Kơčăo bruă BLOOM hơmâo Kơnuk kơna Canada djru hluai tui Ding jum djŏp bruă hơmâo ƀơi rŏng lŏn tơnah Canada, pơphun ngă ƀơi dua boh tơring čar Dak Lăk hăng Tuyên Quang mơ̆ng blan 6/2026 truh blan 4/2030. Bruă anai ƀu mă yua prăk mơ̆ng tơring čar ôh; sang brruă djru prăk wai lăng pô, krăp lăng hăng mă yua mrô prăk anai. Kơčăo bruă anăp nao rŭ glăi hăng pơđĭ tui anih anom glai rưng hơmâo anŏ yom kơ djŏp mơta ra mơnŏng, laih dong dưi hơdip kiăo tui ayuh hyiăng pơplih kơ ƀing đah kơmơi djuai ania ƀiă hăng mơnuih tơpuôl.

Ƀơi Dak Lăk, tơring čar pơphun ngă bruă ƀơi Đang glai dêh čar Čư̆ Yang Sin hăng hơdôm boh să Hòa Sơn, Čư̆ Pui laih anun Yang Mao. Prăk djru ƀu kiăng tla glăi lĕ rơbêh 21 klai  (dưm dưm 1,1 klăk dolar Canada).

Kơčăo bruă anai anăp nao pơplih klă tui bruă bơwih ƀong mơ̆ng 1.500 čô mơnuih dưi tŭ mă sit nik hăng 6.000 čô tŭ mă mơ̆ng ataih djŏp anŏ klă mơ̆ng kơčăo bruă anai ba glăi. Kiăo tui bruă djru boh thâo phrâo, hơdră ngă bruă, kơčăo bruă anai amra kơnang kơ ayuh hyiăng glai klô pơlir hăng bơkơnar đah kơmơi đah rơkơi, wai lăng kjăp tui, mă yua hơđong anŏ hơmâo mơ̆ng ayuh hyiăng glai klô, hăng pơđĭ tui tơlơi gơgrong, boh pơhiăp mơ̆ng ƀing đah kơmơi djuai ania ƀiă lơ̆m wai lăng, pơgang glai.

Pơhiăp ƀơi mông ngă bruă, ơi Nguyễn Thiên Văn, Kơ-iăng khua Jơnum min mơnuih ƀôn sang tơring čar Dak Lăk lăi, Kơčăo bruă BLOOM yom biă lơ̆m tơring čar glăk gir wai lăng, djă pioh djŏp mơta ra mơnŏng hơdip pơlir hăng bruă pơđĭ tui tơlơi bơwih ƀong kjăp kơ mơnuih ƀôn sang djuai ania ƀiă. Ñu kiăng hơdôm gơnong bruă, gong gai ƀon lan hăng djŏp anom bruă bơdjơ̆ nao ngă hrŏm kjăp hăng sang bruă djru prăk đah mơ̆ng pok pơhai ngă bruă djơ̆ lăp, pơhlom klă, tŭ yua: “Jơnum min mơnuih ƀôn sang tơring čar Dak Lăk ƀuăn lăng ba, git gai kiăo tlôn hăng djru ba klă hloh kiăng hơdôm bơnah ngă kơčăo bruă anai gêh găl, amuñ ƀiă, kiăng hơmâo abih bang mơnuih ƀôn sang tŭ ư; gir pơtô blang kiăng mơnuih ƀôn sang thâo, tŭ ư, gum ngă djŏp bruă kơnang kơ ayuh hyiăng glai klô, ăt kah hăng pơđĭ tui hơbô̆ bruă bơwih ƀong hơđong kjăp; đĭ kyar hơƀô̆ bruă phrâo, pơđĭ tui tơlơi gơgrong mơ̆ng adơi amai amăng bruă pơkra, pơgang djŏp mơta ra mơnŏng hơdip”./.