Sang hră gưl sa tơring kual Khe Tre dŏ ƀơi tong krah tơring glông Nam Đông, gah anăp lan sang hră hơmâo jơlan tơring čar mrô 14 C găn nao, rơdêh rô nao rai lu biă mă rĭm hrơi. Djơ̆ mông čơđai sang hră tơbiă mơ̆ng anih hrăm juăt hơmâo tơlơi hŭi rơdêh pơjrom. Tơlơi lăp đing nao, lu amĭ ama čơđai sang hră nao tŭ pơgiăng ană bă nao sang hră đĭ rơdêh thut ƀu klum đuăn pơgang akŏ ôh, pơgiăng mơdua, mơklâo, ƀơi anŏ ƀuh truh pă čô đĭ sa boh rơdêh thut, ngă kơ rup rap ƀu hiam klă ôh amăng čơđai sang hră, bơbeč djơ̆ bruă pơtô hrăm ngă tui tơlơi phiăn jơlan glông lăi pha, tơlơi phiăn kơnuk kơna hnun mơ̆n mơ̆ng sang hră anai. Mơ̆ng hơmâo pok pơhai hơbô̆ bruă anăn “Amăng jang sang hră rơnuk rơnua rô nao rai ƀơi jơlan glông”, mơ̆ng akŏ thun mơtam, sang hră jao kơ ƀing nai pơtô hrăm, pô nai khua anih brơi kĭ pơkôl ƀuăn rơ̆ng rô nao rai rơnuk rơnua ƀơi jơlan glông kơ abih bang amĭ ama ƀing čơđai sang hră hăng dưi hơmâo 100% mrô amĭ ama čơđai sang hră ngă tui. Khua mua sang hră ngă hrŏm grup tơhan pơlih jơlan glông gah kông an tơring glông Nam Đông hyu pơtô lăi kơ tơlơi phiăn pơkă rô nao rai rơnuk rơnua hơđong ƀơi jơlan glông kơ čơđai sang hră thâo. Adơi Nguyễn An, čơđai sang hră hrăm anih 4 sang hră gưl sa tơring kual Khe Tre, tơring glông Nam Đông, tơring čar Thừa Thiên Huế brơi thâo:

“Sit ƀing ta đĭ rơdêh thut amăng jơlan glông lĕ ƀing ta ƀu dưi đĭ nao amăng  dua, amăng klâo pơgăn jơlan ôh, ƀu dưi pơgiăng klâo čô sa boh rơdêh thut hăng ƀu dưi đĭ seng nao rai lơi”.

Ta ƀuh rơđah lĕ, ră anai mrô čơđai sang hră đĭ rơdêh măi pơkĕ apui lơtrik, rơdêh tang rơwang pơkĕ apui lơtrik nao sang hră lu biă mă. Kông an tơring glông Nam Đông, tơring čar Thừa Thiên Huế brơi thâo, thun blan rơgao lơ̆m hyu tir ƀuh hăng pơsir lu tơlơi ƀing tơdăm ngek dra muai ngă soh tơlơi phiăn jơlan glông. Kiăng plai ƀiă tơlơi ngă soh anun, hrŏm hăng tơlơi gum hrŏm mơ̆ng djop sang bruă kơnuk kơna, sang anŏ hăng djop mơnuih mơnam ngă hrŏm kah dưi. Amăng anun, tơlơi thâo hluh mơ̆ng ƀing čơđai sang hră hăng tơlơi gơgrong ba mơ̆ng sang anŏ yơh yôm biă mă. Adơi Cao Ngọc Phương Dung, čơđai sang hră anih 12 B2 sang hră gưl klâo Nam Đông brơi thâo:

“Tui hăng kâo, kiăng rô nao rai rơnuk rơnua hloh lĕ ƀing ta khom klum đuăn djơ̆ hăng tơlơi phiăn pơtrun sit đĭ rơdêh thut. Lơ̆m rô nao rai đĭ rơdêh thut, ƀu dưi đĭ glông mơdua, mơklâo pơgăn ôh, ƀu dưi pơgiăng rơgao mrô mơnuih tui tơlơi phiăn pơkă, ƀu nao ôh sit apui mriah ăt dŏ bơngač ƀơi anăp jơlan klah, ƀu dưi đĭ rơdêh nao pơkơđai  glăi ƀơi jơlan nao sa anăp hăng ƀu dưi blă tă tăn ôh”.

Kiăng pơhlôm, pơgang rơnuk rơnua pơhrŏ ƀiă tơlơi truh rơdêh pơtlă jrŏm ƀơi jơlan glông kual čư̆ siăng tơring glông Nam Đông khom pơtô lăi brơi thâo hluh tong ten, ngă tui djơ̆ tơlơi phiăn kơnuk kơna kơ ƀing čơđai sang hră sa bruă mă yôm phun. Anom bruă tơhan kông an tơring glông Nam Đông hơmâo ngă hrŏm lu anom bruă pơtô hrăm hăng pơtrut hyu pơtô pơblang tơlơi phiăn jơlan glông, pơtô bruă ngă tui gru gru hiam sit rô nao rai ƀơi jơlan glông ƀơi 17 boh sang hră gưl dua, gưl klâo amăng tơring glông hăng giăm 5.700 čô mơnuih hăng čơđai sang hră nao pơhmư̆. Laih dơ̆ng pơphun jơnum kĭ pơkôl khom ngă djơ̆ tơlơi phiăn jơlan glông plah wah khua mua, nai pơtô hăng sang anŏ amĭ ama čơđai sang hră, abih bang ngă hrŏm soh. Rơngiao kơ anun, anom bruă kông an ăt pơpha sa grup djru pơčrâo jơan kiăng rô nao rai rơnuk rơnua ƀơi amăng jang sang hră amăng mông mut tơbiă sang hră, kiăng pơgang tơlơi hơđong, rơnuk rơnua, tơlơi tơpă rơguăt rô nao rai, pơlar tui hơdră mă bruă djơ̆ pơgang anih giăm amăng jang sang hră rơnuk rơnua jơlan glông ƀơi 30 boh sang hră.

Trung tá Nguyễn Tiến Dũng, Khua grup aŏ pơjing bruă mă gum hrŏm pơgang rơnuk rơnua tơring glông Nam Đông brơi thâo, pơtô lăi ber, amuñ thâo hluh, amuñ hơdor pioh kiăng tơlơi bơ ră ruai nao rai plah wah mơnuih pơtô hăng čơđai sang hră tŭ mă. Rim kơ gưl hrăm hơmâo hơdră pơtô ba phara, kiăng pơtrut pơsur pran jua ƀing ană amôn adơi đeh čơđai sang hră amuñ thâo hluh laih anun dưi djă pioh amăng mông pơtô hrăm tơlơi phiăn rơnuk rơnua jơlan nao rai, jak iâu ƀing čơđai sang hră ngă tui djơ̆ tơlơi pơtrun rô nao rai ƀơi jơlan glông:

“Grup hyu pơtô pơblang tơlơi phiăn mơ̆ng kông an tơring glông hơmâo nao tơl sang hră. Anai lĕ hơdôm sang hră ƀơi 17 boh anih sang hră gưl dua, gưl klâo hăng sang hră gưl anet pioh pơtô pơblang ngă tui tơlơi phiăn jơlan glông, tơlơi thâo thăi sit rô nao rai ƀơi jơlan glông kiăng rơnuk rơnua. Kơ tơlơi phiăn pơhlôm, pơgăn taih amang amăng sang hră ăt kah hăng pơgăn tơlơi ngă sat ma túy brơi ƀing nai pơtô hrăm hră thâo hrŏm hăng čơđai sang hră laih anun amĭ ama čơđai sang hră kiăng ngă tui djơ̆ tơpă”.

Thun blan pơ anăp, Grup tơhan pơlih jơlan glông, kông an tơring glông Nam Đông, tơring čar Thừa Thiên Huế ăt pơtrut ngă hrŏm hăng khua mua sang hră kiăng pôr pơthâo pơtô pơblang tơlơi phiăn jơlan glông kơ ƀing čơđai sang hră, mơ̆ng anun kiăng kơ ƀing čơđai thâo hluh tơlơi gơgrong ba mơ̆ng gơñu amăng bruă pơgang tơlơi rơnuk rơnua rô nao rai ƀơi jơlan glông pơgang tơlơi rơnuk rơnua drơi jăn pô hăng djop mơnuih rô nao rai ƀơi jơlan glông.