Amăng ayuh hyiăng pơ-iă hang kual giăm guai, bruă man pơdong ƀơi Sang hrăm kơnuk kơna čem rông ba pơlir dua gưl Ia R’vê, să Ia R’vê pơphun ječ ameč. 45 čô mơnuih apăn bruă, ling tơhan hơmâo anom bruă git gai ling tơhan tơring čar Dak Lak kơtưn pơčlah jing lu grup, gum hrŏm hăng kông ñơn djru lu bruă mơng man pơkra amăng sang hră truh pơ bruă pơkra pơga jum dar. Ƀing mơnuih mă bruă hơmâo pơpha bruă tui mông phara kiăng pơhlôm ngă tañ, na nao. Khua tơhan Thượng úy Nguyễn Bá Công, pô mut hrŏm man pơdong sang hră kơnuk kơna čem rông ba pơlir dua gưl Ia R’vê brơi thâo. “Ƀing adơi ayong pơpha jing dua grup, sa grup man pơnăng, pơkra rang; grup dŏ glăi tuh ƀêtông ngă glông atur, man gong pơga jum dar. Ƀing gơmơi pơpha jing 2 ka, ka 1 mơng 6 mông mơguah truh 10 mông 30 mơnit yang hrơi dong anun pơdơi ƀong huă; ka 2 pơphun mơng 1 mông 30 mơnit truh pơ 4 mông 30 mơnit tlam”.

Sang hră kơnuk kơna čem rông ba pơlir dua gưl Ia R’vê hơmâo abih tih prăk tuh pơ alin 185 klai prăk, hơmâo anih hrăm, anih dŏ, sang pơđok hră, sang yua phara, sang mă bruă hăng hơdôm anih anom mă yua ha amăng plĕ; laih dong pơplih pơkra sa, dua ring bruă glăk hơmâo amăng sang hră gưl II Nguyễn Thị Định. Ơi Nguyễn Quang Khánh, pô git gai bruă man pơdong brơi thâo, hơdôm anih anom man pơdong glăk đing nao pơgiong kiăng hmao tlôn ĕp lăng, jao glăi djơ̆ hrơi mông pơkă. “Tlâo boh kông ti man pơdong ƀơi anai hơmâo 5 boh rơdêh čuk, tơdah ta kiăng ngă hơget amra iâu mơtăm. Rơdêh pơdŭ pơgiăng hơmâo rơbêh 20 boh, hơmâo rơdêh ƀen, rơdêh guăi, rơdêh glĭt; tơdah kiăng lêng kơ hơmâo soh. Kơ mơnuih mă bruă, gah kông ti gơmơi hơmâo giăm 30 čô kông ñơn hăng kỹ sư; dua boh kông ti dŏ glăi hăng ling tơhan hơmâo mơng 80-90 čô mơnuih. Abih bang lêng kơ glăk đing nao bruă man pơdong”.

Tơlơi tơnap tap hloh amăng tlâo akŏ bruă lĕ Sang hră kơnuk kơna čem rông ba pơlir dua gưl Ia Lốp yua ataih đơi, bruă pơdŭ pơgiăng gơnam tam hăng pơphun bruă man pơdong bưp tơnap tap. Kiăng djru brơi anom bruă tuh pơ alin hăng man pơdong, tơring čar Dak Lak hơmâo pơkiăo nao rơbêh 60 čô mơnuih apăn bruă, ling tơhan mut hrŏm man pơdong, pơgôp ngă tañ tui bruă man pơdong.

Tui anom bruă črâo ba, ră anai ƀơi anih man pơdong hơmâo giăm 40 boh măi mok hrŏm hăng rơbêh 140 čô kỹ sư, kông ñơn mă bruă na nao. Ơi Nguyễn Thế Quang, anom bruă črâo ba man pơdong brơi thâo, lu anih man pơkra hơmâo pơgiong gong tơmeh hăng glăk hơdai nao man pơgiong abih, dưm truă glông hrĕ apui lơtrik, đing ia hăng bah amăng. “Hơmâo ling tơhan djru brơi yua anun bruă man pơdong hơmâo pơtrut tañ ƀiă. Samơ̆ hơdôm anom bruă arăng jao, lơm ƀuh ling tơhan ngă klă anun ƀing gơñu ăt gir run ngă tui mơn, yua hŭi ngă kah tui tơlơi pơkă bruă mă. Hơdôm anom bruă man pơdong glăk gir run pơtrut tañ bruă mă kiăng jao glăk sa boh sang hră gưl I hlâo kơnôl 31/7, lăng tui tơlơi anun kiăng pơtrut pơsur ngă tui ƀơi hơdôm anih man pơdong pơkŏn dong”.

Tui tơlơi pơkă rơwang thun 2025-2027, Dak Lak man pơdong 4 boh sang hră kơnuk kơna pơlir dua gưl ƀơi kual giăm guai. kơnong tlâo boh sang hră Ia R’vê, Ia Lốp hăng Ƀuôn Đôn kiăng pơgiong djop tơlơi gal kiăng ba mă yua mơng thun hrăm 2026-2027 mơtăm.

Ƀơi tơring čar Dak Lak, mah bơdjơ̆ nao mơng ayuh hyiăng, nua gơnam tam hăng bruă kơƀah mơnuih mă bruă, hơdôm anom bruă man pơdong hơmâo tŏ tui pơhlôm lu mơnuih man pơkra, pơkiăo djop mơnuih mă bruă, măi mok hăng gum hrŏm hăng ling tơhan kiăng pơhlôm djơ̆ hrơi mông. Ơi Võ Văn Lợi, kơ-iăng Khua khul wai lăng akŏ bruă man pơdong ring bruă mơnuih ƀôn sang hăng tuh tia pơkra ming tơring čar Dak Lak brơi thâo, truh ră anai, hơdôm ring bruă hơmâo pơgiong rơbêh 80% bruă mă; lu anih man pơkra yak nao hrơi mông pơgiong, dưm truă măi mok gơnam tam. “Khul hơmâo pok pơhai ngă bruă 70 hrơi mlăm, pơkiăo nao ƀing apăn bruă, kỹ sư nao ngă bruă, ƀong huă, dŏ hrŏm kiăng pơsir hĭ tơlơi tơnap tap, gun găn hăng juh alum pran jua hơdôm anom bruă man pơdong djơ̆ hrơi mông tui tơlơi git gai mơng Ding jum kơđi čar kah hăng Ping gah tơring čar, Jơnum min pơ ala mơnuih ƀôn sang, Jơnum min mơnuih ƀon sang tơring čar. Čang rơmang ayuh hyiăng gêh gal, hơjan kơthel huăi bơdjơ̆ nao kiăng djop sang hră amra pơgiong djơ̆ hrơi mông, čơkă čơđai mut hrăm amăng thun hrăm 2026-2027”.

Hăng tơlơi mut hrŏm khut khăt mơng anih anom kơđi čar, tơlơi gir run mơng anom bruă man pơdong hrŏm hăng tơlơi gum djru prong mơng ling tơhan, hơdôm boh sang hră kual giăm guai Dak Lak glăk ƀơƀrư̆ hơmâo pơgiong, djă ba tơlơi čang rơmang kơ sa anih hrăm prơng rơhaih brơi ƀing čơđai kual tơnap tap. Bruă man pơdong ječ ameč ăt tŏ tui, kiăng pơhlom hơdôm boh sang hră tañ pơgiong, pok rai anih hrăm klă ƀiă brơi ƀing čơđai djuai ania ƀiă kual giăm guai lŏn ia ta./.