Hơbô̆ bruă rông mơnŭ bip prưh lui gah rơngiao mơng sang anŏ yă A Lăng Trí dŏ ƀơi plơi Đắc Ốc, să La Dê, tơring glông Nam Giang, tơring čar Quảng Nam hơmâo ling tơhan wai pơgang guai amăng jang Nam Giang črâo brơi rông dong mơng thun 2018 truh ră anai. Yua hơmâo tơlơi črâo ba boh thâo rông hlô tơdơi kơ hơdôm tal čeh mơboh, yă Trí pơhrui glăi giăm 3 klăk prăk hăng anai lĕ jing bruă bơwih ƀong ba glăi prăk pơhrui hơđong kơ sang anŏ.

“Tơlơi hơdip amăng sang anŏ jai hrơi hơđong, ƀơi anai ling tơhan wai pơgang guai hrŏm hăng Jơnum min gum hrŏm hyu pơtô pơblang kiăng pơjing hơbô̆ bruă rông hlô mơnong brơi kơ neh met wa, jai hrơi hơmâo lu dong mơnuih ngă tui”.

Amăng hrơi blah laih rơgao, puih tơhan wai pơgang amăng jang Nam Giang hơmâo gum hrŏm hăng gưl Ping gah gong gai să La Dê pơtrut bruă pơtô pơblang, črâo brơi mơnuih ƀon sang đing nao pơđĭ kyar bơwih ƀong huă. Truh ră anai, hơbô̆ bruă pla pơtơi ƀơi 2 boh plơi anun lĕ Kông Tơ Rơn hăng Đắc Pênh pơhưč 30 boh sang anŏ mut hrŏm. Tui đại úy Nguyễn Minh Vương, kơ-iăng khua puih tơhan wai lăng amăng jang Nam Giang brơi thâo:

“Amăng hrơi blan laih rơgao, ƀing apăn bruă, ling tơhan wai pơgang guai pơphun lu hơbô̆ bruă djru brơi mơnuih ƀon sang hăng nao tơl plơi pla črâo brơi mơnuih ƀon sang ngă tui hơdôm hơbô̆ bruă anun lĕ pơđĭ kyar kual giăm guai, pơtrut pơsur ƀing mơnuih čơmah, gum djru brơi hơdôm boh sang anŏ ƀun rin, hăng hơmâo Khul ngă hmua, khul đah kơmơi djru brơi dong, amăng hrơi blan laih rơgao ăt ƀuh mơnuih djuai ania ƀiă ƀơi kual giăm guai thâo gơgrong amăng pơđĭ kyar bơwih ƀong huă laih”.

Mơnuih ƀon sang nao hrơi pơdă prưng “Gơnam đang hmua hiam hơdjă Quảng Trị”

Hăng pran gir run mơng ling tơhan wai pơgang guai, tơlơi hơdip kơ mơnuih ƀon sang kual giăm guai amra jai hrơi trơi pơđao yâo mơ-ak hăng tơlơi rô nao rai kơplah wah mơnuih ƀon sang hăng ling tơhan jai hrơi kjăp phik ƀiă dong. Trung tá Đỗ Hoành Minh, Khua puih tơhan wai pơgang guai tơring čar Quảng Nam brơi thâo:

“Kơ bruă pơđĭ kyar bơwih ƀong huă, gru grua, mơnuih mơnam ăt hơmâo lu hơbô̆ bruă ba glăi tŭ yua, pơgôp pơplih, hrưn đĭ tơlơi hơdip mơda anun lĕ hơbô̆ bruă rông sim tuh hrôh ƀudah rông phun đẳng sâm ƀơi să Ga Ri, să Trà Ơn, tơring glông Nam Giang, hơbô̆ bruă rông rơmô tuh hrôh ƀơi să Chơ Chun, tơring glông Nam Giang hăng hơbô̆ bruă pơkŏn kiăng pơlăi nao rai tơlơi tơnap tap mơng mơnuih ƀon sang, mơng hơdôm bruă mă tong ten anun ngă kjăp tui pran gum pơgôp kơplah wah mơnuih ƀon sang hăng ling tơhan, ngă kjăp tui bruă gum hrŏm wai pơgang guai lŏn ia”.

Kiăng pơđĭ kyar bơwih ƀong huă brơi mơnuih ƀon sang kual giăm guai, anom pơsur ngă hmua tơring čar Quảng Trị hơmâo pok pơhai hơbô̆ bruă ngă hmua pla glai pơlir hơbit ƀơi plơi Cheeng, să Hướng Phùng, tơring glông Hướng Hóa hăng đơ đam prong 2,2 ektar. Hơbô̆ bruă pla pơjing phrâo pok pơhai dong mơng blan 8 thun 2021, hơmâo 3 boh sang aŏ mut hrŏm, blung hlâo hơmâo ba glăi tŭ yua.

Hăng hơbô̆ bruă ngă hmua pla glai pơlir hơbit, hơdôm anah phun pla hơmâo mă yua anun lĕ phun lát hoa, phun ƀoh ƀơr 034, boh sần riêng, phun mit thái, phun đinh lăng. Kiăng ngă tui hơbô̆ bruă, ƀing apăn bruă hơmâo pơtô hrăm, črâo brơi boh thâo klơi luh, pruai vôi hăng pruai kmơk vi sinh, hrŏm hăng pruai kmơi lân hăng eh rơmôn kơbao tui tơlơi pơkă. Ayong Văn Ngọc Khánh, mơnuih ƀon sang plơi Cheeng, să Hướng Phùng, tơring glông Hướng Hoá, tơring čar Quảng Trị brơi thâo:

“Amăng hrơi blan pok pơhai, lơ̆m kâo ngă tui, kâo ƀuh klă biă mă, kâo ăt rơkâo anom bruă djru brơi ia pruih, kmơk, bơwih brơi phun pla hiưm pă ñu. Sa, dua boh sang anŏ pơkŏn, kâo ƀuh bơwih ƀong đĭ đăi biă mă”.

Tơdơi kơ ha thun pok pơhai, hơbô̆ bruă anai ba glăi tŭ yua biă mă, mrô phun pla hơdip hăng bluh đĭ hiam lu biă mă. Hơdôm phun ƀơr 034, mit thái, lát hoa bluh đĭ hiam, dưi hơdip 95%, ră anai phun pla glăk amăng hrơi blan rah hyu thun. Laih dong hơmâo ƀing apăn bruă tŏ tui črâo brơi mơnuih ƀon sang hơdôm hơdră pla pơjing, pơgang hlăt mŏt pơčrăm. Ơi Phan Ngọc Đồng, kơ-iăng khua anom pơsur ngă hmua tơring čar Quảng Trị brơi thâo:

“Mơng hơdôm hơbô̆ bruă kiăng hrưn đĭ pơhrui lu dong amăng sa blah hmua pla pơjing, pơ anăp anai, ƀing gơmơi amra tŏ tui pok pơhai hơdôm hơbô̆ bruă tui anai amăng hơdôm boh să pơkŏn dong hăn hơbô̆ bruă anai amra črâo brơi mơnuih ƀon sang ngă tui hơdră pla pơjing hơđong kjăp hăng ba glăi pơhrui lu ƀiă mơng đang hmua kah hăng pơhlôm brơi tơlơi hơdip mơda”.

Bruă pok pơhai hơdôm hơbô̆ bruă ngă hmua pla glai pơlir hơbit hăng hơmâo lu dong gơnam đang hmua pơhrui amăng rĭm bơyan amra ba glăi tŭ yua hăng pơhrui lu ƀiă dong kơ mơnuih ƀon sang. Hrŏm hăng anun, anăp nao pla pơjing hơđong kjăp amăng đang hmua pơlir hăng đang glai ba glăi tơlơi yôm prong prin ƀơi hơdôm kual kơčong čư̆. Lơ̆m ayuh hyiăng pơplih jai sat tui ră anai, bruă pơlir ngă hmua hăng pla glai lĕ hơbô̆ bruă pơđĭ kyar hơđong kjăp.