha ba pơčrang AND kiăng tŭ yua.

“Tơdah dŏ ƀŭ lĕ amra djơ̆ tong ten hloh 100% mơtam, tơdah ƀu dŏ ƀŭ dơ̆ng tah, mă meh tơlang, tơlang thung, tơlang pha; tơgơi hăng tơlang kang tơdơi djop lĕ klă hloh. Tơdah hơdôm mơta anŏ anun ƀu hơmâo dơ̆ng tah, kơnong duñ mă meh tơlang pơkŏn. Thâo mă meh tơlang tŭ yua lĕ pran jua mơak yơh, kiăng hơdor bơni kơ ƀing anong wa đưm adih tuh drah pơčah asar kiăng lŏn ia dưi rơngai, ƀing ta mơ̆ng hơmâo mông rơnuk ngă sang rơnang ngă hmua kah hăng ră anai”.

Bruă ngă 500 hrơi mlam mă meh tơlang pơčrang AND, kiăng ngă tui tơhnal pơkă khom thâo anăn, krăn pô tơhan djai pơsăn drơi jăn yua kơ lŏn ia aka ƀu thâo anăn mơ̆ng hlâo, dưi pok pơhai ngă tui ƀơi djop khul pơsat gong kut dor tơhan pơsăn drơi, djop plơi pla ƀơi Gia Lai. Gah yŭ hrơi blan bơyan adai pơ-iă hơjan, hơdôm rơtuh čô khua mua, ling tơhan, mơnuih mă bruă gah ia jrao hăng gong gai plơi pla ăt greh gruñ dŏ ƀơi djop akŏ pơsat aka ƀu thâo anăn, kuai mă, rŭ tơlang duñ pơƀut čih piho ba pơčrang, giong ba glăi, djop bruă ngă anun, khom ngă rơnang tong ten, kơđiăng biă mă kiăng djơ̆, tong, sit nik, tơhan pơkă ĕp glăi pô, thâo glăi anăn mơnuih khin hơtai djai drơi yua kơ lŏn ia.

“Mah anai lĕ bruă aka ƀu ngă djơ̆ hlâo tơdơi ôh, bruă ngă phrâo đôč, phara biă mă, tơnap tap samơ̆ ƀing khua mua, ling tơhan, abih bang ƀing ngă hrŏm gir run mă tơlang ƀing tơhan pơsăn drơi ƀơi djop pơsat gong kut hăng pran jua mă bruă thâo luă gŭ, pơpŭ pơyom hăng ba glăi boh tŭ yua djơ̆ hrơi pơkă. Anom bruă ăt nao tơña blan, juh alum, hăng pran jua mă bruă ƀơi pơsat khă tơnap gleh glar kiăng abih bang ƀing adơi ayong ngă djơ̆ tong ten lơ̆m dŏ mă bruă”.

Bruă ngă ječ ameč amăng 500 hrơi mlam hơmâo lăi pơtong, tơlơi kiăng ngă khut khăt hloh mơ̆ng Ping gah, kơnuk kơna, ling tơhan hăng abih bang amăng glông bruă kơđi čar, glăm ba bruă mă yom pơphăn hăng ƀing hơmâo tuh drah pơčah asar, pơsăn drơi jăn yua kơ lŏn ia yom biă mă. Rim meh čơđeh tơlang hơmâo duñ mă djă pioh ba pơčrang AND ră anai jing sa tơlơi čang rơmang kơ sang anŏ, phung wang añang kor pô djai, đah mơ̆ng tañ ƀuh, ba glăi hăng sang anŏ, juh alum hăng pơhlai hĭ tơlơi hning rơngôt dŏ tơguan dŏ čang hơdôm hơpluh thun laih rơgao, tơdơi kơ lŏn ia pơklaih rơngai, djuai ania mơak.

Hăng Gia Lai, kual lŏn tom jing tơdron blah kơtang tit, rai tơplŭk, anih dŏ hơdôm rơbâo akŏ pơsat dor lui aka ƀu thâo anăn krăn pô, djop gưl sang bruă, gong gai kơnuk kơna, ling tơhan ăt glăk dŏ gir run rim hrơi, rim mông kiăng ngă giong bruă jao yom phara anai. Anun lĕ ƀu kơnong tơlơi pơtrun, bruă ngă “500 hrơi mlam” đôč ôh, dŏ jing bruă ngă tŏ tui tơlơi pơtô gru grua djuai ania ta juăt lăi “Ƀong boh hơdor kơ pô pla, mơñum ia hơdor kơ čroh hnoh” phun akha plơi pla, djuai ania, hơdor tơngia kơ ƀing tuh drah pơčah asar, pơsăn drơi yua kơ lŏn ia, ta mơ̆ng dưi rơngai kah hăng ră anai, ƀu dưi wor hĭ ôh ƀing adơi ayong anong wa ngă tơhan hơkrŭ blah ayăt khom djai drơi pô, kiăng lŏn ta rơnang sang ta mơak, dêh čar ta rơngai, djuai ania ta hơđong.