Đĭ pơhiăp ƀơi hơdră, Khua git gai pơ ala mơnuih ƀôn sang dêh čar ơi Vương Đình Huệ pơdah rai pran jua ol kơdol ƀuh hơdôm bruă mă, pran jua pơgôp prong prin, tơlơi ruă nuă, pơsăn drơi jăn mơ̆ng ling tơhan, mơnuih ƀôn sang, khua mua ngă bruă pơhlôm pơgang pơgang tơlơi truh apui ƀong ngă; bruă ngă mơ̆ng khul ling tơhan, mơnuih ƀôn sang amăng mông ječ ameč truh hơmâo ba glăi lu boh tơhnal lăp pơ-ư ang biă mă, ƀuh lu gru mơnuih hur har khin hơtai amăng bruă mă pơhlôm, pơgang apui ƀong, pơklaih mơnuih ječ ameč truh.

Khua git gai pơ ala mơnuih ƀôn sang dêh čar lăi lĕ, hrŏm hơbit, djru pran jua hăng ƀing tơhan pơhlôm pơgang apui ƀong hăng pơklaih mơnuih ječ ameč truh hơmâo lu gưl mơnuih ƀôn sang ngă hrŏm. Tong ten biă mă ñu kah hăng : Grup pơhlôm pơgang hăng pơklaih mơnuih ječ ameč truh ƀơi tơring kual Lạc Dương, tơring čar Lâm Đồng hơmâo bruă mă pơyơr pran jua djru hrŏm mơ̆ng grup ngă bruă pơhlôm pơgang apui ƀong, kah hăng ayong Nguyễn Hữu Đốn khin hơtai, pơsăn drơi pô nao djru pơklaih mơnuih amăng mông ječ ameč truh apui ƀong sang ƀơi plơi prong Phan Thiết, tơring čar Bình Thuận phrâo anai; grup djru ječ ameč FAS Angle hăng hơdră kiăng ngă ‘Djru pơklaih mơnuih lĕ tơlơi phiăn hơdip hơmâo djru ba hơdôm rơbâo čô mơnuih ječ ameč truh hăng phrâo anai hloh djru mơnuih ƀôn sang amăng mông apui ƀong sang kơtang ƀơi phường Khương Đình, quận Thanh Xuân, Hà Nội...Anai lĕ hơdôm bruă mă hiam klă, lăp pơpŭ bơni, kiăng bang bơngač kơtang hloh truh pơ lu mơnuih thâo kơ pran jua khin hơtai, tui tơlơi pơtô mơ̆ng đưm “Khăp kơ mơnuih pơkŏn kah hăng drơi jăn pô” mơ̆ng djuai ania ta.

Ƀơi hơdră anai, pơpŭ bơni, hơdor tơngia kơ bruă mă hiam, bruă mă klă, pran jua khin hơtai, mơ̆ng ƀing tơhan hăng mơnuih ƀôn sang djru amăng bruă pơčruih apui ƀong sang hăng pơklaih mơnuih ječ ameč truh, hơdor kơ ƀing răm ƀăm yua amăng bruă pơčruih apui ƀong sang, djru mơnuih mơnam amăng mông ječ ameč thun blan rơgao.

Amăng thun blan pơ anăp, tơlơi pơhing apui ƀong sang, boh pơtuh, tơlơi truh sat ăt dŏ hơmâo đôč, aka ƀu thâo hlâo ôh amăng hơdôm sang dŏ hrŏm dlông tal, lu mơnuih, sang anŏ amăng sa boh ruăi sang; anih pơtum lu mơnuih amăng sang čơ, anih sĭ mơdrô....Tui hăng Khua git gai pơ ala mơnuih ƀôn sang dêh čar, tơlơi anai kiăng kơ ƀing tơhan pơhlôm, pơgang apui ƀong sang hăng pơklaih mơnuih hơmâo tơlơi truh djop gưl, djop anom bruă kơtưn hloh, prăp lui tong ten, hơdôm tơlơi hrăm, bruă či ngă pơƀuh lui hlâo, kơtưn dăp hơdră bruă mă djơ̆ rơ-ua. Khua git gai pơ ala mơnuih ƀôn sang dêh čar ơi Vương Đình Huệ lăi:

“Khom lăng yôm bruă pơhlôm hlâo, mă bruă pơhlôm hlâo anun yơh jing bruă mă phun, mơ̆ng anun pơhrŏ ƀiă mrô apui ƀong sang hăng anŏ răm ƀăm yua apui ƀong sang ngă rai, boh nik ñu pơgang ba mơnuih, kông ngăn mơnuih ƀôn sang, tơhnal pơkă anăp nao lĕ pơgang ană plơi pla, tơlơi hơdip mơda mơnuih ƀôn sang yơh phun amăng bruă pơgang rơnuk rơnua hơđong, kiăng pơđĭ kyar lŏn ia; pơgang hăng djă hnong tơlơi gêh găl rơnuk rơnua pơgang apui ƀong sang kơ djop sang bruă, anih mơnuih ƀôn sang dŏ, rim boh sang anŏ; pơtrut bruă mă pơtô brơi hăng pôr tơlơi pơhing, pơtô pơblang tar ƀar, brơi mơnuih ƀôn sang thâo tơlơi phiăn, pơtô brơi tơlơi thâo amăng bruă pơhlôm pơgang apui ƀong sang, boh nik ñu hơdră bĕ hĭ tơlơi truh amăng mông ječ ameč; brơi mơnuih ƀôn sang thâo tong ten hơdră mă bruă pă mơta sa anih, git gai mơtam, tơhan hơmâo ba mơtam, gơnam yua prăp lui hlâo, rơdêh đĭ hăng prăp lui mơnong ƀong huă tong ten; pok pơhư prong, pơlar tui hơdră mă bruă kah hăng khul hơdôm sang anŏ mơnuih ƀôn sang gum hrŏm, ngă tui djơ̆ hơdră pơhlôm, pơgang tơlơi truh apui ƀong sang, bong glăi hmao kru, apui ƀong, tơlơi truh boh pơtuh, tơlơi răm ƀăm tŭ yua hloh”.

Hrŏm hăng anun, pơphun jŭ yap glăi, pel ĕp lăng bruă pơhlôm, pơgang apui ƀong amăng đơ đam dêh čar, boh nik ñu amăng anih, plơi pla, ƀut mă bruă amuñ hơmâo tơlơi truh pơtuh apui ƀong; khom hyu sem lăng na nao tong ten tơlơi phiăn pơkă mơ̆ng kơnuk kơna, čih pơkra, pơhrua nao hmao kru, kiăng djơ̆ găl, lăp hăng bruă pơhlôm pơgang apui ƀong laih anun pơklaih mơnuih amăng hơmâo tơlơi truh.

Ƀrô tal anai, Khua git gai pơ ala mơnuih ƀôn sang dêh čar ơi Vương Đình Huệ iâu pơthưr djop gưl, anom bruă hăng abih bang mơnuih ƀôn sang pơđĭ tui tơlơi thâo hluh, răng kơđiăng, glăm ba amăng bruă pơhlôm, pơgang apui ƀong sang hăng pơklaih mơnuih ječ ameč truh, lăng anai lĕ bruă mă yôm, na nao, re se, ƀu ngă amưng ôh, lăng djhul amăng bruă mă; rim čô mơnuih ƀôn sang, rim sang anŏ khom ngă tui djơ̆ hơdôm tơlơi pơtrun mơ̆ng kơnuk kơna pơkă kơ bruă pơhlôm, pơgang apui ƀong sang hăng pơklaih mơnuih mông ječ ameč truh.