Dak Lak ră anai hơmâo rơbêh 41.000 ektar đang sầu riêng, amăng anun giăm 30.000 ektar glăk thun pĕ pơhrui, sầu riêng pĕ pơhrui amăng bơyan thun 2026 him lăng giăm 500.000 tơ̆n. Samơ̆, đơ đam tơring čar Dak Lak phrâo hơmâo 280 mrô kual pla hăng giăm 7.500 ektar hăng 42 mrô anih anung hơmâo gah dêh čar Khač tŭ yap. Ră anai dŏ 165 mrô kual pla hăng 66 mrô anih anung gơnam hơmâo pơgiong hră pơ-ar samơ̆ ăt glăk dŏ tơguăn gah dêh čar Khač sem lăng.

Amăng mông mă bruă hăng khua mua Ding jum ngă hmua hăng ayuh hyiăng, ơi Nguyễn Thiên Văn, kơ-iăng Khua Jơnum min mơnuih ƀon sang tơring čar Dak Lak rơkâo. “Rơkâo Ding jum ngă hmua hăng ayuh hyiăng hrŏm hăng hơdôm anom bruă bơdjơ̆ nao, sit biă ñu lĕ Ding jum pơtom hiăp, gum hrŏm mă bruă hăng dêh čar Khač kiăng tañ tŭ yap hơdôm hră pơ-ar mrô kual pla hơmâo pơgiong laih, mơng anun pok prong đang hmua hơmâo djop tơlơi gal ba sĭ mơdrô pơ tač rơngiao. Laih dong ngă gêh gal kiăng hơmâo dong anom bơwih ƀong sĭ mơdrô mut hrŏm tuh pơ alin pơdong anih anung gơnam amăng ƀon lan”.

Hrŏm hăng tơring čar Dak Lak, hơdôm boh tơring čar Gia Lai, Lâm Đồng, Quảng Ngãi ăt bưp lu tơnap tap lơm pok pơhai ngă tui tơlơi pơtrun mrô 38 kơ mrô kual pla hăng anih anung gơnam. Hơdôm boh ƀon lan rơkâo tañ črâo ba lăp djơ̆ hrŏm hăng tơhnal pơkă djru ba gơnam sĭ pơ tač rơngiao, laih dong pơgiong anih wai lăng hră pơ-ar tơdơi kơ tơlơi pơtrun dưi ngă tui. Ơi Hà Ngọc Chiến, Khua anom bruă tơjŭ pla hăng wai pơgang phun pla tơring čar Lâm Đồng brơi thâo: “Tơdơi kơ tơlơi pơtrun mrô 38 dưi ngă tui, rơkâo tañ hơmâo tơlơi črâo ba lăp djơ̆ kơ bruă wai lăng kiăng djop ƀon lan dưi pok pơhai ngă tui. Tơdah aka ƀu dưi črâo ba tong ten amra ngă tui tơnap tap biă”.

Ơi Nguyễn Hoàng Hiệp, kơ-iăng Khua ding jum ngă hmua hăng ayuh hyiăng brơi thâo, Ding jum glăk kơsem min pơplih pơkra tơlơi pơtrun mrô 38 tui tơlơi git gai mơng Khua dêh čar tui jơlan gah hơdeč hmar ƀiă; laih dong dưi amăng măi mok abih bruă jao mrô kual pla hăng anih anung gơnam, pơplih kơtang mơng pel ĕp hlâo hơdai nao pel ĕp tơdơi kiăng plai ƀiă hră pơ-ar brơi mơnuih ƀôn sang hăng anom bơwih ƀong sĭ mơdrô.

Hăng bơyan sầu riêng thun anai, djop ding jum, gơnong bruă Việt Nam glăk mă bruă hăng dêh čar Khač kiăng pơtrut bruă jao mrô kual pla, anih anung gơnam; laih dong pơsur pơđĭ kyar sĭ mơdrô sầu riêng dưm amăng kơthung rơ-ơ̆, pok prong hăng djru brơi Dak Lak pok pơhai ngă amăng 30 hrơi pơgiong anih răk pioh kual pla.

Samơ̆, hơdră bruă phun kiăng gơnong bruă sầu riêng pơđĭ kyar hơđong kjăp ăt lĕ pơjing pran đăo gơnang mơng anih anom sĭ mơdrô hăng bruă ngă hmua hơmâo tơlơi glăm ba. Rĭm gơnam tam kiăng tong ten anih pla, pơsittong tơlơi glăm ba mơng rĭm čô mơnuih amăng bruă ngă hmua. Lơm gơnam pơhlôm hiam hơdjă hăng tong ten, sầu riêng Việt Nam kah ƀơƀrư̆ pơjing anăn apăn sĭ mơdrô dêh čar, pok prong “glông mơtah” ba sĭ mơdrô pơ tač rơngiao hăng plai ƀiă gơnang nao sa anih sĭ mơdrô đôč.

Ơi Nguyễn Hòang Hiệp lăi: “Kiăng pơjing pran đăo gơnang mơng anih anom sĭ mơdrô, djop gơnam tam lêng kơ thâo tong ten anih pla, thâo gơnam yua hlơi pla, bruă pla pơjing hiưm pă ñu hăng lơm ngă soh amra thâo hlơi pô amra glăm ba. Lơm anih pơƀuh brơi tong ten atur phun hơmâo pok pơhai, ƀing gơmơi amra hrŏm hăng ƀon lan ngă tui ha amăng plĕ bruă anai”./.