Giăm sa wơ̆t hrơi tơjuh hăng anai, hơdôm hơpluh čô khua mua, ling tơhan, ƀing tơhan plơi hăng ƀing kơhnâo kơhnăk ƀuh ƀô̆ mơta mơ̆ng mơguah sing bring ƀơi pơsat dor tơhan pơsăn drơi yua kơ lŏn ia Mỹ Thắng. Rim čô hơmâo bruă jao ngă phara soh: grup pơgang tơlơi rơnuk rơnua, grup kuai mă, grup ơi ia jrao, grup djru tui klôn čem rông tơhan, ƀing mă bruă hrŏm abih bang lêng kơ anăp nao kiăng ngă giong bruă mă meh tơlang čơđeh pơčrang djơ̆ hăng tơlơi phiăn pơkă, bruă jao. Trung tá, Phạm Hưũ Lộc, khua gum bruă kơđi čar mơ̆ng Khua git gai ling tơhan să Phù Mỹ Đông brơi thâo, tơdơi kơ rŭ kuai đĭ, tơlang tơleh tơhan djai pơsăn drơi jăn yua kơ lŏn ia hơmâo Grup K52 pô duñ pioh, ba glăi pơ grup sem lăng, djă pioh tong ten biă mă hlâo kơ jao glăi pơ Khul khua mua tơhan ƀơi să.

“Hăng bruă mă amăng 500 hrơi mlam, anom bruă anai pơphun pok pơhai ngă tui dơ̆ng mơ̆ng kơnôl 25/6 truh ră anai. Anom bruă hơmâo pok pơhai tui mrô rơnoh djop grup hơmâo jao dưi hơmâo Ping gah, jơnum min mơnuih ƀôn sang să akŏ pơjing, ngă tui rim hrơi kiăng sem lăng jŭ yap hmao kru”.

Ƀơi hơdôm boh pơsat rŭ kuai, sa pok pang ap ngă rơnưh dăng lui, pơdong đĭ pioh pơgang tui krah adai pơ-iă kơtang hrup apui hlia bơyan pơdơi prong kơ ƀing adơi ayong dŏ mă bruă. Hăng bruă mă găn rơgao lu thun laih, bruă ngă pơtum pơƀut tơlang ƀing tơhan djai pơsăn drơi jăn yua kơ lŏn ia, rim črăn bruă ƀing khua mua-ling tơhan K52 hơmâo ngă kơđiăng tong ten biă mă. Thiếu tá, Trần Hoàng Nam, ding kơna grup K52, anom bruă khua tơhan tơring čar Gia Lai kah pơpha, rim boh pơsat dor tơhan pơsăn drơi ƀơi anih lŏn mơnai glai klô čuah ƀudah lŏn rơga phara soh, anun yơh bruă rŭ kuai đĭ hơmâo tơlơi gleh glar, tơnap tap phara soh.

“Lơ̆m pok pơhai bruă mă ƀuh lĕ ƀơi djop pơsat hơmâo dor ƀơi djop anih phara soh. Hơmâo anih pơsat đơ đa lŏn rơ-un, tơnap biă kuai mă tơlang, kah hăng ƀơi Phù Mỹ Đông lŏn čuah ƀing adơi ayong kuai lŏn dor nao, dor na nao tơhlŏm pơyŭ. Hơmâo anih đơ đa klơi djơ̆ amăng ia bluh, ia ƀlĕ bơblui tơnap biă mă kuai  ĕp mă tơlang”.

Bruă ngă kret kruai, tơnap tap gah yŭ adai pơđiă kơtang. Pô anai gleh lĕ pô adih nao hrua brơi. Ia hô̆ hang mơsah abih sum ao samơ̆ ƀu pô hăt ôh, ngă bruă sơ̆n pran jua, añ kơ tơlơi tơnap tap. Djă ačong, wăng anet kuai, djong keh, duñ sa čơđeh, ƀudah meh tơlang pơčah rai, djong duñ ba abih, hơmâo wơ̆t bơnal ao tơ̆i hrĕ mrai deng dong, sa arăt ƀŭ ăt khom duñ ba abih, djop mơta djong pŭ mă djă ƀơi tơngan hăng pran jua pơpŭ biă mă. Jai lu tơlơi tơnap tap, ƀing ding kơna amăng grup K52 Gia Lai jai sơ̆n pran jua hloh mă brruă.

“Ăt hơmâo mơ̆n đơ đa yua sui thun laih, khul tơlang tơleh phŏ laih brŭ hiă lik abih. Hơdôm ƀing anun, Grup K52 pok prong anih hơduah ĕp. Hŭi lơ̆m arăng dor hĭ, ngă pơsat ƀudah pơsat čih ƀu djơ̆ anăn, soh glăi hĭ pơsat. Ƀing adơi ayong gir kuai prong anih rơhaih hloh, kiăng pơtong glăi tong ten, ƀu lui soh sel sa mơta mơnong ôh”.

Ataih mơ̆ng anih dŏ rŭ kuai hơdôm hơpluh met đôč, anih ƀing mơnuih kơhnăk ia rơgơi dŏ mă meh tơlang, pơčrang čơđeh AND, dŏ mă bruă tơpă hnơ̆ng khut khăt. Rim sa čơđeh meh tơlang duñ ba čih pioh tơlơi pơhing, rơđah rơđong, čơphil pioh rup, čih  mrô, dăp glăi hơbôt, pơtep lui boh hră čih pioh gru djă pioh djop pioh ba glăi pơtong anăn tơdơi kơ anun. Ơi ia jrao Dương Công Hoàng, khul ngă bruă mă meh čơđeh tơlang brơi thâo:

“Tơdơi kơ mă meh tơlang čơđeh giong, hơdôm tơlang dŏ glăi jao kơ puih kơđông tơhan čih pioh dăp mrô kiăng ba dor glăi. Sang bruă djă pioh tơhnal meh tơlang djă ba pơčrang đôč, jao ơ sang bruă tŭ mă, ba nao pơ anih pơčrang, pơsit anăn krăn pô kơ tơhan pơsăn drơi anun”.

Pơsat dor tơhan pơsăn drơi jăn yua kơ lŏn ia ƀơi Mỹ Thắng hơmâo 445 boh pơsat tơhan pơsăn drơi, amăng anun 118 boh pơsat aka ƀu thâo krăn pô. Bruă mă meh čơčeh tơlang ba pơčrang AND anai, kơnong sa bruă mă črăn blung a đôč amăng črăn bruă ngă tui tơlơi jak iâu 500 hrơi mlam mơ̆ tơring čar Gia Lai hlăk pok pơhai ngă tui ƀơi djop pơsat gong kut dor tơhan pơsăn drơi jăn kơ lŏn ia. Jơlan či nao pơ anăp dŏ ataih đôč, lu tơlơi tơnap tap lông lăng, yua dah kru hăng thun blan blah wang rơgao sui laih pơ klôn adih. Samơ̆ rim kơ meh čơđeh ba pơčrang tơlang anun dŏ djă pioh klă na nao, tong ten truh ră anai, dŏ djă pioh sa tơlơi čang rơmang kơ sa hrơi anun, ƀing tơhan tuh drah pơčah asar đưm hlâo, amra hơmâo anăn, thâo krăn pô sit nik, iâu djơ̆ anăn gơñu laih anunm ba glăi pơ sang anŏ plơi pla jĕ giăm kơnung djuai.