Hà Ánh Phượng, khua pơ ala mơ̆ng Phú Thọ brơi thâo, jơlan hơdră pơtô hrăm thun 2018 ăt đĭ kyar tŭ yua, djơ̆ hăng tơlơi kiăng mơ̆ng Tơlơi pơtrun 88 mơ̆ng Khua mua pơ ala mơnuih ƀôn sang ba tơbiă. Khă hnun, pô pơ ala Hà Ánh Phượng dŏ bơngơ̆t hăng tơlơi pơtrun tal 2 mơ̆ng Tơlơi pơsit ruah hơdrôm hră pơtô hrăm. Tui anun, rim anom bruă pơtô hrăm akŏ pơdong 1 grup ruah hơdrôm hră hrăm. Pơsit tui anun ăt hơmâo lu tơlơi aka ƀu djơ̆:

“Tal sa, lu anom bruă pơtô hrăm sit biă ñu kơnong hơmâo mơ̆ng sa truh kơ dua hơdrôm hră ƀing nai pơtô lơ̆m sa tơlơi hrăm. Lơ̆m anun, mrô hơdrôm hră pơtô hrăm lu đơi. Anai jing bruă ngă tơnap biă, aka ƀu djơ̆ đơi mơn yua tơlơi apăn bruă mơ̆ng ƀing nai pơtô phara. Tal dua, kâo pơmin tơlơi anai amra ngă tơnap amăng bruă ba sĭ ƀudah pơtŏp bruă brơi nai pơtô mă yua hơdrôm hră, biă ñu ngă tơnap kơ ƀing čơđai lơ̆m hrăm glăi ƀudah plih anih hrăm”.

Tui hăng ơi Trần Văn Sáu, khua pơ ala mơ̆ng Đồng Tháp, Tơlơi pơsit mrô 88 lăi rơđah Ding jum pơtô hăng pơjuăt pơphun čih pơkra hơdrôm hră pơtô hrăm. Hơdrôm hră pơtô hrăm anai hơmâo sem lăng pơsit dưm kơnar hăng hơdrôm hră pơtô yua anom bruă, hơjăn pô čih pơkra. Črâo rơđah Tơlơi pơsit 88 hơmâo pơtrun amăng thun 2014, truh thun 2020 kah mơ̆ng hơmâo Tơlơi pơsit 122, ơi Trần Văn Sáu lăi nao kơ bruă 6 thun, yua hơget Ding jum pơtô hăng pơjuăt ƀu pơphun ngă tui Tơlơi pơsit anai? Lơ̆m anun, jao abih bruă čih pơkra hơdrôm hră kơ abih bang mơnuih, mơ̆ng anun yơh hơmâo tơket tơkeng hơdrôm hră, nua pơmă ƀu thâo pơgăn.

“Ping gah jak iâu abih bang mơnuih gum djru bruă pơtô hrăm, samơ̆ Kơnuk kơna khŏm ngă pô gơgrong phun amăng bruă pơtô hrăm. Ƀu dưi brơi abih bang mơnuih gum ngă tui anun, ngă tui anun arăng gơñăm nao bruă sĭ mơdrô kiăng ƀong lơi đôč. Sit biă ñu, amăng bruă hơget tŭ mơn lơ̆m jao kiăng abih bang mơnuih ngă lĕ nua trun soh, kơnong hơdrôm hră hrăm yơh abih bang mơnuih ngă lĕ jai pơmă tui. Anai jing tơlơi phara biă, ƀu hơmâo tơhnal pơpă ôh pơhlôm brơi hơdrôm hră huăi pơmă tui”.

Khua ding jum pơtô hăng pơjuăt ơi Nguyễn Kim Sơn lăi glăi:

“Ƀing khua lăp đing nao bruă tơlơi pơsit mơ̆ng Khul krăp lăng lĕ jao kơ Ding jum pơtô pơjuăt prăp rơmet pơdah kơ Khua mua pơ ala mơnuih ƀôn sang hơdră ngă bruă bơdjơ̆ nao bruă čih pơkra sa hơdrôm hră pơtô hrăm. Ƀing gơmơi pơmin mơ̆ng anai truh pơ thun 2024 bruă yôm hloh lĕ kiăng sem lăng pơsit anŏ klă mơ̆ng djŏp hơdrôm hră pơtô anih 5, 9, 12 klă hloh, pơhlôm djŏp hơdrôm hră kơ thun hrăm phrâo, bơ bruă jao lĕ gơmơi amra sem lăng amăng 2 thun pơ anăp, lơ̆m bruă pơplih hơdrôm hră hơmâo ngă giong amra hơmâo anŏ pơtŏng glăi dlăm hloh, laih anun ba tơbiă hơdră ngă bruă hăng Khua mua pơ ala mơnuih ƀôn sang tơdơi”.

Sang jơnum khua pơ ala mơnuih ƀôn sang dêh čar ăt dik dak hăng lu tơlơi pơgôp hiăp gah ia jrao. Ƀing khua črâo rơđah, amăng hrơi blan rơgao ăt dŏ hơmâo mơn bruă brơi ia jrao kaih. Bruă gơgrong ba sĭ iạ jrao mah hơmâo pơplih laih samơ̆ bruă blơi sĭ gơnam yuaia jrao ăt tơnap biă. Tơnap hloh ră anai lĕ ƀu dưi blơi gơnam klă laih anun ƀu dưi pơkra boh thâo măi mok rơgơi hloh. Bruă mơnuih ruă ung thư jai hrơi lu...Pô pơ ala mơnuih ƀôn sang Nguyễn Tri Thức, grup khua mơ̆ng ƀôn prong Hồ Chí Minh pơgôp hiăp:

“Kâo rơkâo kơ khua mua pơ ala mơnuih ƀôn sang dêh čar, Kơnuk kơna lăng ba prăp rơmet 2 anih djru pơjrao xạ trị proton ƀơi Hà Nội hăng ƀôn prong Hồ Chí Minh kiăng mơnuih ƀôn sang Việt Nam dưi ngă tui hăng mă yua boh thâo măi mok rơgơi hloh mơ̆ng rŏng lŏn tơnah. Ƀing ta hơmâo tơlơi gêh gal, hơmâo ơi ia jrao glăk mă bruă pơjrao xạ trị ƀơi Hà Nội hăng Hồ Chí Minh dưi mă yuă măi mok anai tơdơi kơ 6 blan nao hrăm pơ čar rơngiao”.

Lăi glăi bruă anai, Khua ding jum ia jrao Đào Hồng Lan brơi thâo: phun ñu yua gơnam pioh pơkra ia jrao ƀơi rŏng lŏn tơnah kơƀah đơi, nua pơplih na nao mơn...Ding jum glăk gir pơsir hĭ bruă kơƀah ia jrao, măi mok gơnam yua gah ia jrao kơ lu sang ia jrao. Hơmâo hơdôm hơdră ngă bruă hăng hơdôm tơlơi dŏ gun amăng bruă pơphun ngă. Kơ hrơi blan pơ anăp anai, Khua ding jum Đào Hồng Lan brơi thâo, amra ngă hrŏm hăng hơdôm boh tơring, hơdôm anom bruă ia jrao lăng glăi abih hơdôm tơlơi bơdjơ̆ nao pơhlôm ia jrao, măi mok, gơnam yua gah ia jrao či pơsir kiăo tui tơlơi dưi mơ̆ng ƀing gơñu./.