Dưi hmâo “Mơnuih ƀôn sang đăo gơnang, Ping gah ruah” thun anai lĕ rơwang bruă tal 2 ơi Đỗ Hiền Lương gơgrong bruă Git gai Ping gah Khul ngă rah Khua thôn 2 tơring kual Sa Thầy, tơring glông Sa Thầy. Kiăng ngă pơhlôm bruă Khua git gai Ping gah khul hăng 67 čô mơnuih ping gah hăng Khua plơi ƀơi tơring glông, hmâo tơlơi rơkâo prong gah pơđĭ kyar wot bruă đang hmua hăng sĭ mơdrô, tui hăng ơi Lương, khom sit nik lĕ mơ̆ng Ping gah, mơ̆ng mơnuih ƀôn sang, jing phun gum hrŏm hơbit:

 “Hơdôm bruă mă ƀơi tơring glông lĕ lu mơta, lu hơdră, ƀu yap hrơi mông ôh, sit lăi hmâo bruă lĕ pơsir yơh. Mơnuih ƀôn sang đăo gơnang ruah pô đĭ ngă khua, ta khom ngă djơ̆ tui pran đăo gơnang pơsir lăp djơ̆ bruă mơ̆ng mơnuih ƀôn sang ƀu pioh hlơi mơ̆ pioh hmâo tơlơi truh kơplah wah ƀing gŏp iao gah laih anun kơplah wah plơi pla anai hăng plơi pla adih. Mơ̆ng hrơi kâo ngă khua truh ră anai akă hmâo tơlơi hơget gưl dlông jăm ƀuah ôh. Lăi hrŏm bruă pơsir hơđong mơn”.

Kiăng ngă tui hơdră pơtrun pơplih phrâo anăn Khua git gai ping gah khul ngă rah Khua plơi hăng Khua git gai khul Ping gah ngă rah Khua Grŭp hyu mă bruă Jơnum min djop djuai ania plơi, amăng hơdôm thun rơgao tơring glông Sa Thầy đing nao ngă klă bruă ruah mă mơnuih mă bruă pơhlôm gah bôh thâo, bruă mă, kơnuih mă bruă, hơdră mă bruă hăng pran đăo kơnang. Yua anun, khul mơnuih git gai ping gah ngă rah khua plơi hmâo pơdah laih bruă mă git gai kơđi čar, phun than gum hrŏm hơbit ƀơi hơdôm bôh anom ping gah, plơi pla. Yă Y Sâm, Kơ-iăng Khua git gai Ping gah tơring glông, Khua Khul pơ ala mơnuih ƀôn sang tơring glông Sa Thầy brơi thâo:

 “Bruă blung a khom pơsit anun lĕ bruă ruah mă sit nik. Ruah mă hơdôm mơnuih hmâo arăng đăo gơnang, hơdôm mơnuih thâo hluh kơ hơdră pơtrun mơ̆ng Ping gah, hơdră bruă, tơlơi phiăn mơ̆ng Kơnuk kơna. Mơnuih ƀôn sang khom đăo gơnang, Ping gah ruah. Kual tơnap tap črâo ba anom bruă pel ĕp hăng mơnuih hlăk ai apăn bruă, tơdăm dra hăng biă ñu hăng ƀing čơđai hmâo hrăm mă ƀăng cấp. Dua lĕ hăng ƀing čơđai mơ̆ nao ngă tơhan pơwot glăi kiăng pơlar Ping gah pơtô pơhrăm mơnuih ƀơi plơi pla”.

Hăng pran pơsit ngă giong hơdră pơtrun mơ̆ng Ping gah dêh čar hăng mơ̆ng tơring čar, truh blan 8/2023 amăng 64 bôh plơi, gah 11 bôh să, tơring kual mơ̆ng tơring glông Sa Thầy hmâo laih 53 čô Khua git gai Ping gah khul ngă rah Khua plơi hăng 11 čô Khua git gai Ping gah Khul ngă rah Khua Grŭp hyu mă bruă Jơnum min djop djuai ania plơi. Bôh nik brơi ƀuh bruă pơplih bruă apăn Khua git gai Ping gah Khul ngă rah Khua plơi ƀudah Khua Grŭp hyu mă bruă Jơnum min djop djuai ania plơi hmâo djru ngă rơguăt bruă čar, hrŏ trun 64 čô khua apăn bruă ƀơi plơi hăng bruă pơƀut ƀơi sa anih amuñ kơ bruă pok pơhai, ngă tui.

Gơnang kơ dưi ruah hơdôm mơnuih hmâo bôh thâo git gai, wai lăng, črâo ba, hur har mă bruă, khin pơmin, khin ngă, abih pran jua hăng bruă mă hăng hmâo pran đăo gơnang prong amăng mơnuih ƀôn sang anun hmâo ngă tui ba glăi bôh tơhnal bruă mă. Ơi Phan Chí Thiện, Khua git gai Ping gah să Ya Ly, tơring glông Sa Thầy pơtŏng sit:

 “Tlâo plơi neh wa hơđăp lĕ Khua git gai Ping gah khul ngă rah khua plơi lĕ mơnuih hơđăp ƀơi anai, thâo hluh kơ neh wa, tơlơi bơwih ƀong tơlơi hơdip mơda plơi pla, yua anun gêh gal hăng bruă ngă Khua git gai Ping gah khul lĕ brơi kơ hơdră pơtrun hăng dua lĕ pơphun ngă tui bruă mă mơ̆ng Khua plơi. Gêh gal kơ bruă ngă tui hơdôm hơdră pơtrun mơ̆ng Ping gah, tơlơi phiăn mơ̆ng Kơnuk kơna”.

Bơ̆ ơi Nguyễn Minh Thuận, Khua git gai Ping gah tơring kual Sa Thầy, tơring glông Sa Thầy brơi thâo:

 “Ping gah ăt hrưn đĭ laih ngă giong abih bang bruă pơplih bruă apăn anai. Gêh gal lĕ ƀơi anăp tŭ mă, lăi pơthâo hmao tlôn hơdră pơtrun, hơdră bruă mơ̆ng Ping gah hăng pô ƀơi anăp pơplih phrâo, pơdŏng kơčăo bruă pioh pok pơhai ngă tui ƀơi plơi pla pô. Gêh gal tal dua lĕ ƀuh bruă pơdŏng Ping gah ăt pơđĭ tui hăng pơplih phrâo mơn jơlan gah, bruă git gai mơ̆ng Ping gah biă ñu lĕ bruă mă mơ̆ng Khua git gai Ping gah Khul ƀơi plơi pla”.

Mơ̆ng hơdôm bôh tơhnal blung a bruă ngă tui pơplih phrâo bruă apăn Khua git gai Ping gah Khul ngă rah Khua plơi hăng Khua git gai Ping gah khul ngă rah Khua Grŭp hyu mă bruă Jơnum min djop djuai ania plơi, Ping gah tơring glông Sa Thầy glăk lăng tui, pơtrut, pel ĕp, hrŏm hăng anun hmâo tơlơi pơplih pơkra hmao tlôn kiăng mơnuih dưi hmâo “Mơnuih ƀôn sang đăo gơnang, Ping gah ruah” ngă tui klă bruă pô mă, bruă gơgrong mơ̆ng pô. Gah sui thun Ping gah tơring glông Sa Thầy amra pel ĕp, pơsit bôh thâo, bruă mă, pran đăo gơnang mơ̆ng khul mơnuih apăn bruă plơi pla, mơnuih ping gah amăng hơdôm khul grŭp Ping gah pioh ruah mă mơnuih apăn bruă; lăng yôm bruă pơtô pơhrăm brơi, pơđĭ tui bôh thâo, bruă mă hăng hmâo hơdră bruă djru lăp djơ̆ pioh khul mơnuih anai hơđong pran jua mă bruă. Yap hrŏm đơ đam tơring čar Kon Tum, hmâo laih 360 amăng mrô 756 bôh plơi, grŭp mơnuih ƀôn sang hmâo Khua git gai Ping gah ngă rah Khua plơi, khua grŭp mơnuih ƀôn sang hăng Khua git gai Ping gah khul ngă rah Khua Grŭp hyu mă bruă Jơnum min djop djuai ania. Bruă pơplih bruă apăn anai djru ngă rơguăt lăp yap ba bruă čar ƀơi hơdôm bôh plơi pla./.