VOV4.Jarai - Ngă tui bruă jao wai lăng glai rưng brơi grup sang anŏ, ană plơi pla mơng Jơnum min mơnuih ƀon sang tơring čar Kon Tum amăng thun 2014, rơbêh 200 boh sang anŏ ƀơi 6 ƀuht plơi pla amăng să Đắk Roong, tơring glông Đăk Glei hơmâo tŭ mă wai lăng rơbêh 1.100 ektar glai. Yua kơ gir kơtir pơphun hyu tir wai pơgang, đơr hơr lŏn glai arăng jao lêng kơ dưi pơgang, mah amăng thun blan klin Covid-19 lar hyu kơtang.

Plơi Đăk Bo, să Đăk Roong hơmâo 38 boh sang anŏ arăng jao wai lăng glai, hăng giăm 300 ektar gah Tiểu khu mrô 106 să Đăk Roong mơng thun 2014. Ơi A Chương - Khua khul wai lăng glai rưng plơi Đăk Bo brơi thâo, mơng hrơi arăng jao ană plơi pla wai lăng glai rưng, neh met wa akŏ pơjing 12 grup hyu tir hyu wai lăng, lŏn glai dưi wai pơgang kjăp. Mah amăng thun blan klin Covid-19 hơđuh đĭ, bruă hyu tir, wai lăng glai ăt pơphun na nao. Bruă phă glai, sua mă lŏn glai huăi ƀuh dong tah.

“Amăng thun laih rơgao klin Covid-19 ngă tơnap tap, samơ̆ djop grup hyu tir ăt pơphun hyu tir na nao. Rĭm grup pơpha 3 čô mơnuih, hyu tir amăng ha blan mơng 3-4 wŏt. Lơ̆m hyu tir amăng glai rưng kiăng kơ ngă tui hơdră pơgang klin anun lĕ tui tơlơi pơkă 5k: Truă akhăn gôm ƀô̆, dŏ ataih tơdruă, anăm pơpha lu đơi mơnuih nao mă bruă. Tơdah hlơi thơ amăng grup ƀă klin Covid-19, grup anun amra pơkiăo nao mơnuih pơkŏn dong plih hĭ…”.

Kar kăi tui anun mơn, bruă wai mơnuih ƀon sang wai lăng glai ƀơi plơi Đăk Wăk, să Đăk Roong hơmâo 37 boh sang anŏ ding kơna, tŭ mă rơbêh 250 ektar glai gah Tiểu khu mrô 211 hăng 108 mơng thun 2014. Ơi A Tùng - Ding kơna Grup wai lăng glai amăng plơi Đăk Wăk brơi thâo, plơi pla hơmâo pơčlah jing 12 grup, rĭm grup hơmâo 5 čô mơnuih hăng sa grup mơnuih krăo lăng hơmâo 2 čô mơnuih pơphun bruă hyu tir amăng glai rưng.

Amăng hơdôm hrơi klin Covid-19 lar hyu kơtang, djop grup pơplih na nao amăng bruă hyu tir amăng glai. Hrŏm hăng bruă hrŏ trun mơnuih amăng rĭm grup hăng pơhlôm dŏ taih tơdruă, djop grup ăt yua măi telephôn kiăng kơ pơhiăp nao rai amăng zalo hăng ƀu ƀưp ƀơi anăp ôh yua kơ hŭi ƀă klin. Yua anun, mơ̆ bruă hyu tir wai lăng glai rưng tŏ tui na nao, bruă pơgang klin ăt pơhlôm mơn.

“Klin kheng ngă tơnap tap ƀing gơmơi pơpha sa grup 2 čô mơnuih hyu tir hăng pơhlôm dŏ ataih. Tiểu khu mrô 211 giăm hăng tơring kual Đăk Glei, anih amuñ ƀuh arăng phă glai, plơi ăt pơpha 1 grup 2 čô mơnuih hyu tir na nao kiăng pơhlôm wai lăng glai; bơ Tiểu khu mrô 108 gah dơnung ƀiă, tơdah dong ƀơi plơi ăt lăng trun ƀuh đơr hơr yua anun tañ ƀuh tơdah hlơi thơ trơ̆i kyâo pơtâo, yua anun pơpha 2 čô pơplih nao rai hyu tir amăng glai. Ƀing gơmơi ăt akŏ pơjing grup zalo, pơpha hrơi mông hyu tir, yua anun amuñ pơplih nao rai”.

Să Đăk Roong, tơring glông Đăk Glei ră anai hơmâo 6 ƀut plơi pla tŭ mă lŏn glai arăng glai prong 1.100 ektar. Tui ơi A Thông - Khua Jơnum min mơnuih ƀon sang să Đăk Bo, hlâo adih lơ̆m aka ƀu hơmâo hơdră jao lŏn glai wai lăng amăng plơi pla, bruă phă glai kyâo, sua mă lŏn glai ƀuh na nao. Tơdơi kơ lŏn glai jao brơi neh met wa wai lăng, hluai tui hơdôm tal pơtô pơblang, akŏ pơjing grup wai lăng glai, ră anai glai rưng dưi wai pơgang laih. Laih dong, lơ̆m hyu tir wai lăng glai rưng, neh met wa hơmâo prăk apah mơng hơdră wai lăng glai, yua anun tơlơi hơdip dưi hrưn đi tong ten, pran gơgrong wai lăng glai kyâo ăt ngă tui tŭ yua hloh mơn.

Ơi A Thông brơi thâo, amăng hơdôm hrơi klin Covid-19 ngă tơnap tap, lu mơnuih hluai tui hrơi mông glêh tơnap anai kiăng kơ mut drôm kyâo pơtâo, sua mă lŏn glai. Ƀơi anăp kơ tơlơi anai, ană plơi pla lêng kơ tŏ tui na nao hơdôm grup hyu tir wai lăng glai. Kiăng pơhlôm amăng bruă wai lăng kah hăng pơgang klin tŭ yua, khua mua Jơnum min mơnuih ƀon sang să hơmâo črâo ba mơnuih ƀon sang lơ̆m hyu tir kiăng ngă tui khut khăt hơdră pơgang klin Covid-19 kah hăng pok pơhai hơdôm bruă hyu tir wai lăng glai pơ anăp dong.

“Klin Covid-19 ngă tơnap tap amăng 2 thun laih rơgao, samơ̆ hơdôm grup wai lăng glai rưng amăng djop plơi pla ăt tŏ tui na nao bruă mă mơng ƀing gơñu. Djop grup gum hrŏm hăng anom bruă wai lăng glai amăng să, hơdôm khul grup bơdjơ̆ nao pơjing akŏ bruă kiăng kơ pel ĕp ƀơi hơdôm anih juăt ƀuh phă glai, sua mă lŏn glai. Yua anun amăng 2 thun laih rơgao amăng să ƀuh ƀuh dong tah mơnuih phă kyâo glai, sua mă lŏn glai ngă đang hmua kah hăng bruă drôm dŏp kyâo pơtâo”.

Tuấn Long: čih

Siu Đoan: Pơblang