Anih pơtô hrăm “Măi komputơr soh sel” hơmâo pơphun dong mơng blan 3 thun 2024 hăng pơtô hrăm amăng mơmŏt hrơi năm, hrơi tơjuh rĭm rơwang hrơi tơjuh ƀơi sang hră gưl tlâo Chi Lăng, phường Chi Lăng, plơi prong Pleiku. 30 čô mơnuih kiăo tui hrăm mơng plơi Ia Lang, phường Chi Lăng lêng kơ kiăo tui hrăm djop soh. Ơi Puih Chyh, 60 thun, mơnuih kiăo tui hrăm tha rơma hloh brơi thâo:

“Kâo nao hrăm hrŏm lĕ kiăng pel ĕp kơ bruă yua măi komputơr, kiăng hloh rơđah dong kơ tơlơi hơdip mơnuih mơnam ră anai. Ƀing nai pơtô lêng kơ abih pran jua, črâo brơi bruă mă yua, bruă čoh boh hră pơ-ar amăng măi komputơr, kâo hok mơ-ak biă mă”.

Hăng hơdôm anom bruă, khul grup, ƀing mơnuih, bruă mă yua măi komputơr lĕ tơlơi juăt ƀuh ră anai, anai lĕ ƀu kơƀah ôh amăng tơlơi hơdip mơda hăng bruă mă, samơ̆ neh met wa amăng plơi Ia Lang, anai lĕ tơlơi dŏ phrâo. Samơ̆ ăt mơng anun, anih pơtô hrăm anai pơhưč lu mơnuih. Ƀing mơnuih kiăo tui hrăm hơmâo ƀing tha rơma hăng ƀing hlăk ai čơđai dong. Amon H’K’riêng, 14 thun, sa čô mơnuih kiăo tui hrăm dŏ hlăk ai brơi thâo:

“Kâo bơni biă mă kơ ƀing ani hơmâo abih pran jua pơtô brơi ƀing gơmơi, yua anai lĕ tal blung a kâo hrăm yua măi komputơr yua anun dŏ sư̆ rơbư̆, lơm nao hrăm hrŏm hơmâo ƀing nai pơtô brơi mơng čih boh hră amăng Word, pơdah amăngPowerPiont, bruă jŭ yap amăng Excel. Kâo bơni biă mă ƀing nai hơmâo črâo brơi tong ten, yua anun ƀing gơmơi dưi tŭ mă djop boh thâo hăng tañ ƀiă dong amăng bruă yua măi komputơr. Kâo bơni biă mă kơ ƀing nai”.

Jơlan hơdră pơtô hrăm hơmâo hơdôm boh thâo bơdjơ̆ nao măi komputơr mơng bruă čih amăng Word, jŭ yap amăng Excel, truh pơdah amăng PơwerPiont, bruă dưm pioh phần mềm hăng pơsir hĭ hơdôm anŏ soh amăng măi komputơr. Sang hră gưl tlâo Chi Lăng hơmâo jao brơi 3 čô nai pơtô tui bruă pơtô hrăm gah măi komputơr hrŏm hăng 30 boh măi komputơr kiăng ngă gêh gal hloh brơi kơ ƀing mơnuih kiăo tui hrăm. Nai Đồng Ánh Dương, nai pơtô măi komputơr brơi thâo:

“Anih pơtô hrăm pơphun mơ-ak biă mă. Sang hră hơmâo 30 boh măi komputơr hăng jao 3 čô nai pơtô hrăm hăng djru brơi. Ƀing gơmơi hơmâo ruah ƀing mơnuih hrăm rơgơi hloh kiăng kơ nao pơplông mă hră pơsit yua măi komputơr ƀơi anih mă bruă jar kmar”.

Tơdơi kơ hrơi mông hrăm, anih pơtô hrăm hơmâo pơđut hĭ rơwang pơtô hrăm akŏ blan 10. Tui anun, 30 čô mơnuih kiăo tui hrăm hơmâo yua čih hră pơ-ar rơguăt hloh hăng mă yua djop mơta tơlơi tŭ yua mơng internet. Amai H’Tinh, Khua git gai Ping gah ngă rah khua plơi Ia Lang, ñu lĕ sa amăng ƀing mơnuih rơgơi hloh mơng tal pơtô hrăm anai, him lăng amra tŏ tui hrăm kiăng mă hră pơsit yua măi komputơr glông ƀiă dong. Amai H’Tinh brơi thâo:

“Plơi Ia Lang hơmâo 12 čô mơnuih hơmâo mă hră pơsit hrăm giong, amăng anun hơmâo 5 čô mơnuih rơgơi hloh. Pơ anăp anai, sang hră Chi Lăng amra ngă gêh gal kiăng ƀing kiăo tui hrăm măi komputơr mă hră pơsit glông ƀiă dong. Kâo amra tŏ tui pơtrut pơsur neh met wa nao hrăm djop. Bơni kơ kơnuk kơna hơmâo hơdră djru brơi plơi Ia Lang, anai lĕ plơi pla dŏ tơnap tap, kiăng mơnuih ƀôn sang dưi tŭ mă tơlơi pơhing amăng rơnuk phrâo anai”.

Tui yă Hồ Thị Ngọc Huyền, Khua git gai Ping gah phường Chi Lăng, hrŏm hăng đơ đam tơring čar, phường Chi Lăng glăk pơtrut kơtang ngă tui jơlan hơdră pơplih yua boh thâo phrâo dêh čar. Bruă pok anih pơtô hrăm măi komputơr soh sel yôm phăn biă mă, ngă mơnuih ƀôn sang thâo hluh ƀiă dong. Mơng anun, pơgôp pơjing gru grua yua boh thâo phrâo, mơnuih mơnam yua boh thâo phrâo:

“Ƀing gơmơi čang rơmang ƀơƀrư̆ djru brơi mơnuih ƀôn sang, sit biă ñu lĕ mơnuih djuai ania ƀiă, pơđĭ kyar gru grua yua boh thâo phrâo. Mơng anun, ƀing gơñu amra thâo yua internet, yua hơdôm glông pơhing amăng internet, gah bruă ia jrao, plang mơnuih mơnam. Hăng hơnong pơkă ba boh thâo phrâo mut amăng tơlơi hơdip kơ mơnuih mơnam, anăp nao pơplih yua boh thâo phrâo tui jơlan gah dêh čar kơ pơđĭ kiăng pơđĭ kyar bơwih ƀong huă mrô hăng mơnuih mơnam yua boh thâo phrâo mơng Khua dêh čar”./.