Tơring čar Khánh Hòa ră anai hơmâo 34 phung djuai ania ƀiă hăng rơbêh 266.000 čô mơnuih, jing hơmâo giăm 12% mrô ană mơnuih. Truh rơnuč thun 2025, tơring dŏ glăi năng ai 5.100 boh sang anŏ rin, amăng anun rơbêh 3.000 boh sang anŏ lĕ mơnuih djuai ania ƀiă. Ƀơi mông ngă bruă, tơring čar Khánh Hòa rơkâo kơ Ding jum djuai ania hăng tơlơi đăo tañ čih pơkra giong tơlơi pơkă, hơdră djru kơ lŏn tơnah, prăk čan hăng djru tuh pơ alin; pơhrua tui tơlơi hơmâo či pơkra anih anom, jơlan nao rai; tañ pơtrun rơnoh djru lŏn dŏ, sang dŏ kiăng tơring čar hơmâo phun atur lăng tui pok pơhai ngă bruă klă hloh.

Khua ding jum ơi Nguyễn Đình Khang tŭ yap hơdôm boh than Khánh Hòa hơmâo ngă amăng bruă hrŏ trun ƀun rin, tuh pơ alin man pơdong anih anom, jơlan nao rai, hăng pơđĭ tui tơlơi hơdip mơnuih ƀôn sang djuai ania ƀiă. Ñu kiăng tơring čar ngă bruă klă hloh, pơsir hĭ hơdôm rơnoh pơkă dŏ aset đơi; lăng glăi, pơkă brơi lăp djơ̆ djŏp hră pơ-ar, tơlơi pơhing tơdơi kơ pơmut hrŏm; hră pơ-ar dưm pioh amăng boh thâo mrô; čih pơkra giong bruă či ngă tui tơlơi pơtrun mơ̆ng dêh čar rơwang thun 2026-2030, laih dong pel ĕp, krăp lăng kiăng djŏp bruă tuh pơ alin hơmâo mă yua djơ̆ lăp, tŭ yua./.