VOV4.Jarai - Tơdơi kơ 3 blan pok pơhai ngă tui, ƀơi tơring čar Kon Tum, tơlơi pơtrun mrô 11 mơng Kơnuk kơna kơ jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam hơmâo ba glăi tŭ yua mơtăm djru brơi mơnuih ƀon sang hơđong tơlơi hơdip mơda, hơkrŭ glăi bơwih ƀong huă, sĭ mơdrô tơdơi kơ abih klin Covid-19.

Rơbêh kơ 1 blan anai, ơi A Veo, djuai ania Sơdang, dŏ ƀơi plơi Kà Bầy, să Sa Bình, tơring glông Sa Thầy ƀuh tơlơi hơdip glăk plai ƀiă glêh tơnap yơh. Ha hrơi mă bruă pơ hmua, ñu yuă rơk ba glăi čem 2 drơi rơmô sang anŏ phrâo blơi. Ơi A Veo brơi thâo, ñu glăk bưp tơnap tap kiăng kơ hơmâo prăk tuh pơ alin, yua kơ dưi čan 100 klăk prăk mơng rơnoh prăk djru bơwih ƀong huă, djru brơi bruă mă tui tơlơi pơtrun mrô 11 mơng Kơnuk kơna. Lơ̆m hơmâo prăk sang anŏ ñu blơi 2 drơi rơmô ania abih lĕ 50 klăk prăk, dŏ ha mơkrah ñu blơi anah phun pla, kơmơk pruai brơi phun kyâo boh troh. Yua kơ hơmâo tơlơi djru čan prăk tuh pơ alin, ngă gêl gal kiăng pơđĭ kyar bơwih ƀong huă sang anŏ, tơlơi anai pơtrut pơsur ơi A Veo gir run hrŏm sang anŏ bơwih ƀong huă:

“Bơni biă mă kơ Ping gah, Kơnuk kơna hơmâo đing nao. Hăng sang anŏ gơmơi kâo hok mơ-ak yua dưi čan prăk mơng sang bruă prăk kiăng kơ dưi blơi rơmô, blơi anah phun pla kiăng kơ sang anŏ dưi pơđĭ kyar bơwih ƀong huă”.

Črâo brơi bruă ngă hră pơ-ar čan prăk tui rơnoh prăk čan mơng tơlơi pơtrun mrô 11 mơng Kơnuk kơna ƀơi ƀon lan.

Hăng hơdôm rơtuh boh sang anŏ ƀơi tơring glông Sa Thầy, mrô prăk brơi čan mă kmlai ƀiă tui tơlơi pơtrun mrô 11 mơng Kơnuk kơna hmao tlôn kiăng pơsir hĭ hơdôm tơlơi tơnap tap ră anai ƀơi rĭm boh sang anŏ. Hluai tui khua plơi hăng Khua apăn bruă Ping gah plơi, lơ̆m thâo hơmâo rơnoh prăk čan djru blơi gơnam yua hrăm hră brơi ƀing čơđai, sang anŏ ayong Lương Văn Phúc, lĕ sang anŏ ƀun rin ƀơi ƀut plơi 1, să Ya Xier čih anăn amăng hăng grup pơkrem hăng čan prăk amăng plơi pla kiăng kơ dưi nao čan prăk. Mơng mrô prăk čan 20 klăk prăk, ñu blơi gơnam yua hrăm hră brơi kơ 2 čô ană ñu:

“Sang anŏ gơmơi bưp tơnap tap biă mă yua klin Covid-19 ngă. Kơnuk kơna hơmâo jơlan hơdră djru čan prăk anai, kâo blơi măi komputơr brơi dua čô ană kiăng kơ hrăm hră amuñ ƀiă. Čang rơmang 2 čô ană hrăm hră rơgơi, tơdơi anai thâo mă bruă djru brơi kơ amĭ ama”.

Sit biă ñu ƀơi tơring čar Kon Tum brơi ƀuh, tơlơi pơtrun mrô 11, lơ 30/1/2022 mơng Kơnuk kơna mơng Jơlan hơdră hơkrŭ glăi hăng pơđĭ kyar bơwih ƀong huă-mơnuih mơnam tañ mut amăng tơlơi hơdip mơda hăng ngă tŭ yua hloh. Kiăng kơ dưi ngă tui tơlơi anai, djop gưl, gơnong bruă mơng tơring čar hơmâo ječ ameč pok pơhai ngă tui hăng ngă gêh gal kiăng kơ djru brơi mơnuih ƀon sang dưi čan prăk tañ hloh. Ơi Nguyễn Minh Thuận, Khua apăn bruă Ping gah să Sa Bình, tơring glông Sa Thầy brơi thâo, tơdơi kơ tơlơi pơtrun mrô 11 hơmâo ba tơbiă, Ping gah, gong gai ƀon lan hơmâo lăi pơthâo tơl abih bang mơnuih apăn bruă Ping gah hăng tơl plơi pla dong.

“Mơng akŏ rơwang tal I, Gong gai ƀon lan hơmâo gum hrŏm hăng Sang bruă prăk djru mơnuih mơnam tơring glông Sa Thầy pel ĕp, pơƀut glăi, čih anăn hơdôm sang anŏ tơnap tap yua bơbeč mơng klin Covid-19 kiăng kơ djru čan prăk. Hăng truh ră anai hơmâo 30 boh sang anŏ dưi čan prăk hăng glăk jao prăk čan giăm 1 klai 400 klăk prăk. Ping gah ăt jao bruă brơi hơdôm gơnong bruă, khul grup djru brơi mơnuih ƀon sang dưi mă yua prăk čan tŭ yua hloh”.

Rơnoh prăk čan tui tơlơi pơtrun mrô 11 mơng Kơnuk kơna hơmâo djru brơi bruă mă brơi 1.200 čô mơnuih mă bruă amăng tơring čar Kon Tum.

Anai lĕ sa amăng hơdôm anom bruă pok pơhai djru čan prăk mă kmlai ƀiă tui tơlơi pơtrun mrô 11 mơng Kơnuk kơna, ơi Nguyễn Văn Trung, Kơ-iăng Khua sang bruă prăk djru mơnuih mơnam tơring čar Kon Tum brơi thâo, abih tih rơnoh prăk čan tui tơlơi pơtrun mrô 11 amăng tơring čar Kon Tum thun 2022 hăng 2023 lĕ rơbêh 1.200 klai prăk, hơmâo 5 jơlan hơdră čan prăk. Ră anai, anom bruă glăk pơtrut tañ bruă jao prăk čan amăng tal 1 mơng 3 jơlan hơdră čan prăk hăng abih tih mrô prăk 112 klai brơi hơdôm sang anŏ arăng brơi čan.

“Kơnuk kơna ba tơbiă tơlơi pơtrun hmao tlôn kiăng kơ djop sang anŏ, biă mă ñu lĕ hơdôm sang anŏ yua Sang bruă prăk djru mơnuih mơnam djru brơi. Hơdôm sang anŏ ƀun rin hăng ƀing mơnuih kơnuk kơna djru ba pơkŏn, ƀing gơñu bưp tơnap tap amăng rơbêh 2 thun laih rơgao amăng tal hơđuh đĭ klin laih rơgao, ră anai ƀing gơñu hơmâo prăk čan kiăng hơkrŭ glăi tuh pơ alin bơwih ƀong huă, sĭ mơdrô hơđong tơlơi hơdip mơda”.

Truh lơ 11/5, Sang bruă prăk djru mơnuih mơnam tơring čar Kon Tum hơmâo brơi čan laih 75 klai 400 klăk prăk, dưm dưm 67% mrô prăk čan tal 1 tui tơlơi pơtrun mrô 11 mơng Kơnuk kơna. Yua mơng rơnoh prăk čan anai, rơbêh kơ 1.200 čô mơnuih mă bruă amăng tơring čar hơmâo bruă mă; giăm 400 čô čơđai hơmâo măi komputơr yua hrăm hră; 30 boh sang anŏ kông nhơn, ƀing apăn bruă dưi čan prăk man pơdong sang tui tơlơi pơtrun mrô 100 mơng Kơnuk kơna hăng mrô prăk lĕ 15 klai prăk. Ăt mơng bruă ngă tui tơlơi pơtrun mrô 11 mơng Kơnuk kơna, Sang bruă prăk djru mơnuih mơnam amăng tơring čar Kon Tum hơmâo pơplih hĭ thun blan tla glăi kmlai brơi 320 boh sang anŏ hăng abih tih 13 klai prăk.

Khoa Điềm: Čih

Siu Đoan: Pơblang