VOV4.Jarai -  Rơwang hrơi tơjuh rơgao, Khua git gai pơ ala mơnuih ƀon sang dêh čar ơi Vương Đình Huệ git gai mông ngă bruă hăng Ding jum kông ngăn lǒn tơnah hăng ayuh hyiăng kơ bruă pơplih pơkra, pơhrua tui tơlơi phiăn lǒn tơnah. Khua git gai pơ ala mơnuih ƀon sang jao kơ Jơnum min bơwih ƀong huă lăi pơthâo brơi hơdôm bruă kiăng čih pơkra tơlơi phiăn lǒn tơnah pơplih glăi, amăng anun hơmâo bruă mă tơlơi pơgôp hiăp mơng mơnuih ƀon sang tui hăng tơphiăn.

Lăi pơthâo glăi ƀơi mông ngă bruă, Khua ding jum kông ngăn lǒn tơnah hăng ayuh hyiăng Trần Hồng Hà brơi thâo, glăk mă tơlơi pơgôp hiăp mơng ƀing bơdjơ̌ nao hơmâo kiăo tui Tơlơi pơtrun mrô 1, hơdôm tơlơi pơsit pơkǒn dong kiăng djơ̌ gal tơlơi phiăn djǒp mơta, hmao tlôn tơlơi pơtrun mơng Ping gah kơ bruă wai lăng hăng mă yua lǒn tơnah, ngă kiăo tui tơhnal mơng hơđăp mơn, hơđong tui tơlơi phiăn; pơplih pơkra pơhrua tui hơdôm tơlơi pơkôl pơkă đah mơng pơđǐ tui tơlơi hơmâo mơng lǒn tơnah, pơsir hǐ tơlơi ngă gun, aka ƀu gêh gal amăng jơlan hơdră, tơlơi phiăn hơmâo črâo pơƀuh amăng hrơi jơnum pơđut Tơlơi pơtrun mrô 19 -NQ/TW hăng pơphun ngă tui Tơlơi phiăn lǒn tơnah.

Amăng hrơi blan čih tơlơi phiăn, Ding jum ăt hơmâo lăng glăi rơbêh 100 tơlơi phiăn bơdjơ̌ nao gah lǒn tǒnă kiăng lăng glăi pơplih mơtăm amăng Tơlơi phiăn lǒn tơnah anai ƀudah rơkâo pơplih tơlơi phiăn bơdjơ̌ nao kiăng pơhlôm djơ̌ hrǒm tui hăng tơlơi pơtrun mrô 18. Hlâo či mă tơlơi pơgôp hiăp mơng ƀing bơbeč djơ̌ tơlơi phiăn, Dimg jum kông ngăn lǒn tơnah hăng ayuh hyiăng hơmâo hmư̌ tơlơi pơgôp hiăp mơng 63 boh tơring čar ƀon prong, hơdôm ding jum anom bruă, ngă bruă tom hơdôm ding jum prăk kăk, man pơdong, ngă hmua hăng pơđǐ kyar ƀon lan, jơlan nao rai pơdǔ pơgiăng, ding jum bruă čar.

Tơdơi kơ hmư̌ tơlơi pôgôp hiăp, Khua git gai pơ ala mơnuih ƀon sang Vương Đình Huệ lăi rơđah, kơčăo bruă tơlơi phiăn lǒn tơnah (pơplih pơkra) jing tơlơi phiăn prong, yôm biă mă, bơdjơ̌ nao lu mơnuih, anom bruă. Hăng tơlơi yôm anun, hrơi blan rơgao bruă prăp lui sem lăng pơgôp hiăp hăng tơlơi phiăn anai hơmâo pơphun ngă ječ ameč, gơgrong bruă.

Anih mă bruă

Khua git gai pơ ala mơnuih ƀon sang dêh čar ơi Vương Đình Huệ kiăng, Tơlơi phiăn lŏn tơnah yôm biă mă anun jing čih pơkra djơ̆ tui tơlơi pơkă mơng tơlơi phiăn, ngă tui djơ̆ hrơi pơkă prăp rơmet, Kơnuk kơna pơdah hră pơ-ar Tơlơi phiăn pơ hơdôm anom bruă mơng Khua pơ ala mơnuih ƀon sang hlâo lơ 1/9 kiăng kơsem min, pơgôp hiăp ƀơi mông Jơnum khua apăn bruă pơ ala mơnuih ƀon sang dêh čar.

Kơ hră pơ-ar, Khua git gai pơ ala mơnuih ƀon sang kiăng Ding jum kông ngăn lŏn tơnah hăng ayuh hyiăng pơƀut hloh dong amăng bruă čih pơkra hră lăi pơthâo glăi kơ hơdôm tơlơi bơdjơ̆ nao bơwih ƀong huă, mơnuih mơnam, ayuh hyiăng, rơnuk rơnua, bruă pơgang lŏn ia, anih sĭ mơdrô, lăng glăi abih tơlơi phiăn bơdjơ̆ nao hăng tơlơi pơkă pơtô ba bruă čih Tơlơi phiăn lŏn tơnah. Hơdôm tơlơi lăi pơthâo glăi jing yôm biă mă, jing tơhnal kiăng ƀing ta dưi čih pơkra tơlơi phiăn. Yua hnun hăng pran jua ngă bruă klă, pơhlôm bruă prăp rơmet rơđah, tŏng ten hơdôm tơlơi hơmâo lăi nao anai khŏm hơmâo ngă hrŏm kơjăp, biă ñu lĕ kơplah wah anom bruă mơng khua pơ ala mơnuih ƀon sang dêh čar hăng Kơnuk kơna laih anun kơplah wah Gơnong dlông hăng tơring čar. Rơngiao kơ anun, Khua git gai pơ ala mơnuih ƀon sang ăt pơtă tui tơlơi pơtrun mrô 18 mơng Ping gah dêh čar, thun 2023 ƀu kơnong ngă giong tơlơi phiăn lŏn tơnah pơkra phrâo đôč ôh mơ̆ ăt hơmâo pơplih giong hơdôm tơlơi phiăn bơdjơ̆ nao.

Khua git gai pơ ala mơnuih ƀon sang dêh čar ƀơi mông mă bruă.

Kơ bruă jơnum pơčrông sai, mă tơlơi pơgôp hiăp kơ kơčăo bruă Tơlơi phiăn lŏn tơnah pơplih pơkra glăi, Khua git gai pơ ala mơnuih ƀon sang dêh čar pơtă, lơ̆m ƀing ta ƀu hơmâo lu mông dong tah, khŏm kiăng hơmâo hơdră ngă bruă lăp djơ̆, ngă bruă amăng mông pơkă hơdeč, tŭ yua lơ̆m bơkơtuai pơgôp hiăp kơ tơlơi phiăn. Rơngiao kơ Jơnumj min bơwih ƀong huă ngă anom bruă pel ĕp, Jơnum min wai lăng djuai ania hăng hơdôm Jơnum min pơkŏn mơng Ƀirô khua pơ ala mơnuih ƀon sang ƀudah Anom bruă jŭ yap prăk kơnuk kơna, Jơnum min pơ ala mơnuih ƀon sang djŏp gưl, hơdôm khul grup pơ ala mơnuih ƀon sang ăt khŏm gơgrong bruă djru čih pơkra tơlơi phiăn. Yua hnun, Khua git gai pơ ala mơnuih ƀon sang lăi, dŏ hơmâo lu đôč tơlơi tơnap, tơlơi lông lăng amăng bruă čih pơkra giong tơlơi phiăn, anun jing anom bruă kơnuk kơna ƀu dưi hok mơ-ak hlâo ôh, khŏm gơgrong bruă hăng Ping gah hăng mơnuih ƀon sang amăng bruă ngă pơgiong Tơlơi phiăn.

Khua git gai pơ ala mơnuih ƀon sang dêh čar jao kơ Jơnum min bơwih ƀong mơng Ƀirô khua pơ ala mơnuih ƀon sang lăi pơthâo, pơphô brơi Akŏ bruă kiăng ngă mơng Khua pơ ala mơnuih ƀon sang dêh čar ngă djŏp bruă čih pơkra Tơlơi phiăn lŏn tơnah pơplih pơkra, amăng anun bruă mă tơlơi pơgôp hiăp mơng Mơnuih bon sang tui tơlơi phiăn; jao bruă kơ Jơnum min khua apăn bruă pơ ala mơnuih ƀon sang, Khul wai lăng djuai ania, hơdôm anom bruă mơng Khua pơ ala mơnuih ƀon sang dêh čar, hơdôm khul grup mơng Jơnum min apăn bruă pơ ala mơnuih ƀon sang dêh čar, Jơnum min pơ ala mơnuih ƀon sang tơring čar, ƀon prong, hơdôm khul grup khua pơ ala mơnuih ƀon sang laih anun hơmâo hơdră bruă lăi pơthâo nao rai tañ kơ Hră pơ-ar tơlơi phiăn, hơdôm boh than kơsem min, lăi pơthâo glăi bruă ngă tui Tơlơi phiăn glăk hơmâo, lăi pơthâo glăi bruă sem lăng hơdôm tơlơi phiăn bơdjơ̆ nao lŏn tơnah. Hăng bruă mă tơlơi pơgôp hiăp mơng mơnuih ƀon sang, Khua git gai pơ ala mơnuih ƀon sang dêh čar kiăng ba tơbiă bruă rơđah rơđông, hơmâo pơblang rơđah, hơmâo tơlơi gơgrong bruă mơng hơdôm anom bruă pơhmư̆ tơlơi pơgôp hiăp mơng Mơnuih ƀon sang.

Siu H’Mai: Pơblang