Sang hră gru grua kông ang mơnuih ƀôn sang mrô II lĕ sang hră kơnuk kơna čem rông ba pơlir mơng gưl I truh gưl III, gah Kông ang tơring čar wai lăng. Ƀing mơnuih ĕp pơmut lĕ ană bă tơhan rơka, tơhan djai pơsăn drơi; ană bă sang anŏ tui hơdră djru, ƀing čơđai djuai ania ƀiă sang anŏ tơnap tap; ƀing čơđai dong amăng hơdră djru mơnuih mơnam hăng sa, dua čô mơnuih tui djơ̆ jơlan hơdră ngă hrŏm jar kmar mơng Ding jum kông ang.

Thun hrăm 2026-2027, Sang hră ĕp pơmut mơng hơdôm boh tơring čar Dak Lak, Gia Lai, Lâm Đồng hăng Quảng Ngãi. Mơng thun 2027-2028, pok prong ĕp pơmut amăng đơ đam dêh čar. Amăng rơwang mơng thun 2026-2030, Sang hră him lăng ĕp pơmut pơtô hrăm rĭm thun giăm 1.500 čô čơđai amăng 3 gưl. Ƀing čơđai kiăo tui hrăm ƀơi sang hră amra djru brơi prăk hrăm hră hăng anih dŏ; laih dong hơmâo pơtô hrăm djop mơta kơ gru grua, tơlơi hơdip, ngă tui djơ̆ tơlơi phiăn hăng pran glăm ba amăng mơnuih mơnam.