Amăng mrô giăm 40 tơlơi pơgôp hiăp hơmâo lăi pơthâo mơng mơnuih ƀôn sang amăng mông bưp, lu hloh lăi nao kơ bruă bơrơsua lŏn mơnai kơplah wah mơnuih ƀôn sang hăng hơdôm boh kông ti, anom bơwih ƀong sĭ mơdrô hơmâo kơnuk kơna jao lŏn. Tui mơnuih ƀôn sang bruă bơrơsua lŏn anai sui hơdôm hơpluh thun samơ̆ aka ƀu hơmâo tơlơi đing nao pơsir hĭ khut khăt. Ayong Nguyễn Hữu Tân, pơ ala brơi rơbêh 60 boh sang anŏ amăng plơi Hiệp Hòa, să Ninh Gia brơi thâo:

“Lơ 29/8/1988, Jơnum min mơnuih ƀôn sang tơring čar jao jang jai brơi anih pla anah kyâo Lang Hanh lĕ 200 ektar samơ̆ amăng anun hơmâo lŏn kơ neh met wa glăk ngă đang hmua. Amăng tơlơi pơtrun amăng črăn 3 lăi rơđah, hăng kual lŏn mơnai kơ mơnuih ƀôn sang glăk ngă hmua rơkâo djop gưl, gơnong bruă pơsir hĭ djơ̆ tơlơi phiăn, samơ̆ dong mơng anun truh ră anai ăt aka ƀu pơsir hĭ lơi. Neh met wa rơkâo mơng să đĭ pơ tơring glông, truh pơ tơring čar, laih anun tơring čar ba trun pơ să dong”.

Ƀuh hơmâo bruă bơdjơ̆ nao wai lăng, mă yua hăng bơrơsua lŏn mơnai ƀơi să Ninh Gia dŏ tơnap tap hăng sui thun, ơi Phan Đình Trạc, Ding kơna Ding jum kơđi čar, Khua apăn bruă Ping gah, Khua khul pơgăn hưp ƀong kông ngăn rơkâo Khua mua tơring čar Lâm Đồng ječ ameč pel ĕp, pơsir hĭ khut khăt hơdôm bruă tong ten. Hăng hơdôm boh tơhnal bơdjơ̆ nao tơlơi glăm ba, ƀing Khua pơ ala mơnuih ƀôn sang tơring čar Lâm Đồng amra hơmâo hră pơ-ar rơkâo Ding jum ling tơhan pơsir hĭ. Ơi Phan Đình Trạc lăi:

“Bruă bơdjơ̆ nao lŏn mơnai, kâo rơkâo kơ-iăng Jơnum min mơnuih ƀôn sang tơring čar Nguyễn Ngọc Phúc, gơnong bruă wai lăng ayuh hyiăng lŏn mơnai hrŏm hăng ƀing Khua pơ ala mơnuih ƀôn sang git gai pơsir hĭ hơdôm bruă tong ten. Neh met wa hơmâo tơña tơring glông mơ̆ tơring glông lăi tơring čar aka ƀu lăi glăi, bơ tơring čar lăng bruă anai tui tơlơi glăm ba mơng tơring glông, anun jing pơtrut nao rai ngă neh met wa ƀu thâo iâu nao hơpă dong tah. Kơnong lŏn mơnai bơdjơ̆ nao anom bruă lăng đang glai mrô 78, kâo rơkâo anom bruă ngă hră pơ-ar tui ƀing Khua pơ ala mơnuih ƀôn sang lăi pơthâo djơ̆ tong ten hơdôm bruă ră anai mơng anom bruă mơ-it nao Ding jum ling tơhan, ƀing gơñu amra rai pơ anai git gai, gum hrŏm hăng tơring čar, hăng Sang pơtô bruă ling tơhan pơsir hĭ khut khăt”.

Hlâo anun, ƀơi să Trạm Hành, plơi prong Đà Lạt, Ding kơna ding jum kơđi čar, Khua apăn bruă Ping gah, Khua khul pơgăn bưp ƀong kông ngăn ơi Phan Đình Trạc hrŏm hăng ƀing Khua pơ ala mơnuih ƀôn sang tơring čar Lâm Đồng bưp mơnuih ƀôn sang hăng ƀing kông ñơn, ƀing apăn bruă, ding kơna khul mơnuih mă bruă mut phung.

Amăng mông bưp, lu mơnuih brơi thâo ƀing mơnuih djru wai lăng glai rưng lĕ ƀing mơnuih phun ngă tui hơdôm bruă jao ƀơi anih, samơ̆ ƀing pô anai aka ƀu hơmâo tơlơi đing nao hăng arăng ƀu lăng anai lĕ bruă kơtrâ̆o, hŭi rơhyưt kar hăng tơhan wai lăng glai. Mơnuih ƀôn sang rơkâo sem lăng, pơplih pơkra tơlơi pơkă kơ hơdră bruă anai kiăng pơgang ba tơlơi dưi mơng ƀing mơnuih djru wai lăng glai rưng ƀơi ƀon lan-anaih hơmâo glai kyâo pơging giăm ha mơkrah amăng đơ đam tơring čar.

Đĭ pơhiăp amăng mông bưp, ơi Phan Đình Trạc, Ding kơna Ding jum kơđi čar, Khua apăn bruă Ping gah, Khua khul pơgăn bưp ƀong kông ngă brơi thâo hơdôm tơlơi pơgôp hiăp, tơlơi rơkâo mơng mơnuih ƀôn sang lĕ lăp djơ̆ biă mă. Ƀing Khua pơ ala mơnuih ƀôn sang tơring čar Lâm Đồng amra tŭ mă, pơƀut glăi hăng hơmâo hră lăi pơthâo hơdôm anom bruă gah gơnong glông.

“Kơ bruă ƀing mơnuih djru wai lăng glai rưng aka ƀu dong amăng bruă kơtrâ̆o, hŭi rơhyưt kar hăng ƀing tơhan wai lăng glai, samơ̆ bruă mă ăt kar kăi hăng ƀing tơhan wai lăng glai rưng mơn, bruă anai kâo rơkâo ƀing Khua pơ ala mơnuih ƀôn sang tơring čar Lâm Đồng tŭ mă kiăng lăi pơthâo kơnuk kơna. Laih dong, hơdôm bruă bơdjơ̆ nao ia jrao, pơtô pơjuăt, mơnuih mă bruă mut phung, bruă mă…ƀing gơmơi amra tŭ mă tong ten kiăng lăi pơthâo brơi djop gưl gơnong glông”.

Ƀrô tal anai, ƀing Khua pơ ala mơnuih ƀôn sang tơring čar Lâm Đồng hơmâo jao 20 anung gơnam brơi sang anŏ hơdră djru, mơnuih djru hơkrŭ, sang anŏ tơnap tap amăng să Trạm Hành, plơi prong Đà Lạt, 20 anung gơnam brơi kơ sang anŏ tui hơdră djru, mơnuih djru hơkrŭ, sang anŏ tơnap tap ƀơi să Ninh Gia, tơring glông Đức Trọng, tơring čar Lâm Đồng. /.