Dak Lak ră anai hơmâo 81 boh să kual mơnuih ƀôn sang djuai ƀiă dŏ hăng čư̆ siăng, hơmâo 828.000 čô mơnuih djuai ƀiă. Tơdơi kơ tơlơi phiăn lŏn mơnai thun 2024 dưi ngă tui, tơring čar hơmâo djru lŏn dŏ brơi 238 boh sang anŏ, djru lŏn ngă hmua pla pơjing ƀudah pơblih bruă mă brơi kơ 1.300 boh sang anŏ. Bruă pơtô hrăm, bruă ia jrao amăng kual plơi pla djuai ƀiă ăt djă pioh na nao mơ̆n, abih bang 100% boh să hơmâo sang ia jrao, giăm 97% sang ia jrao să hơmâo ơi ia jrao, mrô ơi ia jrao yap amăng 10 rơbâo čô mơnuih ƀôn sang lĕ hơmâo 9 čô ơi ia jrao.

Khă hnun, tơring čar anai ăt bong ƀơi anăp lu tơlơi lông lăng. Lŏn mơnai brơi mơnuih ƀôn sang djuai ƀiă jai hrơi aset tui, bruă  pơsir lŏn dŏ, mă glăi mơ̆ng plah anom bruă, sang bruă wai lăng lŏn glai yua kơnuk kơna ngă pô hlâo adih dŏ gun lu tơlơi phiăn pơkă. Lu sang hră đôm lăm kơnuk kơna čem rông čơđai sang hră djuai ƀiă dŏ kơƀah anih dŏ, sang huă, anih hrăm rơjang drơi jăn; bruă mă yua prăk kơnuk kơna mơ̆ng jơlan hơđêh čar djru dŏ kaih, lơ̆m anun 3 boh sang hră đôm lăm ƀơi kual guai dêh čar dŏ kơƀah 194 klai prăk kiăng ngă giong. Amăng bruă ia jrao, lu plơi pla kual ataih, kual ataih dŏ kơƀah ơi ia jrao kơhnăk pơjrao sa mơta hnơ̆ng bruă, gơnam yua pơjrao duăm ruă hăng mơneč mă bruă aka ƀu djop.

Ƀuh rơđah tơlơi anai, tơring čar anai rơkâo khua mua pơ ala mơnuih ƀôn sang dêh čar hăng jơnum min apăn bruă phun pơ ala mơnuih ƀôn sang tañ čih pơkra, ngă pơgiong tơlơi pơtrun kơ bruă pơkă lŏn pioh djru kơ mơnuih ƀôn sang djuai ƀiă; pơtô brơi rơđah rơđong bruă ngă tui mơta tơlơi 16 Tơlơi phiăn lŏn mơnai thun 2024. Laih dơ̆ng, rơkâo kơnuk kơna hăng djop ding jum, anom bruă đing nao hlâo djru ba prăk kơ Jơlan hơdră tơhnal pơkă mơ̆ng dêh čar mơ̆ng thun 2026-2030; pơhrua nao rơnoh prăk pioh tuh pơ alin kơ jơlan hơdră mơ̆ng dêh čar djru gah bruă pơtô hrăm, bruă ia jrao hăng jơlan hơdră pơhưč ƀing nai pơtô, ƀig ơi ia jrao kiăng mă bruă sui thun amăng kual tơnap tap.

Ơi Nguyễn Thiên Văn, Kơ-iăng khua jơnum min mơnuih ƀôn sang tơring čar Dak Lak lăi lĕ, kiăng tañ jŭ yap glăi, jao lŏn mơ̆ng hơdôm kông ty, plah anom bruă wai lăng lŏn mơnai ƀu jing mơnong ƀơi tơring čar pioh ngă tui djơ̆ jơlan hơdră pơsir lŏn dŏ, lŏn ngă hmua brơi kơ mơnuih ƀôn sang djuai ƀiă.

“Ƀơi tơring čar hơmâo 19 boh kông ty gưl Ding jum wai lăng, hơmâo lŏn lui soh năng ai 20.000 hektar, samơ̆ rim thun kơnong duh jia glăi kơ kơnuk kơna năng ai mơ̆ngg 20-25 klai prăk. Lơ̆m anun lŏn dŏ, lŏn ngă hmua brơi kơ mơnuih ƀôn sang djuai ƀiă ăt kiăng đing nao biă mă. Yua kơ anun, bruă jŭ yap glăi, pơtong rơđah lĕ, sa khom jao glăi kơ tơring čar wai lăng, dua lĕ hơdôm tơlơi anun Ding jum khom ngă, hơmâo tơlơi klah čun glăi hăng jao kơ tơring čar pioh ƀing gơmơi ngă tui hơdôm jơlan hơdră djru ba lŏn mơnai pioh brơi kơ mơnuih ƀôn sang djuai ƀiă”.

Ƀơi mông mă bruă, yă Trần Thị Hoa Ry, Kơ-iăng khua Khul djuai ania mơ̆ng Sang bruă khua pơ ala mơnuih ƀôn sang dêh čar čih pioh tơlơi rơkâo mơ̆ng tơring čar. Ñu ăt lăng yom boh tơhnal ngă tui jơlan hơdră pioh kơ mơnuih ƀôn sang djuai ƀiă ƀơi Dak Lak. Ñu rơkâo tơring čar ăt jŭ yap glăi djơ̆ anăn mơnuih tŭ mă tơlơi djru, kơtưn ngă hrŏm plah wah djop sang bruă, pơtrut bruă pơtô pơblang jơlan hơdră djru hăng đing nao tuh pơ alin ƀlơi yua gơnam yua kơ anom bruă ia jrao pơ kual plơi pla.

“Jŭ yap glăi djop mơtam gơnam hơmâo ăt kah hăng tơhnal pơkă pơpha rơnoh prăk kơ jơlan hơdră djru amăng bruă pơtô pơhrăm hăng bruă ia jrao pioh pok pơhai ngă tui amăng thun blan pơ anăp. Thâo mơ̆n, tơring čar Dak lak ăt amra tŭ mă lu tơlơi djru mơ̆ng dêh čar djru pioh kơ mơnuih ƀôn sang djuai ƀiă, djru wơ̆t amăng bruă ia jrao. Hăng bruă djru ba pơ sang ia jrao plơi pla lĕ đing nao jŭ yap glăi gơnam yua mă bruă pioh pơjrao tơlơi duăm ruă kơ mơnuih ƀôn sang, lơ̆m ƀing ta ăt pơphun wai pơgang tơlơi suaih pral kơ abih bang mơnuih ƀôn sang ră anai lu anih aka ƀu ngă djop ôh”.