VOV4.Jarai - Pơhiăp amăng mông jơnum lok 2 Khul wai lăng bruă pơplông apah pri bơni dêh čar ta pơphun amăng mơguah lơ 14/4, Khua dêh čar ta ơi Phạm Minh Chính rơkâo, bruă pơphun bruă bơkơtưn lĕ khom sik nik ngă tui ba glăi bôh tơhnal hăng sit nik pơphun mơng mơnuih ƀôn sang. Bruă bơkơtưn bơni apah pri khom gir run hloh dong, pơčeh phrâo hloh, nao djơ̆ phun than, djru ngă tui truh kih Tơlơi pơtrun pơsit Jơnum tal 13 mơng Ping gah, hơdôm tơlơi pơtrun pơsit mơng Kơnuk kơna, Khua pơ ala mơnuih ƀôn sang, Gong gai dêh čar, mơng hơdôm gưl Ping gah hơdôm gưl. Thâo rơđah, lăi pơhing hơdôm grŭp, mơnuih hmâo bôh than prong amăng bruă pơgang, pơgăn klin Covid-19, pơgang pơgăn hưp ƀong kông ngăn, prai prăk khưi khai, hơdôm gru ba jơlan hlâo hmâo bôh than prong amăng bruă mă, bruă bơwih ƀong huă, hrăm tui kiăng lar hyu hăng pơhư prong. Khua dêh čar ta lăi rơđah, hơdôm bruă pơplông khom djru pơtrut bruă sut lui 100.000 bôh sang tơ̆i rơ̆i ƀơi abih bang 74 bôh tơring glông ƀun rin hăng ngăn rơnoh Kơnuk kơna hăng iâu pơhrui hơdôm ngăn rơnoh mơnuih mơnam pơplih phrâo, amăng anun đing nao kơ mơnuih djru ngă hơkrŭ đưm, sang anô̆ gah hơdră bruă, kual ngă hơkrŭ đưm, hơdôm kual tơnap tap./.

Siu H’ Prăk: Pơblang