VOV4.Jarai - Hơdôm hrơi giăm Tết tui phiăn juăt Nhâm Dần 2022, lom djop mơnuih prăp či glăi sang tum jơngum sang anô̆ lĕ lom ƀing apăn bruă tơhan, ling tơhan pơgang guai lŏn ia tơring čar Gialai lăi hrom, Ling tơhan pơgang guai lŏn ia Ia O lăi ha jăn lĕ gơgrong pran ƀơi guai lŏn ia kiăng wai lăng, pơgang guai lŏn ia hăng pơgang, pơgăn klin Covid-19. Hrom hăng anun, anom bruă ăt gum hrom mơn hăng gưl ping gah, gong gai, hơdôm grŭp, gơnong bruă, plơi pla bơwih brơi kơ neh wa kual guai lŏn ia sa bơyan bơnga mơ-ak klă, pơđao pran jua.

Jơlan hyu tir guai lŏn ia Ia O, să Ia O, tơring glông Ia Grai, tơring čar Gialai hơdôm hrơi giăm Tết tui phiăn juăt phơ-uang kơ bơnga bôh ñông amăng bơyan bluh bơnga. Hrom hăng ƀing ling tơhan pơgang guai lŏn ia ƀơi jơlan hyu tir ƀlu ñŭp, čun čue hăng ƀui hlŭ mơng lŏn drot bazan, ƀing gơmơi nao truh pŏng gŏng guai lŏn ia mrô 25 yua kơ Puih kơđông pơgang guai lŏn ia Ia O wai lăng. Pŏng gŏng guai lŏn ia kơjăp phik ƀơi guai lŏn ia jum dar lĕ ia krông Pô Kô. Đại uý Nguyễn Đức Võ, mơnuih mă bruă ƀơi Grŭp git gai Khul ling tơhan tơring glông Ia Grai nao pơ̆ Puih kơđông pơgang guai lŏn ia Ia O ră ruai, anai lĕ Tết blung a ñu ataih mơng sang pô pioh čơkă thun phrâo ƀơi guai lŏn ia hrom hăng khul ling tơhan pơgang guai lŏn ia:

“Rơgao hơdôm hrơi kâo hơdip ƀơi anai, tơlơi rô nao rai gum hrom kơplah wah dua bơnah klă biă hăng mut hrom. Gah bruă pơgang guai lŏn ia ăt kah hăng pơgang pơgăn klin Covid-19 ƀơi kual guai lŏn ia anai. Ƀing gơmơi hrom hăng abih bang hơdôm mơnuih mă bruă pơgang guai lŏn ia gum hrom klă biă, yap wot amăng tơlơi hơdip hai ăt kar kăi mơn. Hlâo kơ dưi rai mă bruă anai, kâo pơsit laih tơlơi pơmin kơjăp, tết anai amra dô̆ ƀơi kual guai lŏn ia kiăng pơgăn tơlơi đuăi hyu găn ča guai lŏn ia, ăt kah hăng hyu tir kiăng pơgang guai lŏn ia. Ngă klă bruă asơi ia kiăng ƀing gơmơi hơđong pran jua hăng sang anô̆ pơ̆ sang ăt hơđong pran jua mơn”.

Ƀing apăn bruă tơhan, ling tơhan Puih kơđông pơgang guai lŏn ia Ia O hyu tir ƀơi glông guai lŏn ia

Ngă tui bruă wai lăng guai lŏn ia hăng pơgang pơgăn klin Covid-19, Tết thun anai, ƀu djơ̆ kơnong kơ khul pơgang guai lŏn ia ôh mơ̆, khul hyu tir guai lŏn ia dŏ hmâo dong hơdôm mơnuih apăn bruă kơtưn mơng khul ling tơhan hăng khul tơhan plơi pơgang mă pô dong. Trung tá Vũ Văn An, Kơ-iăng Khua grŭp ling tơhan, gơgrong gah anih gak mrô 1 – wai lăng pơgang guai lŏn ia hăng pơgang pơgăn klin Covid-19 (Puih kơđông pơgang guai lŏn ia Ia O) brơi thâo: Yua kơ tơlơi klin Covid-19 ngă tơnap anun lu blan rơgao, Puih kơđông pơgang guai lŏn ia Ia O djă pioh tơpă na nao hơdôm anih gak rôk tui guai lŏn ia. Khua apăn bruă tơhan, ling tơhan pơplih nao rai dô̆ gak hrơi mlăm, pơhlôm rah bruă pơgang pơgăn klin Covid-19, laih anun djă kơjăp pô rơnuk rơnua guai lŏn ia, pơgang rơnuk rơnua hơđong ƀơi plơi pla rah.

“Bruă tal rơnuč thun mơng ƀing gơmơi lĕ, khua git gai puih kơđông hmâo pok pơhai nao rim čô mơnuih apăn bruă tơhan, ling tơhan kiăng pơhlôm rơnuk rơnua hơđong ƀơi kual guai lŏn ia lăi hrom hăng amăng kual gak ƀing gơmơi gơgrong lăi ha jăn. Adơi ayong ƀing gơmơi pơsit abih bang mơnuih apăn bruă tơhan, ling tơhan hơđong tơlơi pơmin, ngă giong bruă jao, pơhlôm djop tơlơi rơnuk rơnua hơđong ƀơi kual guai lŏn ia. Lăi pơhing pơsur mơnuih ƀôn sang ngă tui tơpă hơdră pơtrun hơdră bruă mơng Ping gah, tơlơi phiăn mơng Kơnuk kơna, ngă klă bruă pơgang pơgăn klin ƀơi kual guai lŏn ia”.

Ƀing apăn bruă tơhan, ling tơhan Puih kơđông pơgang guai lŏn ia Ia O pel ĕp pŏng guai lŏn ia

Amăng thun 2021, Puih kơđông pơgang guai lŏn ia Ia O hmâo pioh laih rơbêh kơ 100 hrơi bruă djru mơnuih ƀôn sang ngă đang hmua, pơplih pơkra jơlan nao rai... Tal Tết truh bơyan bơnga rai, hăng lu ngăn rơnoh, mơnuih apăn bruă mơng puih kơđông pơsur djru gum hơdôm rơtuh anung gơnam kơ hơdôm bôh sang anô̆ tơnap tap mơnuih djuai ania ƀiă ƀơi hơdôm bôh plơi pla, mơnuih djru ngă hơkrŭ đưm. Lăi kơ pran jua mơng ƀing ling tơhan Puih kơđông pơgang guai lŏn ia Ia O pioh kơ neh wa, ơi Nay Pháp, Khua plơi Tăng brơi thâo: “Să kual guai lŏn ia, adơi ayong pơgang guai lŏn ia djru ba neh wa lu biă, čơkă ană rông, hơdôm mơnuih ƀu hmâo anih gơnang, pơkra sang khăp păp kơ mơnuih ƀun rin, mơnuih djru ngă hơkrŭ đưm, ƀing adơi ayong pơgang guai lŏn ia djru prăk, bơ̆ neh wa gum hrom hrơi bruă. Hơdôm anih gak pơgang guai lŏn ia dô̆ gak pioh pơgang hlôm hlâo klin ruă, biă ñu hơdôm blan hlâo adih ƀơi să hmâo klin ngă, ƀing adơi pơpha mơnuih djru ba abih pran jua, truh kơ ră anai klin dưi pơtrut kơdun laih. Bơni kơ ƀing adơi ayong ling tơhan biă, djru laih să pơgăn klin ruă. Truh thun phrâo čang rơmang ƀing ling tơhan pơgang guai lŏn ia ngă tui, djru ba dong neh wa, plơi pla”.

Thiếu tá Nguyễn Thanh Hà, Kơ-iăng Khua Puih kơđông pơgang guai lŏn ia Ia O brơi thâo: Tết anai, abih bang mrô mơnuih ƀơi hơdôm grŭp, anih gak ƀu hmâo glăi čơkă Tết pơ̆ sang anô̆ ôh. Čơkă bruă jao dô̆ glăi gak Tết, abih bang pơsit pran jua gơgrong prong hloh, gak wai guai lŏn ia hrơi mlăm.

“Amăng tal hlâo, amăng hăng tơdơi kơ Tết tui phiăn juăt, hăng ƀing apăn bruă Puih kơđông pơgang guai lŏn ia Ia O, ƀing gơmơi lăi pơthâo abih bruă mă ăt kah hăng hơdôm tơlơi črâo ba mơng Ƀirô git gai amăng bruă kơdŏng hăng ƀing ngă soh, biă ñu amăng rơwang hlâo kơ tết. Ƀing gơmơi črâo ba na nao hơdôm grŭp tơhan thâo tơlơi amăng kual, gah rơngiao kual guai lŏn ia kiăng hmâo bruă mă hmao tlôn kơdŏng glăi hăng ƀing ngă soh juăt hmâo ƀơi kual guai lŏn ia. Grŭp git gai puih kơđông ƀing gơmơi juăt git gai bruă mă ƀơi kual gum hrom hăng gong gai plơi pla pơgang pơgăn klin. Rơngiao kơ anun, ƀing gơmơi yap glăi hơdôm bôh sang anô̆ ƀun rin hăng hơdôm sang anô̆ ƀun rin ƀơ ƀiă kiăng ƀing gơmơi hmâo hơdôm anung gơnam djru amăng tal Tết tui phiăn juăt Nhâm Dần 2022”.

Sa thun dong čơkă Bơyan bơnga ƀơi guai lŏn ia, tui anun mơn ƀing ling tơhan Puih kơđông pơgang guai lŏn ia Ia O hmâo lui laih bruă drơi pô, kiăng kơ djă phao dô̆ gak pioh plơi pla cơkă Tết hơđong rơnuk rơnua./.

            Hoàng Qui: Čih – Siu H’ Prăk: Pơblang