Thun anai hmâo 200 čô nai pơtô čơđai hăng mơnuih apăn bruă wai lăng bruă pơtô pơhrăm mơbruă dưi ư-ang čơkă mă hră bơni. Mông ngă Lơphet bơni nai pơtô čơđai, mơnuih apăn bruă mơbruă thun 2023 lĕ sa amăng hơdôm bruă mă gah glông bruă jơnum hơdor glăi 41 thun Hrơi pioh kơ nai pơtô čơđai Việt Nam (20/11) yua kơ Ding jum pơtô pơhrăm gum hrŏm hăng hơdôm bôh anom pơphun.

Anai lĕ ƀing nai pơtô čơđai ƀơi hơdôm kual ataih yaih mơ̆ng lŏn ia, hmâo laih lu bôh than truh kih amăng bruă pơtô pơhrăm, hmâo hơdră ngă phrâo amăng pok pơhai hơdră pơtrun, jơlan gah hăng hơdôm hơdră pơsit mơ̆ng Gơnong bruă pơtô pơhrăm amăng hơdôm hrơi rơgao. Pơhiăp amăng mông ngă lơphet bơni, Khua Ding jum pơtô pơhrăm dêh čar ta Nguyễn Kim Sơn čang rơmang, ƀing nai pơtô čơđai hơkrŭ pơsir dong tơlơi tơnap pioh ngă giong bruă pô ngă hăng lar hyu hơdôm bôh than klă hmâo ngă laih ăt kah hăng tơlơi găn rơgao truh lu nai pơtô amăng gơnong bruă, kiăng gum hrŏm ngă giong klă bruă pơtô pơhrăm./.