VOV4.Jarai-Rơwang hrơi tơjuh rơgao, ƀơi sang jơnum prong khua mua pơ ala mơnuih ƀôn sang dêh čar, ơi Vương Đình Huệ, Khua git gai pơ ala mơnuih ƀôn sang dêh čar hơmâo git gai jơnum hăng khua mua djop anom bruă, jơnum min gah sang bruă khua pơ ala mơnuih ƀôn sang dêh čar, pok pơhai bruă mă 6 blan rơnuč thun 2022. Ƀơi mông jơnum, ơi Vương Đình Huệ pơtrun hiăp kơ djop sang bruă, jơnum min gah anom bruă pơ ala mơnuih ƀôn sang dêh čar ngă tui djơ̆ tơlơi pơtrun mă bruă, pơđĭ tui boh tŭ yua yôm lu hloh amăng bruă mă, kiăng pơgang djơ̆ lăp tơlơi pơtrun, bruă mă, lăng ba hlom bom, đơr hơr hăng djơ̆ phun.

Hră lăi pơthâo yua mơ̆ng Khua čih pioh kơ anom bruă khua pơ ala mơnuih ƀôn sang dêh čar, ơi Bùi Văn Cường brơi thâo, 6 blan akŏ thun djop anom bruă, jơnum min hơmâo lăi pơthâo, bơwih brơi truh kih 2 wơ̆t jơnum lok khua mua pơ ala mơnuih ƀôn sang dêh čar, 6 wơ̆t jơnum mơ̆ng Jơnum min apăn bruă phun pơ ala mơnuih ƀôn sang dêh čar, 4 grup hyu ĕp lăng mơ̆ng khua mua pơ ala mơnuih ƀôn sang dêh čar, jơnum min apăn bruă phun, 1 wơ̆t jơnum khua mua pơ ala ngă bruă sa hnong tong ten hăng mă bruă  lu grup khua mua anom bruă, jơnum min apăn bruă phun pơ ala mơnuih ƀôn sang dêh čar, khua mua git gai pơ ala mơnuih ƀôn sang dêh čar ngă hrom hăng khua djop anom bruă, jơnum min laih anun djop tơring čar.

Lăi pơthâo, ngă giong amăng 50/137 akŏ bruă mă čih pơkra tơlơi phiăn gah anăp Hơdră akŏ pơdong čih pơkra tơlơi phiăn amăng rơwang bruă tal 15 mơ̆ng khua mua pơ ala mơnuih ƀôn sang rui hăng Hră klah čun mrô 19 mơ̆ng Ding jum kơđi čar. Lăi pơthâo ngă giong 2 kơčăo bruă kah akŏ bruă “Bruă ngă akŏ pơdong hăng pơgiong Kơnuk kơna git gai mơnuih mơnam ngă khua pô XHCN Việt Nam truh thun 2030, anăp nao pơ thun 2045”. Bruă mă lăi pơthâo, bơwih brơi pơtom hiăp dưi pơphun beč bal djơ̆ hơdră, tong ten hăng thâo hruaih.

Jơnum abih bang

Tơdơi kơ hmư̆ lu tơlơi pơgôp hiăp, Khua git gai pơ ala mơnuih ƀôn sang dêh čar ơi Vương Đình Huệ bơni, lăng yôm amăng 6 blan akŏ thun, djop anom bruă, sang bruă gah khua pơ ala mơnuih ƀôn sang dêh čar hơmâo gir run prong biă mă, pơđĭ tui boh tŭ yua amăng bruă mă, pơƀuh rơđah amăng hơdôm gưl jơnum khua mua pơ ala mơnuih ƀôn sang dêh čar tal XV ăt pơblih phrâo na nao, djop mông jơnum mơ̆ng jơnum min gah sang bruă khua pơ ala, jơnum mơ̆ng Jơnum min apăn bruă phun, jơnum min Djuai ania, djop khul grup ƀing khua pơ ala, rĭm kơ mơnuih ngă pô pơ ala; bruă ngă hơdai gum hrom plah wah khua pơ ala mơnuih ƀôn sang dêh čar, khua mir sir, khua dêh čar kơnuk kơna, anom bruă wai lăng djop djuai ania mơnuih mơnam, sang phat kơđi dêh čar, anom bruă pel ĕp kơđi mơnuih ƀôn sang dêh čar, anom bruă jŭ yap kơnuk kơna, djop sang bruă, khul grup djru bruă kơđi čar pơkŏn.

Lăp gleng nao biă mă, rơngiao kơ bruă ngă giong akŏ bruă jao, ƀing pơ ala mơnuih ƀôn sang dêh čar ăt ngă giong hăng ngă djơ̆ bruă mă phrâo, pơđôm glăi lu tơlơi hơdor pioh, bruă mă pơprong, tŭ yua klă, ƀuh rơđah tơlơi kơhnâo kơhnăk amăng bruă, ba tơhnal ba glăi amăng bruă čih pơkra tơlơi phiăn, krăo lăng, pơsit bruă mă dêh čar, bruă pơtom hiăp pơpha bruă mă djơ̆ rơ-ua wơ̆t hăng bruă mă gah rơngiao. Gah tơlơi git gai pơtô brơi anom bruă pơ ala mơnuih ƀôn sang djop tơring čar hơmâo ngă tui tong ten klă hiam. Bruă mă bưp mơnuih ƀôn sang ăt lu tơlơi pơblih mơ̆n, kơtưn bruă glăm ba mơ̆ng djop sang bruă pơdjơ̆ nao hrom.

“Ping gah, khul grup mơnuih mut phung mơ̆ng anom bruă pơ ala mơnuih ƀôn sang, Jơnum min apăn bruă phun pơ ala mơnuih ƀôn sang dêh čar, djop anom bruă hơmâo pơtô lăi ngă tui khut khăt tơlơi git gai mơ̆ng Ding jum kơđi čar, grup khua mua git gai ping gah, hmao kru ngă tui djơ̆ hơdôm tơlơi pơtrun mơ̆ng ping gah, mơ̆ng gơnong dlông, djop mơta hră pơtô ngă bruă lêng kơ ngă djơ̆ soh hăng tơlơi kiăng man pơdong hăng pơđĭ kyar lŏn ia, amăng bruă bơwih ƀong huă mơnuih mơnam, pơgang lŏn ia, rơnuk rơnua hăng pơtom hiăp, biă mă ñu bruă mă mơdua mơ̆ ƀing ta lêng kơ lăi ăt wai lăng klin kheng beč bal hmar hloh tŭ yua pơgăn Covid 19 laih anun rŭ glăi pơđĭ kyar bơwih ƀong huă mơnuih mơnam. Tơlơi anai hơmâo anŏ pơgôp hrom prong biă mă glăm ba tơpă mơ̆ng khua mua pơ ala mơnuih ƀôn sang dêh čar ta”.

Khua git gai pơ ala mơnuih ƀôn sang dêh čar brơi thâo, bruă pok pơhai hơdôm tơlơi pơtrun mơ̆ng dêh čar, Ding jum kơđi čar, grup git gai ping gah dêh čar hăng prăp lui, čih pơkra hră lăi pơthâo mơ̆ng Ming gah grup mut phung amăng anom bruă khua pơ ala mơnuih ƀôn sang hăng lu hră pơtrun yôm, kơčăo bruă mơ̆ng dêh čar, ding jum kơđi čar, grup khua mua git gai ping gah dêh čar lăng yôm soh kơ boh tơhnal tŭ yua hăng anŏ hmar hmao kru, čih pơkra lu, kơpal hơmâo tơlơi drơ̆ng glăi laih anun boh tŭ yua klă.

Kơ bruă mă pơ anăp anai, Khua git gai pơ ala mơnuih ƀôn sang dêh čar ơi Vương Đình Huệ pơtrun hiăp djop sang bruă gah anom bruă khua pơ â mơnuih ƀôn sang ngă tui djơ̆ tơlơi phiăn pơtrun mă bruă, pơđĭ tui boh tŭ yua lu amăng bruă mă, djơ̆ hơdră jao, tơlơi pơkă, lăng nao hlôm bom laih anun djơ̆ tong ten, anăm lui sui hơdôm boh yôm phun kiăng ngă bruă.

Khua git gai pơ ala mơnuih ƀôn sang dêh čar brơi thâo, bruă pok pơhai ngă tui Hră pơtrun mơ̆ng Gơnong dlông, biă mă ñu kiăng ngă hrom amăng lăm, djop bruă tơlơi kơhnâo kơhnăk, hơdôm grup anet ngă tui kjăp ba glăi boh tŭ yua, ngă tui tum teč rim bruă jao, kiăo tui djơ̆ hơdră pơčrâo ba mă bruă mơ̆ng Ping gah gah anom bruă khua pơ ala mơnuih ƀôn sang, mơ̆ng Jơnum min apăn bruă git gai pơ ala mơnuih ƀôn sang.

Pơdah rai pran jua tŭ ư hăng akŏ bruă tañ pơphun jơnum pơƀut bruă mă, Khua git gai pơ ala mơnuih ƀôn sang dêh čar brơi ngă tañ pok pơhai boh yôm phun tui Hơdră čih pơkra tơlơi phiăn, hră pơtrun thun 2022, kiăo tui tlep anăp ngă bruă amăng sa gưl tui Tơlơi klah čun mrô 19-KL/TW mơ̆ng Ding jum kơđi čar; pok pơhai akŏ bruă krăo lăng mơ̆ng khua pơ ala mơnuih ƀôn sang dêh čar hăng Jơnum min apăn bruă phun pơ ala mơnuih ƀôn sang dêh čar thun 2022 laih anun  yak nao bruă či ngă amăng akŏ thun 2023; krăo lăng, pok pơhai hơdôm hră pơtrun mơ̆ng khua pơ ala mơnuih ƀôn sang dêh čar...

Hrom hăng anun, pơphun klă boh yôm phun kơ jơnum tơña, lăi glăi amăng akŏ blan 8; pơphun jơnum hăng ƀing mơnuih rơgơi kơhnâo lăi pơthâo hơdră pơphun jơnum bơwih ƀong huă thun 2022.

Nay Jek: Pơblang