Amăng bruă wai lăng pơplih phrâo, đing tơngia hmư̆ mơnuih ƀôn sang ƀu djơ̆ kơnong lĕ tơlơi rơkâo hrŏm hăng tơlơi glăm ba đôč ôh mơ̆ ăt lĕ atur phun kiăng ba tơbiă hơdră bruă lăp djơ̆ hăng pơphun ngă ba glăi tŭ yua. Yua rĭm tơlơi rơkâo mơng mơnuih ƀôn sang ƀu djơ̆ kơnong lăi nao sa bruă tong ten đôč ôh mơ̆ ăt hơmâo wŏt hơdôm anŏ pơƀuh kơ tơlơi tơnap tap amăng bơwih ƀong huă-mơnuih mơnam, hơdôm anŏ aka ƀu klă amăng bruă ngă tui hơdră bruă, wŏt hăng hơdôm tơlơi pơglăi amra ƀuh tơdah ƀu tañ ĕp lăng hlâo hăng pơsir hĭ hmao tlôn.

Amăng hrơi blan dêh čar ta glăk pơtrut kơtang bruă pơjing Kơnuk kơna tui jơlan xã hội chủ nghĩa hăng pơplih mrô dêh čar, tơlơi gơgrong amăng bruă ngă djơ̆ pran mơnuih ƀôn sang ƀu djơ̆ kơnong dŏ glăi amăng bruă tŭ mă hră mơ-it, ba boh pơhiăp ƀudah pơƀut glăi hơdôm tơlơi rơkâo mơng mơnuih ƀôn sang, Khua git gai pơ ala mơnuih ƀôn sang lu wŏt lăi pơtong tơlơi rơkâo kiăng pơplih kơtang hơdai nao hơdeč hmar kiăo tui tơlơi sit nik, tañ ĕp ƀuh hơdôm bruă mơng sit nik hăng pơphô hơdră bruă hlâo kơ hơdôm anŏ aka ƀu klă pơtum glăi jing bruă ngă hang tơngia amăng mơnuih mơnam.

Kiăng lăp djơ̆ tơlơi rơkâo anai, Khua git gai pơ ala mơnuih ƀôn sang ơi Trần Thanh Mẫn rơkâo: bruă ngă djơ̆ pran mơnuih ƀôn sang kiăng pơplih phrâo djop mơta wŏt amăng tơlơi pơmĭn hăng jơlan gah bruă mă, tañ thâo tơlơi kiăng, tơlơi čang rơmang mơng mơnuih ƀôn sang; laih dong anai lĕ bruă pơƀuh hlâo hơdră bruă hăng tơlơi pơkă amăng wai lăng dêh čar.

“Bruă ngă djơ̆ pran mơnuih ƀôn sang kiăng ngă dơlăm ƀiă, anăm brơi dŏ glăi ƀơi bruă djru brơi mơnuih ƀôn sang, ngă brơi hră pơ-ar, ba đĭ boh pơhiăp. Mơ̆ kâo rơkâo bruă djru brơi mơnuih ƀôn sang lĕ bruă tañ thâo tơlơi kiăng, bruă pơƀuh brơi hlâo hơdră bruă, jing tơlơi pơkă brơi bruă wai lăng dêh čar. Kâo rơkâo, anăm brơi bruă djru brơi kiăo tui tlôn tơlơi ngă bơngơ̆t mơng mơnuih ƀôn sang. Ƀing ta kiăng hyu hmư̆, tañ thâo djop bruă hăng tañ pơsir hĭ hlao. Dua dong lĕ, lăi glăi tơlơi tơña mơng mơnuih ƀôn sang kiăng djơ̆ sit nik ƀiă. Lăi glăi tơña djop mơta ăt yôm biă, samơ̆ tơlơi pơkă tuč rơnuč ƀu djơ̆ lĕ hră pơ-ar lăi glăi, mơ̆ anai lĕ bruă dưi pơsir hĭ hă ƀŭ, tơlơi anai ngă djơ̆ pran mơnuih ƀôn sang hă ƀŭ”.

Tui sit nik amăng hrơi blan rơgao brơi ƀuh, lu tơlơi črâo trun, hơdră bruă pơprong lơm ba mut amăng tơlơi hơdip hơmâo hơdôm tơlơi bơdjơ̆ nao aka ƀu hmao thâo. Hơmâo lu anŏ aka ƀu klă hơmâo ĕp ƀuh lơm hơmâo tơlơi ƀom kiơng ƀudah jing bruă ngă hang rơngia amăng mơnuih mơnam. Lơm anun, tơdah tơlơi lăi pơthâo mơng ƀon lan hơmâo tŭ mă hmao tlôn, sem lăng djop, ƀing ta amra dưi pơplih tañ, lu bruă anăm bruă jing bruă ngă hang tơngia, bơdjơ̆ sat nao mơnuih mơnam hăng ngă pơrai khưi khai ngăn rơnoh.

Kiăng đăo lăng hlâo brơi djơ̆, ta kiăng hmư̆ djop. Kiăng hơdră bruă mut amăng tơlơi hơdip, kiăng pơlăi nao rai hăng mơnuih ƀôn sang mơng bruă pơjing hăng pơphun ngă tui.

Anai ăt lĕ hơdôm bruă yôm phăn kiăng pơhlôm ngă bơkơnar tơlơi dưi kơplah wah Kơnuk kơna, mơnuih ƀôn sang hăng anom bơwih ƀong sĭ mơdrô, laih dong hơkrŭ tơlơi mut hrŏm amăng mơnuih mơnam.

Tơdah hlâo adih, boh tŭ yua amăng bruă ngă djơ̆ pran mơnuih ƀôn sang juăt sem lăng hăng mrô hră pơ-ar tŭ mă, mrô hră pơ-ar lăi glăi ƀudah mrô bruă hơmâo pơsir hĭ, ră anai tơlơi pơkă hơmâo hrưn đĭ prong ƀiă dong: anun lĕ pơsir hĭ bruă sit nik hăng ngă djơ̆ pran mơnuih ƀôn sang. Tơlơi pơmĭn anai ăt hơmâo ơi Hòang Anh Công, kơ-iăng Khua jơnum min djru bruă mơnuih ƀôn sang hăng krăo lăng mơng Ƀirô khua pơ ala mơnuih ƀôn sang lăi pơtong.

“Hơnong pơkă yôm hloh mơng bruă djru tui tơlơi čang rơmang mơnuih ƀôn sang lĕ pơhlôm djơ̆ pran mơnuih ƀôn sang. Mah ngă hơget tŭ mơn, ƀing ta kiăng lăng nao tơlơi dưi mơnuih ƀôn sang, tơlơi dưi brơi lŏn ia. Hăng lơm ngă djơ̆ pran mơnuih ƀôn sang, anai le hơnong pơkă prong hloh brơi ƀing gơmơi anăp nao”.

Lơm boh pơhiăp mơng mơnuih ƀôn sang arăng hmư̆ hăng tơlơi rơkâo sit nik hơmâo pơsir hĭ hmao tlôn, tơlơi đăo gơnang mơng mơnuih ƀôn sang hăng Ping gah, Kơnuk kơna hăng hơdôm anom bruă pơ ala mơnuih ƀôn sang hơmâo hơkrŭ kjăp. Tơlơi rơkâo mơng Khua git gai pơ ala mơnuih ƀôn sang brơi ƀuh: pơplih phrâo bruă ngă tui djơ̆ tơlơi kiăng mơnuih ƀôn sang lĕ pơplih hơdră bruă wai lăng lŏn ia tui jơlan gah anăp nao mơnuih ƀôn sang, anom bơwih ƀong sĭ mơdrô ngă akŏ phun./.