Blan 2 thun 2023, ling tơhan pơgang guai dêh čar tơring čar Cao Bằng hơmâo phă pơrai truh kih tui akŏ bruă CB223p kơ tơlơi soh sat arăng sĭ mơnuih, ƀing arăng klĕ dơ̆p ba sĭ lĕ đah kơmơi čơđai muai anet mơ̆ng nge truh pơ prong. Ƀing tơhan kơnuk kơna hơmâo mă pơkong Lê Thị Mỹ Lệ hăng Phạm Thành Sinh dŏ pơ tơring glông Krông Pač, tơring čar Dak Lak. Arăng hơmâo mă ƀing anai, lơ̆m gơñu hlăk na nao mô̆ anet găn rơgao ƀơi jơlan guai dêh čar gah ƀut plơi Tềnh Quốc, să Cần Nông, tơring glông Hà Quảng. Blan 7/2023, kông an tơring čar Cao Bằng ăt hơmâo pơrai hĭ tơlơi soh tui akŏ bruă 623M, pơklaih brơi truh kih 2 čô dra ngek, ƀing soh sat mă pơkŏng mơ̆ng dêh čar Myanmar glăi pơ Việt Nam.

 Kah pơpha kơ tơlơi pơhing arăng klĕ dơ̆p sĭ mơnuih tom hơmâo ƀơi tơring čar, plơi pla pô amai Hứa Thị Thạch, Khua khul đah kơmơi mut phung să Cần Nông, tơring glông Hà Quảng, tơring čar Cao Bằng lăi:

“Să Cần Nông lĕ să giăm guai dêh čar. Kơ tơlơi pơhing arăng sĭ dơ̆p mơnuih găn rơgao ƀơi guai dêh čar lĕ ăt dŏ hơmâo đôč, biă mă ñu hơdôm thun phrâo anai hơmâo truh 1,2 čô mơnuih amăng să. Phrâo anai hloh lĕ amăng blan 2 thun 2023 lĕ hơmâo sa čô čơđai đah rơkơi arăng phrâo tơkeng 16 hrơi đôč, ƀing soh sat krăo lăng hăng či dơ̆p mă ba nao pơ dêh čar Khač samơ̆ ƀing tơhan kơnuk kơna hmao ƀuh hĭ ƀơi anih tơmeh pơkă guai dêh čar mrô 614 či să Cần Nông. Giong arăng hơmâo mă kâo pô jing khua khul đah kơmơi amăng să hmư̆ hing, hlong nao tŭ glăi nô anet ƀơi puih kơđông tơhan pơgang guai dêh čar hăng jak iâu hơdôm sang anŏ hơmâo ană nge djru ba bơnal hrôm, bơnal uă eh mơ-añă kơ nô anet laih anun djru brơi ia tơsâo rơmôm giong anun kâo ba nao jao pơ sang bruă djru rông ba mơnuih mơnam tơnap tap ƀơi tơring čar kiăng wai lăng hăng čem rông ba”.

Kiăng pơgăn tơlơi soh sat sĭ dơ̆p mơnuih, rơngiao kơ bruă ngă hrŏm mơ̆ng tơhan kông an, khom hơmâo tơlơi djru hrŏm mơ̆ng djop sang bruă,  kơnuk kơna, tơhan pơgang guai dêh čar, amăng tơlơi dưi, anŏ gêh găl mơ̆ng pô ngă tui hơdôm boh yôm phun amăng kơčăo bruă mrô 8 “Ngă tui tơlơi bơkơnar đah rơkơi hăng đah kơmơi hăng pơsir hĭ hơdôm tơlơi ječ ameč kiăng pơgang ba ƀing đah kơmơi hăng čơđai muai”, Khul đah kơmơi mut phung tơring čar Cao Bằng hơmâo lu hơbô̆ bruă pôr tơlơi pơhing thâo pơčeh phrâo laih anun ba glăi boh tŭ yua. Amai Hưá Thị Thạch, Khua khul đah kơmơi mut phung să Cần Nông brơi thâo dơ̆ng:

“Tơlơi thâo hluh mơ̆ng mơnuih ƀôn sang pơ anai, tơlơi arăng sĭ mơnuih ba nao pơ gah adih guai dêh čar pioh mă bruă apah, pioh dŏ rơkơi dêh čar tač rơngiao…dŏ hơmâo lu tơlơi soh sat hăng hlăk hơmâo biă mă mơ̆n. Ƀing gơmơi hyu pơtô pơblang kơ ană plơi pla na nao đôč kiăng mơnuih ƀôn sang thâo hluh, nao truh pơ sang ƀing arăng djru hrŏm dơ̆p sĭ mơnuih pơtô lăi brơi thâo hluh bruă ngă soh hăng tơlơi phiăn kơnuk kơna pơgăn arăng sĭ mơnuih laih anun pơtô lăi kiăng pơđĭ tui tơlơi thâo hluh glăm ba mơ̆ng plơi pla khom kơđiăng hloh sit ƀuh mơnuih ngă soh rô nao rai ƀơi jơlan guai dêh čar, sit ƀuh mơnuih ƀu thâo krăn nao lăi pơthâo hăng anom bruă kơnuk kơna kiăng tañ kiăo mă, pơgăn hĭ tơlơi soh sat gơñu”.

Tui hăng amai Hoàng Trang Định, Khua Khul đah kơmơi mut phung tơring kual Thông Nông, tơring glông Hà Quảng, hăng tơlơi gơgrong ba lĕ pơtô pơblang kơ mơnuih ƀôn sang, jak iâu hăng djru ba ƀing đah kơmơi, čơđai muai arăng sĭ mơdrô, rim čô ding kơna đah kơmơi ƀơi plơi pla. Tơlơi anai amra djru kơ bruă hyu pơtô pơblang ƀơi kual plơi pla, truh pơ djop khul grup tong ten rơđah rơđong hloh:

“Bruă pơtô lăi pơhlôm, pơgang sĭ mơnuih thun blan rơgao, dưi hơmâo djop gưl anom bruă ping gah, gong gai kơnuk kơna đing nao biă mă. Amăng hơdôm thun hlâo ăt hơmâo mơ̆n sa čô ding kơna khul arăng sĭ ba nao pơ dêh čar Khač. Tơdơi kơ ñu glăi pơ plơi pla, gơyut anun ăt mlâo mơ̆n kơ ană plơi pla, yua hơmâo djop gưl anom bruă kah hăng khul đah kơmơi mut phung djru ba, jĕ giăm, juh alum, pơtô lăi, thâo anŏ či kiăng, pơčrâo brơi anăp ngă bruă laih anun ñu ƀrư̆ ƀrư̆ abih hĭ mơ̆n tơlơi mlâo, tơlơi hañ, mut phung hăng plơi pla puăi tlao rơhmač hloh, glăi mut hrŏm amăng plơi pla mơak kah hăng hlâo”.

Thun blan rơgao, Khul đah kơmơi mut phung tơring čar Cao Bằng lăng kơ bruă pơhlôm pơgang tơlơi soh sat sĭ mơnuih, jing sa bruă mă đing nao tong ten amăng bruă pơtô lăi bơlăng ba ƀu kah akŏ đah rơkơi hăng đah kơmơi ôh hăng pơsir tañ djop bruă pơdjơ̆ nao kơ anŏ kiăng ječ mơ̆ng ƀing đah kơmơi hăng čơđai muai ƀơi tơring čar. Tui hăng yă Nông Thị Tuyết, Khua khul đah kơmơi mut phung tơring čar Cao Bằng, kiăng dưi ngă hơdôm boh tơhnal pơtrun anai tui akŏ bruă mrô 8, biă mă ñu bruă pôr tơlơi pơhing, pơgăn tơlơi soh sat sĭ mơnuih kiăng djop anom bruă kơnuk kơna, khul grup ngă hrŏm kah dưi, ngă djop tơhnal pơkă, bruă pơtrun, đah mơ̆ng lŏm lui bruă mă soh sat sĭ mơnuih găn rơgao ƀơi guai dêh čar; pơđĭ tui tơlơi thâo hluh anŏ kah akŏ, kah pơpha bơlăng ba đah kơmơi hăng đah rơkơi; tơlơi sat taih amang amăng sang anŏ, sĭ đah kơmơi hăng čơđai muai.

Ăt tui hăng khua khul đah kơmơi mut phung tơring čar Cao Bằng mơ̆n, thun blan rơgao, Khul hơmâo git gai bruă mă pơtô pơblang pôr pơthâo, kiăng thâo hluh kơ bruă soh sat arăng hyu plư pleč sĭ mơnuih; tơlơi phiăn pơkă kơ bruă pơgăn tơlơi soh sat sĭ mơnuih laih anun hơdră pơsir kơ tơlơi soh sat anun laih anun hơdră pơsir sit ƀuh arăng mă pơkong đah kơmơi hăng čơđai muai ba sĭ; lu jơlan hơdră tơlơi phiăn kơnuk kơna djru kơ khul đah kơmơi mut phung, pơgang ba ƀing hơmâo tơlơi truh arăng ngă sat sit hơmâo glăi pơ plơi pla.

Lu hơbô̆ bruă pôr pơthâo tơlơi pơhing ƀơi Cao Bằng brơi ƀuh anŏ pơblih phrâo, thâo pơčeh amăng bruă mă djop gưl khul đah kơmơi mut phung, tơlơi glăm ba, gơgrong mơ̆ng ƀing khua mua, mơnuih apăn bruă khul đah kơmơi amăng plơi pla thâo tong ten kơ bruă pơhlôm, pơgang tơlơi truh sĭ mơdrô mơnuih, laih anun gum tơngan hrŏm pơgang tơlơi rơnuk rơnua hơđong kơ đing kơmơi hăng čơđai muai đah kơmơi yơh boh nik ñu.