Sit truh rơnuč rơwang hrơi tơjuh ƀudah hrơi pơdơi lơphet, 21 čô mơnuih ping gah dưi hmâo Puih kơđông pơgang guai dêh čar ƀơi Axan dưi pơpha bruă gơgrong lăng ba 95 bôh sang anô̆ ƀơi 2 bôh să Axan hăng Tr’hy, tơring glông Tây Giang (tơring čar Quảng Nam) glăi nao čuă hơdôm bôh sang anô̆ mơnuih ƀôn sang ƀơi kual dêh čar. Thâo tơlơi pơmin, tơlơi čang rơmang hrom hăng bruă hơduah ĕp lăng tŏng ten tơlơi pơmin hơdră ngă mơng neh wa, mơnuih apăn bruă tơhan, ling tơhan Puih kơđông pơgang guai dêh čar Axan hmâo pok pơhai laih lu jơlan hơdră, črăn bruă djru neh wa kual guai dêh čar, djru sang anô̆ tơnap tap hrưn đĭ tơtlaih mơng ƀun rin.

Sang anô̆ ơi Bliềng, ƀơi plơi Ki’noonh, să Axan, hlâo adih gah sang anô̆ ƀun rin. Mơng hrơi dưi hmâo ƀing ping gah Puih kơđông pơgang guai dêh čar Axan djru ba, pơtô brơi hơdră bơwih ƀong huă, tơlơi hơdip mơda sang anô̆ ơi Bliềng hmâo pơplih rơđah đông laih.

 “Hlâo adih sang anô̆ kâo tơnap tap, tơlơi hơdip kơƀah tơnap djop mơta, dưi hmâo ƀing ling tơhan Puih kơđông pơgang guai dêh čar djru pơjeh pla, pơtô brơi hơdră bơwih brơi anun pŭ un pơlar klă, ba glăi tơlơi bơwih ƀong kơ sang anô̆. Bơni kơ ƀing ling tơhan lu biă”.

Tơlơi gum djru mơng ƀing ping gah Puih kơđông pơgang guai dêh čar Axan hmâo djru sit nik pơsur mơnuih ƀôn sang yak rơgao tơlơi tơnap mă bruă ngă đang hmua. Thượng uý Nguyễn Văn Trọng, Khua Grŭp pơsur mơnuih ƀôn sang, Puih kơđông pơgang guai dêh čar Axan brơi thâo, anom pơpha rim Ping gah gơgrong djru ba mơng 5 truh kơ 7 bôh sang anô̆, sang anô̆ ƀu hmâo mơnuih gơnang, tơlơi hơdip tơnap. Kơnong ñu gơgrong ba 5 bôh sang anô̆.

 “Pơphun mơng tơlơi bơwih ƀong mơnuih mơnam ƀơi anih puih kơđông wai lăng, tơlơi hơdip mơda mơng mơnuih ƀôn sang lăi hrom dô̆ bưp lu tơlơi tơnap. Puih kơđông pok pơhai lu hơdră djru mơnuih ƀôn sang pơđĭ kyar bơwih ƀong. Tơdơi kơ dưi hmâo mơnuih apăn bruă mơng Ling tơhan pơgang guai dêh čar pơ̆ Axan djru ba, pơtô brơi bruă tơjŭ pla, rông hlô mơnong, mơnuih ƀôn sang amăng ƀrư̆ ĕp ƀuh jơlan nao mơng sang anô̆ amăng pơđĭ kyar bơwih ƀong. Biă ñu lĕ hơdôm hơdră pơđĭ kyar bơwih ƀong sang anô̆ hmâo ba glăi laih bôh tơhnal bơwih ƀong prong, djru hmâo dong prăk pơhrui glăi pioh kơ tơlơi hơdip mơda mơng neh wa ƀơi anai”.

Kiăng pok pơhai ba glăi bôh tơhnal hơdră Ping gah Pơgang guai dêh čar gơgrong bruă, djru sang anô̆ ƀơi kual guai dêh čar, Puih kơđông pơgang guai dêh čar Axan ruah mă hơdôm mơnuih apăn bruă tơhan, ling tơhan hmâo tơlơi găn rơgao, thâo hluh phiăn juăt mơng neh wa. Mơng anun, ngă tui bruă mă amăng pơphô brơi, pơphun ngă tui, djru neh wa amăng ƀrư̆ pơđĭ kyar bơwih ƀong, hrŏ trun rin rơpa. Thiếu tá Nguyễn Văn Lợi, Khua git gai Ping gah, Bruă kơđi čar Puih kơđông pơgang guai dêh čar ƀơi Axan, tơring glông Tây Giang, tơring čar Quảng Nam brơi thâo: Mơng hrơi pok pơhai hơdră pơpha mơnuih ping gah gơgrong bruă, djru ba sang anô̆, tơlơi hơdip mơda neh wa pơplih rơđah laih, hmâo lu sang anô̆ hrưn đĭ ngă pơdrong.

 “Puih kơđông pơkiăo nao mơnuih ping gah pơ̆ plơi gơgrong djru ba sang anô̆ ƀun rin. Bôh than kiăng thâo tơlơi hơdôm bôh sang anô̆ anai kiăng thâo gơñu kiăng tơlơi hơget pioh pơphô brơi gum hrom hơdôm gưl kiăng djru brơi kơ neh wa. Hluai tui hơdôm hơdră gum djru mơnuih ƀôn sang pơđĭ kyar bơwih ƀong mơnuih mơnam, jơlan hơdră anai mơng Ling tơhan pơgang guai dêh čar pơphun ră anai tơlơi hơdip mơda mơng neh wa mơnuih ƀôn sang amăng ƀrư̆ thâo pơđĭ kyar bơwih ƀong. Ră anai hơdôm bôh sang anô̆ amăng ƀrư̆ ngă pô dưi bơwih ƀong huă mơng pô”.

Đại tá Nguyễn Bá Hưng, Kơ-iăng Khua git gai Ping gah Ling tơhan pơgang guai dêh čar tơring čar Quảng Nam brơi thâo, Ping gah, Ƀirô git gai Ling tơhan pơgang guai dêh čar tơring čar hmâo črâo ba laih Gưl Ping gah 11 bôh Puih kơđông pơgang guai dêh čar gum hrom hăng Ping gah, Jơnum min mơnuih ƀôn sang 30 bôh să, phường guai dêh čar, ia rơsĭ bul ia rơsĭ pơpha 212 čô mơnuih ping gah gơgrong bruă rơbêh kơ 1.000 bôh sang anô̆ mơnuih ƀôn sang. Amăng anun, hmâo 132 čô mơnuih ping gah gơgrong 720 bôh sang anô̆ lĕ mơnuih djuai ania ƀiă. Lu mơnuih ping gah hmâo hơdră ngă klă, hmâo akô̆ tlôn, pơjing kơčăo bruă, tơhnal ba tơbiă rơđah djru hơdôm bôh sang anô̆ mơnuih ƀôn sang dưi pơpha gơgrong ba. Đại tá Nguyễn Bá Hưng pơtŏng sit, yak blung a, ƀing ping gah hmâo pơsur laih lu sang anô̆ pơdŏng klă tơlơi hơdip mơda bôh thâo, ƀu ngă soh tơlơi phiăn kơnuk kơna, tơlơi črih čruai mơnuih mơnam, pơsit jơlan gah kơ neh wa kual guai dêh čar pơđĭ kyar bơwih ƀong ba glăi bôh tơhnal.

 “Mơnuih ping gah dưi pơpha bruă gơgrong djru ba sang anô̆, rim blan pơdŏng kơčao bruă rơđah kiăng đing nao djru hơdôm sang anô̆ amăng bruă pơđĭ kyar bơwih ƀong mơnuih mơnam, gum hrom wai lăng tơlơi rơnuk rơnua plơi pla. Hơdră dưi pok pơhai ba glăi bôh tơhnal biă pơsur djru 10 bôh sang anô̆ hmâo tơlơi rô nao rai tơnap pơplih bruă mă tơlơi pơmin, ƀu gum hrom hơdôm tơlơi črih čruai mơnuih mơnam, ƀu ngă soh tơlơi phiăn. Rơngiao kơ anun, dô̆ djru ba 25 bôh sang anô̆ tơtlaih ƀun rin, djru klă bruă pơgang guai dêh čar, pơđĭ kyar bơwih ƀong mơnuih mơnam ƀơi plơi pla”./.