Ƀơi lan sang rung plơi Kăm, să Ia Krăi, tơring čar Gia Lai, tơlơi ngui ngor mơak čơkă bơyan bơnga hơmâo pơphun hăng “Hrơi ngui anung ƀañ čưng” amăng anih mơak dik dak, pơđao pran jua. Khua mua git gai Tơhan Binh đoàn 15, gong gai să hrŏm hăng neh met wa djŏp plơi pla kah jing 4 grup, hok kơdok pơplông anung ƀañ čưng, ngă brơi hrơi ngui anai jai mơak hloh, kjăp tui tơlơi thâo khăp tơhan hăng mơnuih ƀôn sang. Jum dar sang rung hơmâo pơdong “Jơgăn gơnam 0 prăk” bơwih brơi neh wa prăp rơmet Tê̆t. Lu tơlơi ngui đưm hơmâo pơphun mơn, pơhưč lu čơđai ngui tom, tlao rơrek, pah tơngan dor, mơak kơtang biă.

Truh mlăm, pơ anai jing anih ngui bơyan bơnga tui gru grua Dap Kơdư, hơmâo arăng rŏm apui tơlŭi, hăng lu tơlơi adoh suang bơni kơ lŏn ia, plơi pla, mut hrŏm jua čing, tơlơi suang. Nao ngui hrŏm, amai Ksor Nuch - dŏ pơ plơi Dọch Krót, să Ia Krăi hok kơdok lăi:“Ƀing adơi ayong ngă tơhan glăi ƀong tê̆t hrŏm hăng ană plơi tui anai mơak biă yơh. Tơlơi ngui pơplông ƀañ čưng, ngui tui gru đưm hăng adoh suang, ƀong lăng asơi añăm, hơmâo wơ̆t Jarai ta hăng Yuan mơtăm yơh, anun jing hrơi ngui anai mut hrŏm hơbit, mơ-ak biă mă”.

Amăng jơlan hơdră ngui, Binh đoàn 15 hăng Grup bơwih ƀong - Pơgang lŏn ia 715 hơmâo brơi hơdôm rơtuh anung gơnam kơ sang anŏ hơkrŭ lŏn ia, sang anŏ rin. Anom bruă khua git gai tơhan Binh đoàn 15 nao tơl sang čuă jơmư, tơña bla, brơi gơnam Tê̆t kơ ƀing tha plơi, khua plơi, mơnuih ană plơi kơnang hăng sang anŏ kơnuk kơna djru; nao čuă, bơni hơ-ơč Tê̆t kơ Puih kơđông tơhan pơgang guai Ia O, ping gah, gong gai să Ia O hăng Ia Krăi.

Thiếu tướng Hoàng Văn Sỹ - Khua git gai Binh đoàn 15 brơi thâo, djŏp bruă “Bơyan bơnga guai dêh čar kjăp tui tơlơi khăp ƀu-eng tơhan hăng mơnuih ƀôn sang” amra hơmâo ngă dong mơn. Amăng tal 1, Binh đoàn amra brơi 30.000 anung gơnam kơ ƀing khua,mơnuih mă bruă hăng mơnuih ƀôn sang djŏp plơi pla; djru ba 100 tơn hơbâo pruai phun pla hơdjă hăng jơlan hơdră “Ngă mơtah mơda Trường Sa” thun 2026.

Mơ̆ng djŏp bruă anai, Binh đoàn 15 ƀu kơnong lăng ba tơlơi hơdip mơda kơ mơnuih ƀôn sang đôč ôh ăt ngă bruă čar yom biă mă, ngă kjăp tui tơlơi khăp ƀu-eng, ngă adơi ayong giăng mah, ngă kjăp tui tơlơi đăo kơnang mơ̆ng Mơnuih ƀôn sang hăng Ping gah, Kơnuk kơna laih anun Ling tơhan, akŏ pơdong kjăp phik “pran kơtang amăng pran jua mơnuih ƀôn sang” pơ guai dêh čar. Thiếu tướng Hoàng Văn Sỹ brơi thâo:“Thun 2026, gơmơi mă yua gơnam pơkra mă mơ̆ng Binh đoàn či brơi nao. Mơ̆ng anun, pơƀuh tơlơi khăp ƀu-eng kơtang mơ̆ng Binh đoàn 15 hăng mơnuih ƀôn sang, pơjing tơlơi gum pơgôp kjăp hloh kiăo tui pran jua mơ̆ng Ping gah Khul tơhan dêh čar git gai anun lĕ ƀu lui pô hlơi gah tlôn ôh. Mơ̆ng anun, tơlơi đăo kơnang amra đĭ tui, sit nik jing pơnăng pơga, guai pơgang kjăp lŏn ia ta amăng rơnuk pơplih phrâo”.

Bơ ƀơi guai ia rơsĭ tơring čar Dak Lăk, bruă čơkă bơyan phang bơyan bơnga phrâo rai tañ hloh hăng bruă thâo khăp pap mơ̆ng ƀing khua, ling tơhan pơgang guai lăng ba Tê̆t kơ neh met wa, biă ñu lĕ sang anŏ tơnap, phrâo bưp tơlơi truh lŏn adai ngă hơjan kơthel.

Ƀơi phương Sông Cầu, tơring čar Dak Lak, Puih kơđông tơhan pơgang guai Xuân Đài ngă hrŏm hăng Khul đah kơmơi phương pơphun “Hrơi ngui mơak ƀañ čưng mơtah”. Hơdôm rơtuh boh ƀañ čưng hơmâo brơi tơl tơngan sang anŏ rin, sang anŏ hơmâo anăn kơnuk kơna djru, ba glăi hrơi Tê̆t trơi pơđao, mơak mơai hloh. Hơmâo mă gơnam Tê̆t mơ̆ng ling tơhan, ơi Dương Bình Yên, plơi Phú Hòa, phương Sông Cầu, ol kơdol lăi:“Kâo hok mơak biă mă yơh yua hơmâo tơlơi djru ba, hơmâo mă gơnam brơi kơ neh met ƀun rin, anih hơmâo kơthel pưh nao phrâo tom brơi adih anai, kiăng hơmâo bơyan Tê̆t Bính Ngọ mơak mơai hyôk hyak amăng pran jua”.

Ƀơi phương Hòa Hiệp, Puih kơđông tơhan phương Hòa Hiệp Nam ngă hrŏm hăng hơdôm anom bruă pơphun tơlơi ngui “Bơyan bơnga pơ guai, pơđao pran jua ană plơi pla”. Khul pơphun tơlơi ngui hơmâo brơi 110 anung gơnam, amăng anun hơmâo prăk mơta hăng gơnam tam kơ sang anŏ kơnuk kơna juăt djru, sang anŏ ngă hơkrŭ, sang anŏ rin, ƀing čơđai muai amăng jơlan hơdră “Čung tơkai adơi nao sang hră”. Hrŏm hăng anun, nai ia jrao ling tơhan ăt nao khăm, sem lăng tơlơi suaih pral, pơtô brơi kiăng dŏ dong ƀong huă hiư̆m pă, hăng brơi ia jrao đôč kơ năng ai 100 wơ̆t mơnuih ƀôn sang.

Ăt amăng hơdôm hrơi anai mơn, hơdôm puih kơđông tơhan pơ ia rơsĭ Dak Lăk ăt ngă hrŏm hăng ƀing juăt djru khăp pap, pơkra brơi sang kơ lu sang anŏ tơnap, djru neh wa tañ hơđong anih dŏ, hơđong pran ngă bruă hăng čơkă Tê̆t yâo mơak ƀiă. Thiếu tá Vũ Lý Huỳnh, Kơ-iăng khua kơđi čar Puih kơđông tơhan pơgang guai Xuân Đài, Anom bruă khua git gai tơhan pơgang guai Dak Lăk, brơi thâo:“Tơlơi ngui Tê̆t tơhan hăng mơnuih ƀôn sang thun anai jing ƀing khua, ling tơhan pơgang guai Xuân Đài hơmâo pơplih hloh, nao tơl anih čuă jơmư, pơtrut pơsur neh met wa bơwih ƀong hăng bruă mă akan pơ ia rơsĭ bưp tơlơi tơnap yua kơthel 13 ngă hăng ia dăo phrâo rơgao. Juh alum, brơi gơnam kiăng neh met wa hơmâo pran, gir dŏ glăi pơ ia rơsĭ, hrŏm hăng tơhan pơgang guai wai lăng ia rơsĭ, bul pơtâo pơ ia rơsĭ, ngă rơnuk rơnua pơ guai ia rơsĭ hăng djru đĭ kyar bơwih ƀong huă amăng tơring”./.