Thun blan rơgao, yua ngă klă bruă pơtô pơblang, djop gưl anom bruă, plơi pla, gong gai kơnuk kơna, tơlơi thâo hluh mơ̆ng ană plơi, biă mă ñu, mơnuih ƀôn sang djuai ƀiă amăng tơring čar Thái Nguyên pơtrut ngă bơkơnar đah rơkơi hăng đah kơmơi, hơmâo lu tơlơi pơblih phrâo hiam klă.

Sang anŏ amai Bàn Thị Hằng lĕ sa amăng hơdôm boh sang anŏ pơđĭ kyar, bơwih ƀong huă rơgơi amăng să Quân Chu, tơring glông Đại Từ, tơring čar Thái Nguyên. Yua hơmâo tơlơi gir run, triăng kơ bruă, hrưn đĭ, dua rơkơi bơnai amai Hằng hơmâo akŏ pơdong bruă mă pơjing hmua đang pla phun boh troh truh 3 hektar, amăng anun pla pơtơi bia hăng boh hồng, giăm 3 rơbâo phun boh kruăi dŭng, boh trôl hăng boh nhãn, pơhrui glăi rim thun truh hơdôm rơtuh klăk prăk. Amai Bàn Thị Hằng brơi thâo, anai lĕ boh tơhnal mơ̆ng bruă mă bơkơnar đah rơkơi hăng đah rơmơi, yua djru hrŏm kah pơpha bruă mă rơkơi bơnai ngă hrŏm hơbit, mơ̆ng hrơi phrâo pơdŏ rơkơi bơnai gơñu truh ră anai:

"Amăng tơlơi hơdip mơda sang anŏ, rơkơi sang kâo ăt djru hrŏm kah pơpha bruă mă amăng sang anŏ hăng bruă mă rim hrơi. Yua kơ anun kâo hơmâo mông ngă pơhiam drơi jăn ta pô suaih pral na nao”.

Ayong Nguyễn Văn Dân, rơkơi amai Hằng pơdah rai pran jua ñu pơmin:

“Tơlơi kâo pơmin lĕ djru kơ ană bơnai yơh phun. Glăi mơ̆ng mă bruă hmua kâo ăt djru hrŏm tơnă asơi hơbai añăm, jik rơ̆k amăng đang sang rah, hơdôm bruă mă mơ̆ng ană bơnai djru ba soh. Kâo ngă tui anun lĕ pran jua hŏk mơak na nao”.

Bơ amai Nguyễn Thị Luyện dŏ pơ să Đồng Thịnh, tơring glông Định Hóa, tơring čar Thái Nguyên, tơlơi mơak tơdơi kơ glăi mơ̆ng mă bruă lĕ, bruă amăng sang anŏ tơñă asơi hơbai añăm, wai lăng ană bă ăt hơmâo rơkơi sang ñu djru hrŏm mơ̆n. Mah tơkeng ană lêng kơ đah kơmơi soh, tơlơi bơwih ƀong huă đĭ đăi laih, tơdah arăng pơmin nao kơ ĕp ană đah rơkơi kiăng hơmâo pô djă pioh kơnung djuai, samơ̆ rơkơi bơnai bơn anai ƀu pơmin tơkeng thim dơ̆ng tah, ană đah rơkơi tŭ, đah kơmơi tŭ mơak soh. Tơlơi thâo rơnôm sang anŏ gơñu djru rơkơi bơnai, ană bă mơak na nao, thâo pơpŭ tơdruă, ană bă hrăm hră thâo rơgơi, hrăm thâo na nao hơdôm thun mơtam anun dưi pơsit sang anŏ rơguăt. Amai Nguyễn Thị Luyện brơi thâo:

"Kâo ngă bruă nai pơtô gưl muai jing bruă mă tơnap biă mă, ñu phara hăng bruă pơkŏn samơ̆ rơkơi kâo thâo kah pơpha djru ba bruă kâo amăng sang anŏ, hrup hăng djru ba bruă tơnă asơi añăm, bruă pla añăm pơtam, jik rơ̆k amăng đang sang, wai lăng ană bă djru kâo djhul ƀiă amăng bruă mă anun pran jua kâo mơak biă mă”.

Hlâo adih djuai ania ƀiă pơ kual gah kơdư dêh čar ta pơmin “Pơpŭ kơ đah rơkơi đôč, djik kơ đah kơmơi”. Yua tơlơi pơmin, phiăn juăt tui anun yơh ngă kơ lu đah kơmơi arăng ƀu đing nao ôh, ƀu brơi ngă bruă amăng tơpuôl mơnuih mơnam, plơi pla. Kiăng pơblih hĭ tơlơi pơmin hrup anun, yă Dương Thị Thanh Luyến, Khua Khul đah kơmơi mut phung tơring glông Đại Từ, tơring čar Thái Nguyên brơi thâo:

“Ƀing gơmơi git gai akŏ pơjing hơbô̆ bruă, hơdră ngă tui bơhmutu hlâo, khul grup djru bruă pơhlôm, pơgăn ngă sat taih amang đah kơmơi hăng čơđai đah kơmơi, khul grup pơhlôm pơgang tơlơi kơtư̆ tơdruă amăng sang anŏ; djru đah kơmơi akŏ pơjing grup ngă ƀong hrŏm, kơsem min, khul hơmâo tơlơi kiăng djơ̆ hrŏm amăng ƀing adơi amai đah kơmơi pioh pơtrut bơwih ƀong huă ngă ƀong hrŏm”.

Yap truh abih thun hlâo, mrô đah kơmơi hrăm truh thạc sĩ amăng mrô abih bang ƀing đah kơmơi hrăm  thạc sĩ ƀơi Thái Nguyên lĕ hơmâo rơbêh 54%. Mrô đah kơmơi ngă khua anom bruă juăt lăi giám đốc, ngă khua sang bruă sĭ mơdrô, anŏm ngă ƀong hrŏm truh 28%...Hrŏm hăng anun, hơmâo hơdôm rơbâo boh sang anŏ yua đah kơmơi ngă pô, hrưn đĭ pơklaih mơ̆ng tơlơi ƀun rin, djru hrŏm pơhrŏ ƀiă tơlơi ƀun rin amăng tơring čar trun dŏ 4%. Ơi Hoàng Văn Chính, Kơ-iăng khua anom bruă djuai ania tơring čar Thái Nguyên lăi:

“Thun blan pơ anăp, Jơnum min djuai ania Thaí Nguyên ăt lăi pơthâo hăng djop anom bruă ping gah, gong gai kơnuk kơna amăng tơring čar khom hur har hloh, kơtưn pơtô pơblang kơ bruă ngă bơkơnar đah rơkơi hăng đah kơmơi. Biă mă ñu hơdôm boh yôm phun hơmâo čih amăng tơhnal pơkă mơ̆ng dêh čar kơ pơđĭ kyar bơwih ƀong huă mơnuih mơnam amăng kual mơnuih djuai ƀiă hăng kual čư̆ siăng".

Bơkơnar đah kơmơi hăng đah rơkơi lĕ bruă mă ƀu pơčlah ôh hăng bruă man pơdong pơđĭ kyar lŏn ia laih anun pơđĭ kyar bơwih ƀong huă mơnuih mơnam kual djuai ƀiă dŏ. Bruă pơtrut bơkơnar đah rơkơi hăng đah kơmơi amăng kual djuai ƀiă lĕ lir hơbit hăng pơđĭ kyar sa hnong bruă, jơlan glông, tơlơi pơhing kiăng pơtrut bơwih ƀong huă mơnuih mơnam tơring čar Thái Nguyên jai hrơi pơđĭ kyar hloh. Mơ̆ng anun, amra jai hrơi hơmâo lu đah kơmơi dưi tŭ mă tơlơi gêh găl hrăm tơdruă, pơđĭ tui rơnoh yôm hăng jing anŏ yôm djru hrŏm pơđĭ kyar mơnuih mơnam.